TALA MAi SAMOA

MOLIA LE PAGOTA I MARIUANA

 

E 32 tausaga o se alii pagota e igoa ia Steward Moala mai Faleasiu ua molia nei i le umia o le laau faasaina o le mariuana. Na faaalia e le komesina le tumau o leoleo, le afioga Fauono Talalelei Tapu e faapea, o le afiafi o le aso Tofi o le vaiaso na te’a nei na faalogoina ai e le leoleo sa tiute i lea afiafi se taavale o paka i se auala i tua atu o le falepuipui lata i le afioaga o Falelauniu.

 

Sa masalomia o lea taavale sa auina ane ai mariuana i pagota. Sa faapea ona suesueina e leoleo ia pagota sa masalomia ma maua ai ni sikaleti mariuana se tolu i le alii pagota o Steward Moala. O le taeao o le aso Faraile na sosoo ai sa lipotia ai loa lea pagota i le ofisa autu o leoleo i Apia. Ua toe loka nei Moala ma o lo o talia le taimi e tulai ai i luma o le Faamasinoga.

 

SAOGALEMU PEA PASI LAUPAPA – L.T.A.

 

E leai ni fuafuaga a le Pulega o Felauaiga i le Laueleele (L.T.A.) e faasaina le faaaogaina o pasi laupapa mo femalagaiga a le mamalu lautele o le atunuu. “O pasi laupapa uma o lo o i ai nei o le a faaaogaina pea i femalagaiga a le mamalu o le atunuu seiloga lava ua oo ina faaletonu ma ua le toe saogalemu mo femalagaiga lautele,” o le faamalamalamaga lena a le ofisa sili o pulega o le L.T.A., le susuga Leasi Galuvao.

 

O le 2011 ina ua tulai mai ni faalavelave tau taavale na lavevea ai ni pasi laupapa, sa faailoa ai e le malo le latou fuafuaga e aveesea uma ia ituaiga pasi. Peitai ua tolu nei tausaga e lei taunuu lea fuafuaga. O le taimi nei e 129 le aofaiga o pasi laupapa ua resitalaina i Upolu, ae 40 i Savaii. Na saunoa Leasi, faatoa faasaina lava ona toe faaaogaina pasi laupapa mai femalagaiga lautele, pe afai ua faaletonu ma ua le toe saogalemu foi mo le mamalu o le atunuu.

 

“FAI LAU GALUEGA, FAI FO’I LA’U GALUEGA”

 

“O lea ou te manuia ma o lo o mafai ona fai la’u galuega, ma ua tatau foi ona fai le galuega a le taitai o le Itu Agai,” o le lapataiga lea a Fofoga Fetalai Laaulialemalietoa Leuatea Polataivao i le taitai o le vaega faaupufai o le Tautua Samoa, le afioga Palusalue Faapo II. Ae lei tolopoina taualumaga a le Palemene i le faaiuga o le masina na tea nei, na faitioina ai e Palusalue le fofoga fetalai i lona le tuuina atu o se avanoa e faia ai fesili a sui o le Tautua e faatatau i faiga faaalatua i nisi o matagaluega a le malo na taua i le lipoti a le komiti faapitoa a le Palemene.

 

Na faaaoga e le fofoga fetalai le Tulafono Tumau 44 lea e mafai ai ona faaaoga lona malosiaga e suia ai le pepa o le faasologa o galuega a le maota. Na saunoa Palusalue, o lea suiga na le mafai ai ona faia a latou fesili i lea mataupu, ma o le a le toe agavaa nei ia fesili pe a toe fai i le vaiaso fou pe a toe tauaofia le Palemene. Fai mai a ia, e foliga mai o se faiga a le malo e ‘alo ese mai ai i le taliina o ia fesili. Peitai na faaalia e le fofoga fetalai, e tutusa lelei lava le faasea a Palusalue ma le tama fusu e faasea i le laufali ao fai le fusuaga.

 

UUNAIA LE TOTOINA O LAAU

 

O lo o galulue faatasi nei le Matagaluega o Faatoaga ma Faigafaiva, faapea ai ma le Matagaluega o Punaoa Faalenatura ma le Siosiomaga, i le uunaia malosi o nuu ma afioaga i le totoina o laau. O le sini o lea faamoemoe, e le gata ia toto laau, a ia faapea foi ona sa’o ma talafeagai ituaiga o laau toto e agai le atunuu e atiae, faatasi ma vaomatua e tua i ai afioaga ma alalafaga i tua maota ma laoa.

 

Ua faagasolo atu nei lea polokalame a ia matagaluega e lua a le malo ma a latou paaga i le itumalo o Safata, e faailo tonu ituaiga laau e ao ona toto ma faasaoina, ma metotia eseese o lo o faaogaina e ola lauusiusi ai ia laau ma faaitiitia ai o latou aafiaga i manu ma iniseti faalafua. E finagalo le malo e ala i ia matagaluega, le tatau ona tofu lava o le afioaga ma le fale laau, ma ia faaleleia atili fale laau i afioaga ua maea faatuina ai, aua a ola lelei laau i vaomatua, o le faatumauina foi lea o le lelei mo tagata, ma le faatumauina ai pea o punaoa faalenatura.

 

Lilomaiava Andrew Fa’asau, Naenae Productions

Comment Here