SUI TAUVA : “SA MA NONOFO AE LE’I NONOFO TELE”

O le tali lea a se tasi o tamaitai sa tauva i le sailiga o le Tausala Lalelei o Samoa na sei mavae atu nei. Na faateia nisi e masani i lea tamaitai faapea tagata o le nuu o lo o alala ai, ina ua vaaia o lo o aofia o ia i faasalalauga faalauiloa o tamaitai e toa sefulu sa tauva i le sailia le Tausala Lalelei o Samoa 2014-2015.

Na faaalia e se tasi e iloa lea tamaitai e faapea, e nonofo o ia ma se tasi o alii faipisinisi i le talafatai o le taulaga i le fale o lea alii. Sa fesiligia lea tamaitai e nisi o tusitala, ae sa teena muamua e ia lea tulaga. Peitai sa toe fesiligia o ia, ma sa ia ioeina ai loa e faapea sa fai lona toalua “ae le’i nonofo tele.”

O tuutuuga o le tauvaga o le Miss Samoa, o tamaitai uma e fia tauva, e tatau ona tagatanuu moni o Samoa, e lei faia sona aiga, ma e le o aofia foi i se mafutaga faaleulugalii ma se tane. Na faaalia e nisi e iloa lelei lea tamaitai, e le malamalama pe faapefea ona tauva lea tamaitai i le tauvaga, ma sa tatau lava i le komiti faafoe ona siaki lelei uma sui tauva pe lei fai ni o latou taitoalua faapouliuli. Sa fesiligia foi e le au tusitala le alii faipisinisi o lo o aafia i lea mataupu, peitai na tali o ia, e la te lei nonofo ma lea tamaitai.

Fai mai a ia, o lona alofa i le le lelei o le faiga e le aiga sa nofo ai lea tamaitai, na mafua ai ona ia aumaia faanofo i lona fale. Na saunoa lea alii, o lo o nofo totogi nei lea tamaitai i se tasi o ona fale.

FAIAIGA I TEINEITI E I AI MANAOGA FAAPITOA

Na teena e le afioga i le Faamasino Sili, le afioga Patu Tiavaasu’e Falefatu Sapolu i le aso ananafi, le talosaga ina ia tatala i tua e faatali ai lona faamasinoga, le alii o Vaiaoga Leatuvao, lea o lo o taofia nei e leoleo i lona faia o uiga mataga faafeusuaiga i ni teineiti se toafa e i ai manaoga faapitoa.

O lea talosaga na faaulu e le loia a le ua molia, le susuga Te’o Richard Faaiuaso. Peitai na finau malosi le loia a le malo, le susuga Precious Chang, e le tatau ona tatala i tua lea alii e faatali ai lona faamasinoga aua sa sola muamua foi ae na toe maua mai i Seattle i Amerika, lea na toe tipoti mai ai. E pei ona lipotia muamua foi e Tala Fou, o Leatuvao, e 37 tausaga o lona soifua sa faiaoga muamua i se aoga mo le fanau e i ai manaoga faapitoa, ma sa maua lona faia o uiga mataga faafeusuaiga i ia teineiti e toafa e i ai manaoga faapitoa, ina ua suesueina i latou.

Ae na sola lea alii i Amerika i le 2012. Na talia e Faamasino Sili Patu le finau a le loia a le malo ma ia teena ai le talosaga ina ia tatala i tua le ua molia e faatali ai lona faamasinoga lea e faia i le aso 15 o le masina nei.

PEPA ULUFALE MO LE AU TAPUAI A LE MANU

E 400 pepa ulufale o le vae i Uelegitone o le taamilosaga taitoafitu a le IRB o lo o loma nei, ua faaagaaga e faatau e i latou e lagolagoina le Manu Samoa Taitoafitu. O lea tulaga ua mafai ona o se maliliega i le va a le Ofisa o le Komesina Maualuga o Samoa i Niu Sila faapea le Iuni Lakapi a Uelegitone, ma le komiti faafoe o le taamilosaga i Uelegitone.

Na faaalia, o le aso 6 ma le aso 7 o Fepuari, 2015 o le a amatalia ai vae o le taamilosaga taitoafitu a le IRB i Ueligitone, lea ua faaigoaina o le IRB Wellington Hertz 7’s, ma o i latou o le a faatauina ia pepa o le a nonofo i le vaega e lata i le ogatotonu o le falematamata i le itu i matu, i laina nofoa e amata i le numera 24 ma le 25. O le tau o ia pepa ulufale mo aso e lua e $195 ma o lo o ofoina atu i soo se tasi e fia faatauina e le Ofisa o le Komesina Maualuga o Samoa i Niu Sila, ae faagata i le aso 24 o Oketopa, 2014.

O le tau lava lea e faatauina ai ia pepa ulufale pe a oo i le taimi e mafai ai ona faatau i luga o upega tafailagi i le aso 16 o Setema. E le tele ni pepa ma o i latou e muamua faatau a latou pepa o le a faamanuiaina. Mo nisi faamatalaga faafesootai le susuga Tiatia Tuaau o le ofisa o le Komesina Maualuga o Samoa  Niu Sila i le telefoni (04) 472 0953.

MALO TAUVAGA PESE, TAFAO I SAMOA

E toalima nisi o le mamalu o le atunuu e alala ma aumau ai i Sini, Ausetalia sa tafafao i Samoa nei i le Vaiaso o le Teuila ma o lo o mafuta fiafia nei ma o latou aiga, ina ua lautogia i se tauvaga pese sa faatautaia e le leitio o le LMS 96.6FM po o le Le Manamea Samoa 96.6FM. 

O i latou ia na ausia tulaga e fa pito i luga o June Crichton, Moefaauo Kepu, Makerita Toala Lupematasila, Vaivase Aukuso faapea le tamaitai aupito i laititi sa tauva o Sara Matai’a. Na saunoa mai le pule faatonu o le LMS 96.6FM, le susuga Sulusulumaivasa Leituala Aiva II, o le latou tauvaga pese o le Samoan Idol sa amata lava i luga o le telefoni seia oo ina maua le to’avalu sa sueina le siamupini i se tasi o hall, lea na faamanuiaina ai i latou ua latou malaga faatasi mai.

Sa faafiafia i latou ia i faafiafiaga sa faagasolo i luma o le maota o le malo i Matagialalua. Na saunoa Sulusulumaivasa,  o le latou tauvaga pese o le Samoan Idol e faia i tausaga taitasi e tali atu ai i le lagolago a le mamalu o le atunuu o lo o afifio ma papa aao ai i Sini, Ausetalia. O le vaiaso fou o lo o fuafua e toe taliu ai le faigamalaga.

Lilomaiava Andrew Fa’asau, Naenae Productions