TALA MAi SAMOA

MALIU SE TAMA TANUMIA I LE LOLI

 

E 29 tausaga o se tama mai le afioaga o Toamua o Sola Peti na maliu ina ua tanumia i se loli la’u uta e 12 pa’u.

 

O lea faalavelave na tulai mai i le amataga o le vaiaso ua te’a i Manono-uta. Na faaalia e le komesina le tumau o leoleo, le afioga Fauono Talalelei Tapu e faapea, o le ua maliu sa faigaluega i le kamupani o le Alafua Transport ma sa malaga atu o ia ma se isi alii la te faigaluega e ave se masini sua auala i Manono-uta i le aso Gafua ua te’a. Ina ua maea ona tuu le masini sua auala, sa faaalu loa le loli e le ave loli o le a toe foi i Apia, ma lona le iloa o lo o tamoe atu le ua molia e tuli atu le loli.

 

Na saunoa Fauono, sa faapea lava le ave loli e nofo le ua maliu e vaai le masini sua auala ma faatoa ia faatuina lava le loli ina ua faalogo o lo o i ai se mea o lo o lavea ai pa’u o le loli. Sa ia oso i fafo e vaai po o le a lea mea ma ia iloa ai, o lona uso a faigaluega lea ua maliu ina ua alu ai i luga le loli. E lei faauluina ni moliaga faasaga i le ave loli ae o lo o faaauau pea suesuega a leoleo.

 

FAUMUINA MO MALO AUFAATASI

 

Ua faaalia e le afioga Faumuina Tiatia Liuga lea na faamavae aloaia mai lona tofiga minisita o Tupe i le faaiuga o le vaiaso nei e faapea, o le a ia talia se talosaga a Malo Aufaatasi pe afai e toe manaomia o ia e tauaveina se tofiga i lea faalapotopotoga faavaomalo. Na faailoa e Faumuina i talanoaga ma le au tusitala e faapea, e faalua pe faatolu ona fesootai mai Malo Aufaatasi ia te ia mo galuega sa moomia ai o ia.

 

Peitai sa ia teena ia talosaga ona o lona fia tautua pea mo Samoa. “Ae a toe fesootai mai i le taimi nei, ou te talia,” o le faaaliga lea a Faumuina. O le aso Tofi na sei mavae atu nei na taloina ai e Faumuina se feiloaiga ma le au tusitala ma le au faasalalau ina ua maea ona faamavae aloaia mai lona tofiga faaminisita i le po o le aso Lulu. Sa faamalamalama ai e Faumuina i lea feiloaiga ia mafuaaga o lona faamavae mai lea tofiga, ma na ia faaalia, o lona manao e tuu atu le avanoa i se isi sui o le Palemene e tautua ai i lea tofiga, na mafua ai ona faamavae. Na ia teena o le lipoti a le Suetusi Sili ua mafua ai ona faamave.

 

“Ua leva ona ou tatalo mo se tali i lea mataupu ma o le tali o lou faamave,” o a Faumuina lea. Na fesiligia o ia pe toe tauva i le faiga palota lautele o le 2016 ma sa tali o ia o lea mataupu e faalagolago i se finagalo a lona itumalo. Fai mai a ia, afai ae toe tauva, o le a ia malie e tumau ai o se sui a faipule o le Palemene. “Seiloga e finagalo le alii palemia e i ai se isi tofi ou te aoga ai.”

 

ONO FAASALA TUSITALA

 

O lo o suesueina nei e le komiti faapitoa a le Palemene mo le tuuina atu o se fautuaga i se gaioiga e faia e le Fono Aoao faasaga i nusipepa ma uaealesi faasalalau sa latou faailoaina faalauteleina le lipoti a le Suetusi Sili, ae lei talanoaina e le Palemene. E pei ona silafia, o lea lipoti na tuuaia ai le minisita o Tupe, le afioga Faumuina Tiatia Liuga, i faiga faaalatua ma le le amiotonu ao avea o ia ma minisita o le ofisa o fanua a le atunuu, le Samoa Land Corporation.

 

O lea mataupu ua iu ai lava ina faamavae le alii minisita i le vaiaso ua te’a. Ae lei talanoaina lea lipoti i le po o le aso Lulu na te’a mei, e pe a ma le afa itula na alu i le tau faamalamalamaina e le fofoga fetalai o lea mataupu. Na saunoa Laaulialemalietoa Leuatea Polataivao, e solitulafono le lolomiina o le lipoti a le Suetusi Sili i nusipepa ma e ui sa ia tusi i Faatonu o ia nusipepa ina ia aua nei toe lolomiina, ae sa lolomi e ia nusipepa ni tusitusiga faasaga ia te ia. Fai mai a ia, sa tuuaia le fofoga fetalai ma le Palemene i ia tusitusiga i tuuaiga e faapea e le mananao e faalauiloa lea lipoti ona o lo o taumafai ufiufi mea piopio.

 

Na tapa e le fofoga fetalai se fautuaga a le Loia Sili i lea mataupu, ma na faamaonia e le Loia Sili le solitulafono o le faalauiloaina o lea lipoti ae lei soalaupuleina e le Palemene.

 

Lilomaiava Andrew Fa’asau, Naenae Productions

Comment Here