LOKA TAMAITITI 3 TAUSAGA I LE SELA

E tolu tausaga o se tamaititi na loka faatasi ma lona tama e leoleo i le sela i le ofisa autu o leoleo i le faaiuga o le vaiaso na te’a nei. Na faaalia e le tama i le au tusitala e faapea, na maua o ia e leoleo i le aso Gafua o ia fealuai i se taavale e lei resitalaina, ma o le aso Faraile o le vaiaso na te’a nei na maua faalua ai o ia ao ia alu atu e resitala le taavale. Fai mai a ia, sa ia taumafai e faamalamalama i ai o lo o ia alu atu e resitala le taavale, ae e lei tuuina atu se avanoa e alii leoleo na mauaina o ia, ma sa auina atu loa o ia ma lona atalii e tolu tausaga sa la malaga faatasi i lena aso, i le ofisa autu o leoleo i Apia ma loka faatasi ai loa i laua i totonu o le sela i le ofisa.

Na saunoa le tama, sa ia finau atu e le tatau ona loka lona atalii i totonu o le sela ae logo se tasi o le latou aiga i Falealili e sau e ave atu. Peitai, e lei ano le alii leoleo sa tiute i lea aoauli i lana talosaga ma sa faapea loka ai lava i laua. “Na tagi lou fatu i lou vaai atu i le tu mai o si ou atalii i totonu o lenei nofoaga palapala ma le manogi leaga,” o le tala lea a le tama.

“O se nofoaga e fainaelo i ai tagata e loka ai ma e matua le talafeagai lava mo se tamaititi e tolu tausaga. Sa tagi si ou atalii i le fefe ma le vevela, ma sa ou tago atu tatala le ofutino ma fusi mai ma ou faamalosi e nana ni ou lagona mafatia i nei atili ai ona tagi o ia.” O le pe a ma le afa itula talo ona loka i laua, ae taunuu atu loa se tasi o leoleo sinia ma fesili po o ai na lokaina le tamaititi i totonu o le sela, ma sa tatala loa i laua. Peitai, sa toe taofia foi i laua i totonu o se isi sela mo le isi afa itula. Faatoa tatala i laua i le pe a ma le 10 minute e te’a ai le tasi i le aoauli.

TUMAU PEA PAPALII I LE HRPP

Ua faamautu mai e le alii faipule sa avea muamua ma minisita o Tupe, le afioga Papalii Niko Lee Hang, lona faamaoni ma lona lagolagoina pea o le vaega faaupufai o le HRPP e ui I lipoti e faapea, e I ai ni ofo ua tuuina atu ia te ia e nisi o faipule o lo o taumafai e faavaeina se latou vaega faaupufai fou ae lei oo mai le faiga palota lautele a le atunuu I le 2016. Na fesiligia e le au tusitala ia Papalii pe na te talia se ofo e avea ma sui o se vaega faaupufai fou, ae na tali o ia e leai.

“Na ou ulufale mai I upufaiomalo o se sui o le HRPP, ou te tauva I le isi faiga palota o lo o loma nei o se sui o le HRPP, ma ou te tumau ai pea I le HRPP seia oo I le iuga,” o le tautinoga lea a Papalii. Ua lipotia I uaealesi mosooi e faapea, e I ai se sui faipule sa avea muamua ma minisita o le Kapeneta o lo o taumafai e tuufaatasia se vaega faaupufai fou ma o lo o ia taumafai e faatosina atu sui faipule I lana vaega faaupufai. Na faaalia, e I ai ni tagata fai pisinisi iloga o le atunuu o lo o lagolagoina lea vaega faaupufai fou ao agai atu I le faigapalota o le 2016. Ae ua faaalia e Papalii,

“E le taitai ona ou auai I lea vaega faaupufai fou.” Peitai e le auai le manatu o le taitai o le vaega faaupufai o le Tautua Samoa, le afioga Palusalue Faapo II. Fai mai a ia, ua ia faalogo I lea vaega faaupufai fou ma o se tulaga lelei tele lea mo upufaiomalo I Samoa.

TOALUA TAMAITAI PULE I LE OLA I LE VAIASO E TASI

Na toe faaopopo le fuainumera o i latou ua pule i o latou ola i Samoa i le lua i le vaiaso na te’a nei, ina ua pule i o la ola ni tamaitai talavou e 19 tausaga ma le 23 tausaga. O lea tulaga na faamaonia mai e le sui komesina o leoleo, le afioga Fauono Talalelei Tapu. O le tamaitai muamua na maua e lona uso i le fale taele o le latou aiga i Malie ma sa tili atu loa i le falemai i Motootua. Peitai, na maliu o ia i le afiafi o le aso Faraile.

Na faaalia e Fauono, na ita le ua maliu i lona tina ona o le faatonu o ia e fai le tagamea. O lea teineititi sa aoga i le Kolisi o Uesele. O le isi tamaitai na pule i lona ola i le afioaga o Lalomanu, Aleipata. Na saunoa Fauono, o lea tamaitai e 23 tausaga e mai le afioaga o Sa’asa’ai ma Lalovaea ma o le aso Sa na pule ai o ia i lona ola. Na faaalia, sa tulai mai se feeseeseaiga a lea tamaitai ma lona toalua ma iu ai ina pule i lona ola. Na maua atu o ia e lona toalua ma sa ia faataalise atu loa i le falemai i Lalomanu, ae e taunuu atu ua maliu lava o ia. Na faaalia e le tina o Runa Curry o le faalapotopotoga o le Faataua le Ola, lona faanoanoa i le tulaga ua i ai le faatupulaia o le fuainumera o tagata ua pule i o latou ola.

Saunia: Lilomaiava Andrew Fa’asau, Naenae Productions