TOFIA MINISITA FOU

Ua faavaeina nei se matagaluega fou a le malo ma ua tofia ai foi se minisita fou na te faatautaia. Na faatumulia le maota o Luafatasaga po o le maota lea e malolo i ai sui o le Palemene i taimi o tauaofiaga a le maota, i sui o le malo, sui o malo mai fafo, ma le mamalu o le atunuu sa autovaa atu e molimauina le tofia aloaia ma le faatautoina o se sui fou o le Kapeneta e suia le afioga Faumuina Tiatia Liuga, lea ua faamavae mai lona tofi minisita o Tupe.

Sa toatele i latou sa taumate po o ai o le a tofgia e le alii palemia, ma na faateia uma i latou ina ua faailoa mai e le susuga Tuilaepa Lupesoliai Sailele Malielegaoi, le tofia ai o le afioga i le alii faipule o le itumalo Satupaitea, le afioga Lautafi Fio Serafi Purcell, e avea ma sui o le Kapeneta. Na faailoa foi e le alii palemia, o le alii minisita fou ua tofia o le a ia vaaia le matagaluega fou ua faavaeina e gafa ma le pulea o nisi o faalapotopotoga a le malo e pei o le Komisi e Pulea le Aufaigaluega a le Malo (PSC), o le Ofisa o Fuainumera Faamauina, o le Ofisa o Eleele a Samoa (SLC), o le Pulega o Malae Taalo a Samoa (SSFA) ma le Pulega o Fale a le malo (SHA). I lana saunoaga, na faaalia ai e Tuilaepa, e to’a 13 sui o le Kapeneta – e to’a 10 mai Upolu ma le to’atolu mai Savaii.

“Ma ua alagatatau ai le tofia o se isi sui mai Salafai e suia le sui o Salafai ua faamavae, le afioga Faumuina,” a Tuilaepa lea. Sa faapea ona faatautoina le alii minisita fou i luma o le Ao o le Malo, le afioga Tui Atua Tupua Tamasese Efi. Ua see atu nei le Matagaluega o Tupe i lalo o le vaavaaiga a le alii palemia.

TOLOPO LE FAAMASINOGA O BRIAN LIMA

O le vaiaso ua te’a na faagasolo ai le faamasinoga o le alii lakapi lauiloa o Muliagatele Brian Lima, lea o lo o molia i moliaga o le faaoomanua tuga, o le lafo o mea faitino matautia ma le taufaamatau. E pei ona lipotia muamua i a tatou tala, o ia moliaga e mafua mai i se feeseeseaiga i le va o Muliagatele ma le tamaitai sa avea ma ona toalua faaipoipo, o Lemalu Sina Retzlaff i fafo o le falekalapu o le Y-Not i Matautu-tai i le tausaga na te’a nei. Sa molimau le tamaitai Lemalu i le vaiaso ua te’a ma ia faamatala ai lea faalavelave.

Fai mai a ia, sa la feosofi i totonu o le la taavale ma lana uo alii sa la tafafao i lea po, le alii o Sialofi, ae oo atu loa Muliagatele. Na molimau Lemalu sa ia vaaia foliga ataata o Muliagatele i le amataga o le la talanoaga. Sa fesili atu Muliagatele po o le alii lea ua la feoa’i, ma pe ua ia fetaui i o la alo. Sa tali o ia, ioe ua uma. Peitai sa faafuasei ona fesili atu Muliagatele, po o la faiaiga ma lea alii i luga o le la (Muliagatele ma Lemalu) moega. O le faafuasei o lea fesili sa toe fesili ai Lemalu po o le a le moega, ae amata loa ona tatu’i e Muliagatele o ia ma lana uo. Ua toe tolo nei e Faamasino Ida Malosi lea faamasinoga i le aso 7 o Me.

TALOSAGA LOIA MO SALA TUPE

Ua talosaga loia o lo o tulai mo le alii sui palemia, le tofa Fonotoe Nuafesili Pierre Lauofo ma le alii minisita lagolago ia Muagututagata Peter Ah Him, i le Faamasinoga ina ia tuuina atu ni faasalaga tupe. E pei ona lipoti muamua, ua faamaonia nei le moliaga e tasi o le faalavelave i galuega a leoleo faasaga ia Fonotoe, ae faamaonia le moliaga e tasi o le le usitaia o tulaga moomia i le feulaina o le masini e iloa ai le aofaiga o le ava malosi i le tino o le tagata faasaga ia Muagututagata.

Na vali e le alii loia o Donald Kerslake lea o lo o tulai mo Fonotoe, se ata felanulanua’i o le alii sui palemia i lana talosaga i le afioga Faamasino Vaepule Vaemoa Vaai. Fai mai a ia, o Fonotoe o lo o ia tauaveina le tofiga lona lua i le faasologa o tofiga o le malo, e tasi le tausaga sa faigaluega ai i le Ofisa o le Komesina Maualuga o Niu Sila, o se alii loia, o se matai Samoa, o le sui o le itumalo faaalalafaga o Anoamaa, o se sui o le Sosaiete o Loia a Samoa ma o se tama e toafa lana fanau.

Peitai e lei avaga ai le tofa a le afioga i le alii faamasino. Na saunoa Vaepule, e le avea le tulaga maualuga ua i ai I le malo e avea ma ‘alofaga mai le solitulafono sa tulai mai ma e le ‘alo foi le tulafono. Sa tulai foi le loia a Muagututagata, le susuga Patrick Fepuleai ma ia talosagaina se sala tupe e $200 mo le alii minisita lagolago. Ua tolopoina nei le lauina o a la faasalaga i le aso 13 o Me.

Saunia: Lilomaiava Andrew Fa’asau, Naenae Productions