FOMA’I MATA FAAPITOA MAI FITI

Na matua faatumulia le vaega o le maota gasegase i Motootua sa atofaina mo togafitiga o mata e ni fomai mata faapitoa se toatolu mai Fiti i le mamalu o le atunuu sa autovaa atu e vaai o latou fofoga. Na amata mai i le aso muamua o lea tautua faapitoa i le aso ananafi ona faatumulia lea vaega o le falemai i le mamalu lautele o le atunuu, sa oo atu e faaaoga lea avanoa e togafitia ai o latou fofoga e fomai mata faapitoa.

O lea tautua ua ofoina mo i latou sa vaaia muamua o latou fofoga e fomai i Samoa nei ma ua fautuaina le vaaia e ia fomai mata faapitoa. O lenei tautua a fomai mata mai Fiti o lo o faatupeina e le ofisa tutotonu o togafitiga o mata a le Pasefika, le Pacific Eye Institute i Aukilani, Niu Sila ma o lo o faagasolo i atunuu eseese o le Pasefika, ma e tasi le vaiaso e faagasolo ai.

FALEMA’I FOU I MOTO’OTUA

Ua faasolo ina faaiuiu galuega i le fausia o le vaega lona lua poo le Phase Two o le galuega tele o lo o faagasolo nei i le fausiaina lea o le maota gasegase. Na talanoa mai le faatonu sili o le Ofisa o Auaunaga Tau le Soifua Maloloina, le afioga Leota Laki Lamositele, i fuafuaga a le latou ofisa mo le fale tele fogafale tolu ua toeititi maea ona fausia. Fai mai a ia, o le fogafale i lalo o le a toe see mai i ai ia le potu o gasegase tau savali ma le potu mo gasegase o faalavelave faafuasei faapea le potu mo gasegase o le fanau.

O le fogafale lona lua o le a faamautu ai potu mo togafitiga faapitoa mo gasegase eseese (Special Clinics) e pei o le potu mo le togafitia o taliga, isu ma le faa’i (ENT), o togafitiga o mata, ma’i suka, ma’i o le fatu ma isi gasegase faapitoa. O le fogafale lona tolu, ua faaagaaga le isi itu o le ofisa mo le pulega a le Ofisa o Auaunaga Tau le Soifua Maloloina, o le nofoaga tutotonu e faatautai ai aoaoga fa’aauau mo le aufaigaluega (Continuing Education), o potu e faaaoga e alo ma fanau o lo o ave mataupu tau fomai i le Iunivesete Aoao o Samoa, faapea potu fono e ofi ai tagata e oo atu i le to’a 400.

O lenei galuega tele o lo o faamoemoe e maea i le faaiuga o le tausaga nei. Na saunoa foi Leota, o isi fale lagolago o le vaega lona lua o le galuega e aofia ai le fale fausia mo gasegase o le mafaufau, o le fale e gasese ai taumafa ma le fale ta lavalava ua maea ona fausia. Na ia faaalia, toe o le falemaliu fou o lo o faagasolo ona fausia i le taimi nei ma o lo o faamoemoe e maea ia Oketopa.

MALIU INA TA LE ULU I LE TO’I

O se alii na tuuaia i lona fasiotia o le toalua o lona tuafafine i se to’i, ua faasalaina nei i le falepuipui mo le ono tausaga. O le faasalaga lea na tuuina atu e Faamasino Sili Patu Tiavaasue Falefatu Sapolu i le alii o Joe Nielsen mai le afioaga o Malie ina ua faamaonia lona moliaga o le fasioti tagata pa’ivalea.

O lea faasalaga e mafua mai i se faalavelave na tulai mai i le vaitaimi o le Kerisimasi o le 2011 lea e faapea na misa ai le tuafafine o Nielsen ma lona toalua, ao faalogo atu o ia i lea feeseeseaiga. Sa oso atu loa o ia ma se to’i ma ia taina ai le ao o le toalua o lona tuafafine. O le tuga tele o le manua na maliu ai lava o ia i lena taimi. Na finau le loia a Nielsen, le tamaitai o Tima Leavai, o le ua molia e faaletonu lona mafaufau ma ua faamaonia foi lea tulaga e se fomai o le mafaufau.

Sa faatonuina foi e le fomai ia leoleo ina ia faamautinoa e inu fualaau a le ua molia ma ia auina atu o ia i le falemai pe a faateteleina lona ma’i. Na molia muamua Nielsen i le moliaga o le fasioti tagata fuafuaina, ae na toe suia i le fasioti tagata pa’ivalea.

LAVEA LE PASIKA A LE LEOLEO

E 48 tausaga o se alii leoleo sinia ua faamalolo mo se vaitaimi ao faagasolo suesuega a leoleo i se faalavelave tau taavale sa aofia ai o ia. Na faamaonia mai e le komesina le tumau o leoleo, le susuga Fauono Talalelei Tapu e faapea, na molia lea alii leoleo ina ua ia le usitaia faatonuga a leoleo sa tiute i le po na tupu ai le faalavelave.

Na saunoa Fauono, o le alii leoleo ua faamalolo nei, sa auai i se fiafia ma nisi leoleo ma sa ia alu ese mai le nofoaga sa faia ai le pati i se pasika a leoleo ao faasua’ava o ia. Ina ua oo atu o ia i le afioaga o Vaiusu, sa faapea ona tifa ai loa i tua le pasika mai le auala ma lavea ai. E lei tuga ni ona manua ma ina ua oo atu alii leoleo sa tiute i lena po, sa la faatonuina o ia e feula le paluni e iloa ai le aofai o le ava malosi o lo o i totonu o le toto o le tagata. Peitai na musu lea alii.

Sa faapea loa ona faamalolo o ia mo se vaitaimi ao faagasolo suesuega i le mafuaga na ia faaaogaina ai le pasika a leoleo i lena afiafi. Na saunoa Fauono, e ono faaopopo moliaga faasaga i lea alii leoleo sinia. O le aso 23 o le masina nei ua faatulaga e tulai ai o ia i luma o le Faamasinoga.

Saunia: Lilomaiava Andrew Fa’asau, Naenae Productions