AVANOA LE OFISA $600,000 A FAUMUINA

Ua avanoa nei le ofisa sa fausia faapitoa mo le alii sa avea muamua ma minisita o Tupe, le afioga Faumuina Tiatia Liuga, i le maota o le SNPF Plaza i Apia mo so o se ofisa po o se kamupani e fia lisiina. O lea ofisa a Faumuina na tele ai foi le gugulu o le atunuu i lena vaitau ona o le tinoitupe e $600,000 a le malo na faaalu i lona fausiaina faapitoa, ae le i leva ona tatala le fale o le SNPF Plaza lea o lo o i ai i totonu.

Na faaalia e le pule o tautua faapisinisi a le SNPF, le susuga Tagaloasa Uili Matafeo, e le o toe faaaogaina lea ofisa ma ua avanoa nei mo so o se tasi e fia lisiina. O lea ofisa o lo o i le fogafale tolu o le SNPF Plaza, ma sa le toe faaaogaina talu ona faamavae Faumuina mai lona tofiga minisita o Tupe ia Aperila. E pei ona silafia, o lea faamavaega a Faumuina na mafua ona o le tele o mataupu e aofia ai le faaaogaina o tupe a le malo sa ia faafoeina, e aofia ai ma le $600,000 na faaalu i le fausia o lea ofisa.

FAITIOINA KAPETENI IA TUILAEPA

Ua faitiona e le kapeteni o le sa o le Uluai La O Le Talalelei mai le afioaga o Salelologa, o Fonoia Taifau Fonoia Molesi, ia le alii palemia, le susuga Tuilaepa Lupesoliai Sailele Malielegaoi, ona o le faaiuga a le komiti o faagatama o le tai o le tutoatasi, lea ua tulaga mulimuli ai le latou sa. Ua tuuaia e Fonoia ia Tuilaepa i lona fa’aauau i le sa o le Digicel Segavao.

Na faaalia e Fonoia i le au tusitala e faapea, sa tatau lava ona faaleaogaina le mua a le Digicel Segavao ona sa soso’a e le Segavao le taumuli o le latou sa ina ua oo atu le tuuga i gataifale o le maketi i Savalalo, lea na mafua ai ona filivaa ia sa e lua ma le mafai ai loa e le Uluai La O Le Talalelei ona faaauau le tuuga. Na saunoa Fonoia, na manino lava le solitulafono o le Digicel Segavao ina ua latou soso’aina le taumuli o lo latou sa ma sa tatau lava ona faasalaina e le komiti. Peitai na ia faaalia, ua le faia e le komiti lea faaiuga ona o le alii palemia o se totino o lea komiti.

“Sa le tatau lava ona aofia ai fua le alii palemia i lea komiti,” o le faagaulemalie lea a Fonoia. “Ua tatou iloa uma lava e au lava Tuilaepa i le Segavao aua o le sa a Siusega lea o lo o alala ai o ia. Ua le fetaui tele lea faaiuga ua faia e le komiti.” Fai mai a ia, o le a toe sauni mai le Uluai La O Le Talalelei i faagatama o le tai o le vaiaso o le Teuila.

MALILIU I FAALAVELAVE FAAFUASEI

E lua ni faalavelave faafuasei na tulai mai i le vaiaso nei ua maliliu ai ni alii se toalua. O le tasi o ia alii na maliu i le afioaga o Leulumoega ao le isi i le motu tele I Salafai. O le alii o Toa Aniseko Saufo’i, 26 tausaga lea na uma lona soifua i le faalavelave na tulai mai i Leulumoega i le po o le aso Lua na sei mavae atu nei. Na lipotia mai e faapea, sa agai atu Saufo’i i lona aiga i le auala e agai atu i Lefaga. E le o mautinoa pe na faasua’ava o ia, ae sa le mafai ona faaauau e lea alii lana savaliga i lona aiga ma sa moe ai loa o ia i luga o le auala.

Na faaalia, o se taavale sa malaga ane i lea auala sa faapea ona lavea ai lea alii ao moe i luga o le auala ma sa auina atu ai loa o ia i le falemai i Leulumoega. Peitai, na maliu ai lava o ia i lea po ona o le tuga o ona manua. O le faalavelave na tulai mai i Savaii na maliu ai se tamaititi aoga sa malaga u le pasi i le taeao o le aso Lua ma na lipotia mai e faapea, ina ua oo atu le pasi i se pioga i le afioaga o Fagasa, sa tuu ai i fafo le ulu o lea tamaititi i fafo o le faamalama o le pasi, ma sa fetaui tonu ma le taimi na see ane ai se tao fagota sa sili o le talivai o le pasi ma aafia ai lona mata. Sa faatopetope atu lea tamaititi i le falemai i Sataua, peitai, o le tuga tele o lona manua na iu ai lava ina maliu.

TUUMALO LE SUI TAMAITAI MUAMUA O LE PALEMENE

O le faaiuga o le vaiaso na te’a nei na faia ai toe sauniga o le tamaitai muamua na ofi atu i le Palemene o Samoa, le afioga Leaupepe Tauulapapa Faimaala Phillips. O le afioga Leaupepe na avea ma faipule o le Palemene i le tausaga 1970 mo le itumalo Palauli I Sisifo. O lenei tina sa filifilia i le tofi faipule ao galue o ia i le galuega faatausi soifua, ma sa lagolago malosi foi ia te ia lona alii, o se tasi foi o taitai iloga o le atunuu, le afioga Vaovasa Manaia Filipo.

Sa avea foi Leaupepe ma faamasino o le Faamasinoga o Fanua ma Suafa ina ua uma lana tautua i le Palemene. Sa auai le ao o le malo, le afioga Tui Atua Tupua Tamasese Efi ma le masiofo ia Filifilia, le alii palemia, le susuga Tuilaepa Lupesoliai Sailele Malielegaoi faapea sui o le malo i ona toe sauniga.

Lilomaiava Andrew Fa’asau, Naenae Productions