AEAU: “VAAI PU FAAPOLOKIKI I LE MALO”

Ua tali le sui taitai o le vaega faaupufai o le Tautua Samoa, le afioga Aeau Peniamina Leavai, i le saunoaga a le alii palemia, le susuga Tuilaepa Lupesoliai Sailele Malielegaoi, ina ia taula’i pea lana vaai i mataupu tau fa’i nifo ae tuu mataupu tau tupe i e sa aoaoina e gafa ma ia mataupu.

E pei ona silafia, ole afioga Aeau o se foma’i nifo ma na ia fausia se faaupuga faaperetania fou e tali atu ai i le saunoaga a le alii palemia. Fai mai a ia, e tatau i le alii palemia ona mata’itu lelei ia pu faapolokiki (political cavities) o lo o alia’e mai i totonu o lana faigamalo. “Ua fia ni tausaga o tulai mai pea faaletonu i totonu o le faigamalo?” o le fesili lea a Aeau.

“Afai e le o silafia e le alii palemia, o ai o le a foia ia faaletonu?” Na saunoa Aeau, ua atoa le 50 tausaga o lana tautua i le Palemene a Samoa, ae leai lava ni faitioga faasaga ia te ia, ae ua tatau ia Tuilaepa ona faia se faatatau i pu faapolokiki o lo o aafia ai le malo. Na ia faaalia, a le vave faia se togafitiga i ia faaletonu, o le a oo ina pala ma moomia le se’iina e pei lava o nifo o le tagata soifua.

TAMAITAI E LE ATOA LE MAFAUFAU

Ua faasalaina e le Faamasinoga Maualuga se alii talavou e 18 tausaga le matua i le falepuipui mo le iva masina ona o lona faiaiga ma se tamaitai e le atoatoa le malosi o le mafaufau e 31 tausaga. O lea solitulafono na tulai mai i le 2013, ao aoga le ua faasalaina, ae o le na aafia e nofo i le fale.

Na faaalia i faamaumauga a le Faamasinoga e faapea, o le va o le aso muamua o Aperila ma le aso 31 o Me, 2013 sa tulai mai ai lea solitulafono ma e faafa ona faiaiga i laua i lalo o niu o le fanua e tuaoi ma le fale o le ua aafia. O le masina o Oketopa, 2013 sa maitauina ai e le uso o le na aafia ua foliga ma’i o ia. Sa ia faamasinoina loa o ia ma sa ta’u ane e le na aafia ia la faigaaiga ma le ua faasalaina. Sa auina atu o ia i le falemai ma iloa ai ua ono masina o lona ma’itaga. Sa molia le ua faasalaina i moliaga e fa o le faiaiga faasolitulafono ma se e le atoatoa le malosi o le mafaufau. Sa teena muamua e ia ia moliaga. Peitai ina ua tuuina atu le faaiuga a foma’i, sa toe suia loa lana tali i le ioe. Na faaalia, ua uma ona faatoese le aiga o lea alii i le aiga o le na aafia, ma sa faasalaina foi e le latou nuu i le $500.

FAATAUA LE FUFULU MAMA O LIMA

O lima mama e sologa lelei ai le ola maloloina. O le autu lea o se faalauiloa a aoga tulaga lua uma a le itumalo Vaimauga i le vaiaso nei e faailo ai se fesoasoani o ni fasimoli mai se kamupani mai Fiti ua tauaaoina e ia aoga, mo le fufuluina mama lelei ai o lima o le fanau aoga, o faiaoga, matua ma tagata uma, aua le soifua maloloina lelei.

E oo atu i le afe fasimoli o le ituaiga o le Protex ua foai ane e le kamupani o le Colgate Palmolive mai Fiti, i aoga tulaga lua uma e ono i le itumalo o le Vaimauga, mo le faamalosia o le fanau ma tagata uma i le faaoga o fasimoli e fufulu ma fafano lelei ai lima i taimi uma. O lenei faamoemoe na faatautaia i le laumua o le Aoga Tulaga Lua a le afioaga o Magiagi, ma sa saunoa aloaia ai le afioga i le Ofisa Sili o Pulega o le Matagaluega o Aoga, Taaloga ma Aganuu, le afioga ia Matafeo Falanaipupu Tanielu Aiafi, ma faamamafa i le fanau, o taiulu o aoga, faiaoga ma matua, le taua o lenei faamoemoe o lo o latou galulue faatasi ai ma le vaega o Auaunaga Faasoifua maloloina, e tuuiitiia ma taofia ai le ono pepesi o siama feaveai i o tatou lima. Saunoa Matafeo ma ia toe faamanatu, o le mafuaaga tonu lea o le faamai mata lea na pepesi i le atunuu, o le lote o mata i lima ao le i fufuluina mama i se fasimoli.

Saunoa le sui o le kamupani mai Fiti, e oo atu i le $5,000 le tau o ia oloa ma le faamoemoe e fesoasoani mai pea i aoga a le atunuu, e le gata i Upolu nei i le agai atu i aoga i tua, ae faapea foi ma le motu tele i Salafai.

Saunia: Lilomaiava Andrew Fa’asau, Naenae Productions