Ads by Google Ads by Google

TALA MAI SAMOA

LE FILIFILIA LE KAPETENI O LE MANU SAMOA, MANANAO I AI NIU SILA

Ua lipotia mai I Niu Sila le lagolagoina e le alii faiaoga o le laina I luma a le Olopeleki, le susuga Mike Cron, o se talosaga ina ia faatumau pea le konekarate a le kapeteni o le Manu Samoa ia Mahonri Schwalger lea ua le filifilia I le au a le atunuu, I le iuni lakapi a Niu Sila.

O se talosaga muamua lea ua tuuina atu I le iuni lakapi a Niu Sila e aafia ai se tama taalo mai se isi atunuu, ona o le tulaga lelei tele o lo o I ai le taalo a lea alo o le atunuu I le au a le Waikato Chiefs lea o lo I le pito I luga o le taamilosaga o le Super 15.

O le vaiaso nein a faailoa aloaia ai e le faiaoga fou a le Manu Samoa, le susuga Stephen Betham le lisi o tama taaalo o le a filifili mai ai le le au a le atunuu e faasauni mo le taamilosaga o le ipu o le pasefika, lea o le a taaalo ai ma au mai Fiti, Toga ma Iapani. E lei aofia ai le suafa o Schwalger I lea lisi ma na faaalia e Betham I se feiloaiga ma le au tusitala e faapea, o lo o taulai le silasila a le iuni lakapi a Samoa ma le latou taupulega I le isi ipu o le lalolagi I le 2015, ma o nisi o tama taaalo na taaalo I le taamilosaga o le ipu o le lalolagi o le 2011, e oo atu I le 2015 ua matutua ma ua le toe tutusa le latou taaalo. Fai mai a ia, o le susuga Mahonri Schwalger o se tasi o tama taaalo o lo o aofia ai I lea vaega, ma o le mafuaaga lea o le aofia ai o lona suafa.

Peitai ua faaalia e le faiaoga a le au o le Chiefs, le susuga Tom Coventry, e tele le tomai ma le agavaa o lo o ia Schwalger ma e tele sona sao I soo se au e taalo ai. Fai mai a ia, e le gata I lona tomai ma agavaa I le faatinoina o le taaloga, ae o ona uiga ma tomai faataitai o lo o latou faaaogaina e atinae ai le laina I luma o le latou au.

Na saunoa Coventry, o le mafuaaga lea ua latou manatu ai e taua le faatumau pea o le konekarate a lea alo o le atunuu ina ia mafai ai ona taalo pea I totonu o le iuni lakapi a Niu Sila, ma e ono mafai ona filifilia ai o ia mo le au a le Olopeleki. Na ia taua foi le tulaga ua I ai le lisi o le au a le Olopeleki o le a tuufaatasia nei lea na o Keven Mealamu ma Andrew Hore ua filifilia mo le tulaga o le hooker lea foi e taalo ai Schwalger.

Fai mai a ia, o le toe filifilia o Mealamu ma Hore e iloa ai e lei ausia e isi tama taaalo le agavaa o lo o moomia e filifilia ai I le au tele a Niu Sila ma o le tulaga lea o lo o ia manao ai ina ia faatumau pea le konekarate a Schwalger I Niu Sila ina ia oo atu I le isi ipu o le lalolagi ae o lo o mafai ona tapa I ai Niu Sila e taalo mo I latou.

FAASA ONA TOE FAATAUTAU NI FAAILOILO FAAPISINISI I LE UATI I APIA

Ua maea pasia e le kapeneta le faasaina ona toe tautau ni fu’a pe toe tautau ni fu’a po o ni fu’a faalauiloa I le tino po o autafa ane o le uati tele I Apia. Ua mafua lea faaiuga ona o le fia tausia lelei pea o le tulaga aloaia o lea mataaga taua o le tala faasolopito o Samoa o lo o I le ogatotonugalemu o le taulaga I Apia.

I se pepa o faamatalaga mai le ofisa o le Palemia ma le kapeneta na taua ai e faapea, ua matauina pea I vaiaso ua tuanai le soona taupe I le tino o le uati ma ona autafa ane o faailoilo o lo o tusia ai faamatalaga faalauiloa faapisinisi a nisi o kamupani I totonu o le atunuu. O nei vaaiga ua oia ai le mamalu ma le matagofie o lenei mata’aga ma ua le talafeagai ma le silasila a le mamalu o le atunuu.

VEVESI AUVAA O LE TELEFONI MA LE TOLOTOLO, FAAAOGA AGAESE

O lo o faaauau I le taimi nei ia suesuega a le matagaluega o leoleo I se faalavelave na tulai mai I le vaiaso na tea nei o lo o aafia ai ni alii mai ni auvaa fautasi e lua o lo o koleni ma faasauni aua faagatama I le tai mo le faamanatuina o le Iupeli Auro o le malo tutoatasi o Samoa. Na faaalia e le sui sooupu o le ofisa o leoleo, le susuga I le komesina lagolago ia Leaupepe Fatu Pula, o se o alii mai le auvaa a le Telefoni o le Vainuu mai Manono o lo o faataotolia I le maota gasegase I Motootua ona o ni manuaga tuga o lo o masalomia na mafua ona o se agaese.

Na faaalia e Leaupepe, o lea faalavelave na tulai mai I le aso Faraile o le vaiaso na tea nei ao feagai ai le auvaa a le Telefoni ma a latou koleniga, ae osofaia e nisi o le auvaa a le Tolotolo o le Tamauli mai Salelologa ma tulai ai loa lea faalavelave. Na ia taua, ua maea ona soalaupule lea mataupu e matai ma taitai o nei auvaa e lua. Peitai na faaalia e Leaupepe, o le a le tuua ai le tiute fai a le matagaluega o leoleo I le suesueina na aafia I lenei mataupu ma ave I le tulafono. E oo mai I le taimi nei e leai se tasi ua molia I lea faalavelave.

FILIFILIA LE TOA 60 E TAU MOLI I AUSETALIA

Ua maea filifilia nei tagata faigaluega e toa 60 mo le polokalama o galuega faavaitaimi I Ausetalia. E oo atu I le toa 15,000 I latou sa tusi talosaga mo ia avanoa faigaluega faavaitaimi I le umi e ono masina I le itu I sauté o Ausetalia mo le pikiina o moli. O le vaiaso fou o lo o faamoemoe e tuua ai e I latou nei le atunuu mo ia galuega taua tele.

O lo o I ai le faamoemoe e oo atu I le fuainumera o le 500 le aofaiga o tagata faigaluega mai Samoa nei o le a auina atu I Ausetalia e galulue ai I nei avanoa faigaluega le aumaua. I lana saunoaga faapitoa, na toe faamamafa e le alii palemia, le susuga Tuilaepa Sailele Malielegaoi, le taua o nei galuega aua le atianeina o aiga, nuu ma ekalesia ma sa ia toe faamanatu ia I latou o le a malaga atu le amio pulea ma ia toe foi uma mai pe a maea le taimi faatulagaina e galulue ai I Ausetalia.

FAATAUTO LEOLEO FOU E TOA 51

O le taeao o le aso Tofi na sei mavae atu nei na faataunuuina ai le sauniga e faatauto ai sui fou o le a avea ma malu o le malo. O le afioga I le tamaitai faamasino ia Mata Tuatagaloa sa faatautaia lea faatautoga ma e toa 51 sui o le vasega fou na faatautoina e tautua I le puipuiga o le saogalemu lautele I le matagaluega o leoleo ma falepuipui. Mai lea fuainumera, o le toaiva o tamaitai.

Na saunoa Faamasino Mata Tuatagaloa le taua tele o le galuega a malu o le malo aua o I latou e malu I ai le malo mo le puipuiga ma sa ia fautua foi I le au faauu, ina ia faamaoni I lo latou tiute tauave. E silia I le toa 200 alii ma tamaitai sa tusi talosaga I avanoa e faigaluega ai I le matagaluega o leoleo ma falepuipui, ae nao le toa 55 sa pasi atoatoa I suega tusitusi ma suega o le tino malosi e pei ona moomia I le galuega faaleoleo. O le toafa o lea fuainumera o I latou mai Toelau ma sa faapea foi ona faauu faatasi ai.

FALEPUIPUI MULIAGATELE RAPI TEVAGA I LE FA MA LE AFA TAUSAGA

E fa ma le afa tausaga o le a nofosala ai I le falepuipui ia Muliagatele Rapi Tevaga, lea sa avea ma ofisa sinia I le vaega o tupe a le pulega o malae vaalele I Faleolo. O le aso Lulu na sei mavae nei na lauina ai lona faasalaga I le faamasinoga maualuga I luma o Faamasino Pierre Slicer. E 19 moliaga ua faamaonia faasaga ia Muliagatele Rapi Tevaga I le gaoi ao avea ma tagata faigaluega. E silia ma le $20,000 le tupe a le pulega o le malae vaalele I Faleolo o lo o lipotia na faaaoga faasolitulafono e le ua molia nei.

O le vaiaso na tea nei na toe tolopo mai ai lea mataupu ona o se talosaga a le loia o lo o tulai mo le ua molia, le susuga Fepuleai Ameperosa Roma, lea sa ia talosagaina ai foi se faasalaga mama. Ao lei lauina lona faasalaga, sa faamamafa e Faamasino Pierre Slicer le taua o le faamaoni I soo se galuega e totofi I ai, aemaise I latou ua tofia I tofiga maualuluga I totonu o matagaluega a le malo faapea totonu o kamupani tumaoti.

MAEA LE TAOTOGA I LE TINO MALIU O LE ALII NA MALIU I TAUGAFANA I FALEATIU

I se feiloaiga a le au tusitala ma le pulega o le matagaluega o leoleo ma falepuipui I le amataga o le vaiaso nei, na faaalia ai e le sooupu a le matagaluega, le afioga I le komesina lagolago ia Leaupepe Fatu Pula e faapea, ua maea nei ona faatinoina le taotoga faapitoa I le tino maliu o le alii Faleatiu lea na maliu I le osofaiga a leoleo I le amataga o le vaiaso na tea nei. O le aso Toonai na tea nei na faatinoina ai lea taotoga faapitoa I le maota gasegase I Motootua e se alii fomai faapitoa mai fafo lea na talia na te faatinoina lea taotoga.

E pei ona silafia, o le taotoga na faia ina ia sailia ai le mafuaga o le maliu o le alii o Siimaloto Rapi I le pulufana lea e faapea na afaina ai lona ao, ma tali ai loa le fesili poo le pulufana a malu o le malo, poo se pulufana a se tasi lava o le aiga. Ua maea nei la lea taotoga faapitoa ma o lo o talia se taimi o I luma e maua mai ai le lipoti a le fomai suesue faapitoa ma faamautu ai tulaga uma e pei ona talia pea e le toatele, aemaise le aiga o lea alii I Faleatiu.

Na faaalia foi e le komesina lagolago, ua amata nei suesuega a le matagaluega o leoleo ma falepuipui I totonu lava o le matagaluega poo I ai se tasi na liki atu ai I fafo ni faamatalaga o le latou osofaiga na faatinoina I Faleatiu, ona o lo o masalomia lea tulaga. Fai mai a ia, I lipoti a leoleo na faatinoina le osofaiga, e taunuu atu, o lo o faatali mai I latou e le aiga faatasi ai ma nisi o le afioaga I laau malosi, lea sa latou faapapaina ma faamanulia ai ni alii leoleo se toatolu, toe faaleagaina ai mea totino a le malo.

Ua faailoa mai foi e faapea, o se taimi o I luma o le a agai atu ai le ofisa o leoleo I Faleatiu e faaauau a latou suesuega I lenei mataupu.