Ads by Google Ads by Google

TALA MAi SAMOA

FAAMAVAE FAUMUINA TIATIA LIUGA

 

Ua faamavae aloaia le afioga Faumuina Tiatia Liuga mai lona tofiga minisita o Tupe a le malo. O taualumaga a le Palemene i le po o le aso Lulu na sei mavae atu i le lata o le vaeluaga o le po, na faalauiloa aloaia ai e Faumuina lana faamavaega ina ua maea lana folasaga umi e pe a ma le lua ma le afa itula, lea sa ia taumafai ai e faamalamalama ana gaioiga na faia ao avea ma minisita o Tupe lea na taua i le lipoti a le Suetusi Sili.

 

Na ia taua le tele o faaiuga a le kapeneta na faavae ai ana gaioiga ma sa ia faamalulu i le fono ma le atunuu pe afai ua avea lona naunau e faaleleia le tamaoaiga o le atunuu ma tulaga ua fesiligia ai ana gaioiga e nisi. Na ia faafetaia foi le alii palemia mo lona faatuatuaina o ia i lea tofiga taua ma sa ia tapa foi le faamagaloga a le palemene ma le atunuu pe afai ua lape le faatinoina o ona tiute. Na saunoa le alii palemia, le susuga Tuilaepa Lupesoliai Sailele Malielegaoi, ma ia talia aloaia le faamavaega a le alii minisita, ma sa ia faafetaia foi le afioga Faumuina mo lona sao i le malo ma le atunuu ao avea o ia ma minisita mo le 14 tausaga ua mavae.

 

Na faasilasila e Tuilaepa, o le aso 25 o Aperila, 2014 o le a faailoa aloaia ai le suafa o le faipule o le a ia tauaveina le tofi minisita o Tupe.

 

TULAFONO O FAIGA PALOTA

 

O le tele o faitioga a sui faipule mai itu e lua o le Palemene na mafua ai ona toe tolo le pasiaina o teuteuga tau faatu i le Tulafono o Faiga Palota 2014, ma na faatuina e le alii palemia le mau ina ia tuuina atu lea pili tau faaofi i le komiti o pili mo le iloiloina i le maea ai o le faitauga lona lua.

 

O se tasi o teuteuga na faatuina e aofia ai le suia o sui faipule palota taitoatasi i ni itumalo fou se lua (urban constituencies). Na tetee malosi le taitai o le vaega faaupufai o le Tautua Samoa, le afioga Palusalue Faapo II, i ia teuteuga ma sa ia tuuaia le malo i le taumafai e faatopetope le pasia o ia teuteuga.

 

O le isi teuteuga faatu e tuuina atu ai le 12 masina i sui tauva i le faiga palota pe a maea le palota, e fai ai a latou o’o i o latou itumalo ma tagata palota. E pei ona silafia, o lea mataupu ua tele faamasinoga ua faia ai ma faaleaogaina ai le faaiuga o le faiga palota mo nisi sa pale mai.

 

TELE FAALETONU I LE TOESE

 

O le lipoti a le Komisi Suesue Faapitoa – e aofia ana fautuaga i le tele o faaletonu i le toese i Tafaigata, ua pasia uma e le kapeneta. Na taua i lea lipoti e 75 itulau le tele o faaletonu i le pulega ma le faagaioiga o le toese, faapea faiga le amiotonu ma amioga le talafeagai e le gata i pagota ae faapea foi o leoleo i le toese. I se faaaliga aloaia mai le Ofisa o le Palemia, na taua ai e le susuga Tuilaepa Lupesoliai Sailele Malielegaoi e faapea, o lo o aofia ai i teuteuga o le Tulafono a Leoleo na pasia e le Palemene i le tausaga na te’a nei ia taiala ma aulape e foia ai ia faaletonu ma vaivaiga uma.

 

Fai mai a ia, ua vaeluaina ai foi le pulega ma le faagaioiga o toese uma i Samoa mai le Matagaluega o Leoleo. Na saunoa le alii palemia, e le o toe mamao se taimi ona tofia loa lea o le pulega ma ofisa e pulea ma faagaioia toese i totonu o le atunuu ina ia mautinoa ai le faaleleia o tulaga uma e pei ona taua i le lipoti a le komisi ma ia taulai ai a latou galuega i le faaleleia o olaga o i latou uma e taofia i toese.

 

VAELUAINA LE FAASALAGA

 

O le talosaga a le tama o se alii talavou na molia i le tulafono i le gaoi ma le talepe fale, na toe vaeluaina ai le umi o lona faasalaga i le falepuipui. Na tulai lea alii e 17 tausaga i le Faamasinoga Faaitumalo i le aso Faraile na te’a nei mo le lauina o lona faasalaga ma sa faatonuina e le afioga Faamasino Mata Tuatagaloa, ina ia auina atu o ia i le falepuipui ona lona faia pea o lea solitulafono.

 

E $3,890 le tau atoa o oloa na gaoi e le ua molia, le alii o Sonny Stowers. Na faaalia i le Faamasinoga e faapea, o le taimi muamua lea ua molia ai Stowers. Peitai na fesiligia e Faamasino Tuatagaloa lea faaaliga ona fai mai a ia, sa ia vaai muamua le igoa o lea alii i nisi o mataupu sa oo atu i ona luma. Sa suesueina loa ma iloa ai, sa molia muamua foi lea alii i moliaga lava o le gaoi ma le talepe fale, ma sa faasalaina i lona faia o galuega mo le lautele. Na saunoa le tamaitai faamasino, e foliga mai e lei aoaoina lava le mafaufau o lea alii ma sa faapea ona ia faasalaina ai o ia i le lua ma le afa tausaga i le toese.

 

Peitai, sa toe talosaga lava le tama o le ua molia ma ia talosagaina le Faamasinoga pe mafai ona toe iloilo le faasalaga o lona atalii ona nao ia o lo o faigaluega ma e faamoemoe i ai le latou aiga. Na tali Faamasino Tuatagaloa, e le toe suia le faaiuga ma o le toese lava e iu i ai le ua molia. Ae sa ia toe aveesea le tasi ma le afa tausaga mai lona faasalaga ma ua faasalaina ai nei o ia i le tausaga e tasi.

 

Lilomaiava Andrew Fa’asau, Naenae Productions