Ads by Google Ads by Google

TALA MAi SAMOA

METOTISI FOU PE METOTISI FOUVALE?

 

E ui i le tumutumu o le laumua o le Ekalesia Metotisi i Faleula i ona sui mai Samoa nei ma atunuu i fafo ua autovaa atu mo le Koneferenisi o lenei tausaga aemaise o le faamanatuina o le atoaga o le 50 tausaga talu ona tutoatasi le koneferenisi a Samoa, e mautinoa ua i ai nisi o sui ua tulai ese mai le ekalesia, e pei ona i ai nisi o sui ua tulai ese ma faatuina sa latou lava ekalesia, lea ua faaigoaina o le Ekalesia Metotisi Fou a le Atua. Na tapa se finagalo o le afioga i le peresetene o le ekalesia, le susuga i le Faafeagaiga ia Aisoli Iuli i lea mataupu.

 

“E foliga mai e le o atoa le igoa o le ekalesia aua e tatau ona ou faaigoaina e le o Metotisi Fou ao Metotisi Fouvale,” o le saunoaga lea a le alii peresetene. “Aua o tagata tetee ia i tulafono ma le Faavae o le Ekalesia Metotisi.” Na ia faaalia, sa talanoaina lea mataupu i le Komiti Tumau a le ekalesia, ma sa toatele nisi o tama sa tetee i ai ona o le manumanu i le igoa. Fai mai a ia, e tai pei lava o se suafa matai, e pele i aiga. “Ae ia te a’u lava ia, e pule lava i latou ua faatuina lea ekalesia fou pe faaaoga,” o a Iuli lea.

 

“O le igoa Metotisi e le o se igoa fevaevaea’i. O le igoa foi o le igoa mai fafo. O lo’u agaga, talosia ae omai ia foi uso matou te patipatia le atoaga o le 50 tausaga o le Koneferenisi a Samoa. Ou te talia lelei.” O le masina na sei mavae atu nei na faataunuuina ai le sauniga muamua a le ekalesia fou ua faatuina nei, le Ekalesia Metotisi Fou a le Atua, i se fale a le kamupani a Ah Liki i Alafua. Sa taitaia lea sauniga e le susuga Petaia Setu, o se tasi sa avea ma faafeagaiga tausi matagaluega a le Ekalesia Metotisi I tausaga ua mavae.

 

FILIFILIA FAAMASINO KOMITI I SINEVA

 

Ua filifilia aloaia nei lana afioga i le Faamasino Vui Claraence Nelson, e fai ma sui o le Komiti o le Puipuiga o Aia Tatau o le Fanau, i lona ofisa tutotonu i Sineva. O le susuga Vui o se tasi lenei o sui o i ai tomai faapitoa i mataupu tau aia tatau o le fanau. E toa 18 o le a galulue i le faamalosia ma le tuufaatasia o tulafono talafeagai mo le aiaia o le feagaiga mo le puipuia o aia tatau o le fanau e pei ona aiaia ai i lalo o le o feagaiga a Malo Aufaatasi.

 

O ia tulaga uma, e aofia ai ma le mataituina lelei o mataupu eseese e aafia ai le fanau e pei o vevesiga ma sauaga i totonu o aiga, o le faatau faasolitulafonoina o le fanau, o le faaaogaina o fanau laiti e faataunuu ai manaoga mataga faafeusuaiga, faapea le faaaogaina o fanau e auai i ata e pue e le talafeagai, o lo o tapu i lalo o lenei feagaiga.

 

O le filifilia ai o le afioga ia Vui i lea komiti, ona o le tele o lona sao i le Faamasinoga i mataupu tau le puipuiga o fanau, e pei ona ia faama’iteina ai le faatuina o le toese mo alo ma fanau talavou i Olomanu, o se nofoaga e aoaoina ai le amio ma toefuataina ai le ola o tupulaga talavou ua solia le tulafono. Ae le gata i lea, o le toe iloiloina ai o le tulafono mo fanau mo le uluai taimi i le tulafono mo fanau laiti solitulafono i le 2007, o le uluai taimi foi lea ua i ai se tulafono faapenei i totonu o le Pasefika.

 

TAPENAGA MO LE AOINA O LE LAPISI

 

Ua galulue faatasi nei le Matagaluega o Punaoa Faalenatura ma le Siosiomaga, le Matagaluega o le Soifua Maloloina, le Pulega o TagataTafafao Maimoa mai Fafo, ma le faalapotopotoga o le SPREP, atoa ai male lala o Malo Aufaatasi mo le Puipuia o le Siosiomaga, i se faiga faapaaga e faatumauina ai le avea o Samoa ma se atunuu e mama ma matagofie mo le silasila maimoa a tagata tafafao maimoa mai fafo aemaise o sui usufono o le fono a atumotu laiti tau atia’e o le lalolagi. O lea faiga faapaaga o lo o taula’i i le pulea lelei ma le faamamaina o le otaota ma lapisi o le a lafoaia i le vaitaimi o lea fonotele, ma le faamoemoe e faaauau le faaleleia o lea auaunaga pe a maea le fono. Na aofia ai i lea fuafuaga le faamaumauina o le aofaiga o taga lapisi tetele na aoina mai le silia ma le 40 faletalimalo ma i si apitaga o le a faamautu ai le au usufono, faapea malae vaalele.

 

O ia faamaumauga na faatinoina i le masina o Mati ma na iloa ai, e i le va o le 7 i le 70 taga lapisi tetele e aoina mai i ia nofoaga i le vaiaso. O le vaiaso na te’a nei sa faia ai se faatasiga faaleaoaoga e faatulaga ai se fuafuaga alu mamao mo le pulea lelei ma le faamamaina o lapisi ma otaota lafoai mai ia nofoaga e le gata i le vaitaimi o le fonotaga i le masina fou, ae ia faaauau ai pea lea auaunaga I le lumanai aua le faamatagofieina atili o le atunuu aemaise o le soifua maloloina lautele.

 

SAUNI MO LE FAAMASINOGA O AIGA

 

O lo o faagasolo pea tapenaga a le Matagaluega o Faamasinoga e faasauni ai mo le faatuina o le Faamasinoga o Aiga po o le Family Court, ma o le aso ananafi na faataunuuina ai mo le taimi muamua le faatalanoaga e faatatau i mataupu e patino i lea faamoemoe. Sa auai i lea faatasiga le vasega o faamasino ma loia faapea sui o matagaluega a le malo ma faalapotopotoga tumaoti e fitoitonu i ai mataupu tau solitulafono ma sauaga i totonu o aiga.

 

O le afioga Faamasino Sili Patu Tiavaasu’e Falefatu Sapolu na tatalaina aloaia lea faatasiga, ma o le saunoaga autu na fofogaina lea e le tamaitai faamasino o le Faamasinoga Faaitumalo mai Niu Sila o Jan Marie Douge. Na saunoa le tamaitai faamasino i nisi o mataupu ua toe iloiloina i le faafoeina o faamasinoga o aiga i lona atunuu, e pei o le aveesea lea o le faamamafa mai le tuuina atu o faasalaga mamafa ia i latou e faamaonia a latou solitulafono, ina ia aofia ai ma polokalama mo le toe fuataina o ia tagata.

 

Lilomaiava Andrew Fa’asau, Naenae Productions