FANAU MAI LE PEPE E LUA ULU

Ua fanau mai se pepe teine i le afioaga o Nofoalii ma e foliga mai e lua ona ulu, ona e pipii le isi patu i tua o le muliulu ma ua lua ulu ua vaaia i si nei pepe teine. O lenei pepe ua faaigoaina ia Anastasia Anthony ma na faaalia e lona tina, o le aso 13 o Mati na fanau ai o ia.

Na faailoa e lea tina, o lana tama muamua lea ma sa malosi lana o ia i le taimi na fanau mai ai. E lei i ai foi sona manatu o le a oo si ana tama i lea tulaga. Na saunoa le tina, o lo o talia pepa o lo o faagaioi e le falemai e mafai ai ona ave i Niu Sila lea alualutoto ona e le mafai ona togafitia i Samoa. Na ia taua foi, o lo o toatele sui o le latou aiga o lo o alala i Niu Sila ma ua ofoina mai le latou fesoasoani e mafai ai ona avatu Anastasia mo togafitiga pe afai e tuai le faagasologa o pepa moomia e auina atu ai o ia i Niu Sila.

Na faamamafa e lea tina, o le tulaga ua i ai le ulu o si ana tama, ua pau lava o foafoaga a le Silisili Ese, ma ua na o se patu e mafai lava ona togafitia i Niu Sila pe a faia se taotoga faapitoa.

MALIU SE PEPE E 5 MASINA

O lo o suesueina nei e leoleo le maliu o se pepe e lima masina le matua o lo o masalomia na faaoo e se tasi le oti ia te ia, ina ua maua ni totolia i tua o lona ua. O lo o faia nei se taotoga faapitoa o lea pepe e suesue ai le mafuaaga o lona maliu. Na lipotia mai e faapea, o lenei pepe na vaetama e se ulugalii mai le afioaga o Samatau. Peitai, sa toe oo atu lea ulugalii i le tina moni o le pepe ma toe faafoi atu lenei alualutoto ina ua mavae vaiaso e tolu.

O le tina moni o le pepe e na o le 17 tausaga, a o le aso 23 o Mati, 2014 na toe faafoi atu le pepe. Na faaalia, sa maitauina e le tina moni o lea pepe ni totolia i tua o lona ua, ma o le aso na sosoo ai na maliu ai loa lea pepe. O lo o masalomia e le tina moni o lea pepe na faaoolima i lea alualutoto le ulugalii sa la vaetamaina o ia. O lo o faaauau pea suesuega a leoleo.

MALIU LE TAITAI LEOLEO

O le vaiaso lenei na maliu ai se tasi o alii leoleo ua loa tausaga o lana tautua i le Matagaluega o Leoleo ma Falepuipui, le susuga Lesa Galuo Lutz Arnulf Keil, Jr., ma na manatua o ia e sui o le matagaluega o se taitai leoleo filemu, loto maualalo ma le tautua faamaoni. O ona uiga foi ia na manatua ai o ia e le sui o vaegaau o le Malini a Amerika, ao tautua ai o ia i tausaga ua mavae.

O le susuga Igafo Maria B. Va’a na fai ma sui o le faalapotopotoga o fitafita tuai a Amerika sa tautua i taua i atunuu ese (Veterans of Foreign Wars) i Amerika Samoa, ma sa malaga faapitoa mai o ia e auai i toe sauniga o le susuga Lesa. Na molimau foi le alii satini litaea o le Malini a Amerika, le susuga Laufiso Tasi Fomai ma ia faamatala le tele o le fesoasoani a Lesa ia te ia ina ua faatoa ulufale i le Malini.

Sa tautua Lesa Galuo Lutz Arnulf Keil, Jr. i  Malini a Amerika mai ia Novema 1976 seia oo ia Aukuso 1980. Sa molimau foi le komesina le tumau o leoleo, le afioga Fauono Talalelei Tapu ma ia faaalia, o Lutz o se e tuuavanoa tele i tagata, ma sa faalagolago i ai le matagaluega i lona tomai e faasoa atu i sui fou o le matagaluega, lea na galue ai mo le 32 tausaga. O lo o soifua pea lona faletua o Mandy Skelton Keil ma o la alo.

FALEPUIPUI SE TINA MA ONA MATUA

E 22 tausaga o se tina ua faasalaina nei I le falepuipui faatasi ma ona matua, ina ua ioe o ia i le moliaga o le umia o fualaau faasaina.

O le amataga o le vaiaso nei na faasalaina ai ia Valerie Baby Toiloto i le tolu tausaga i le falepuipui. Na faamaonia foi le moliaga o le umia o fualaau faasaina faasaga i lona tuagane o Petelo Toiloto ma ua faanofovaavaaia nei o ia mo le 12 masina faapea le faatinoina o tautua mo le lautele mo le 100 itula. Ina ua lauina e Faamasino Vui Clarence Nelson o la faasalaga, sa ia faamanatu ia i laua, o lo o tuli faasalaga a o la matua i le falepuipui ona o lea lava moliaga. Na molia Valerie ma Petelo i le fale a lo latou aiga i Savalalo i le tausaga na tea nei ina ua osofaia e leoleo ma maua ai le laau faasaina o le mariuana.

O le eseesega i o la faasalaga sa fuaina lea i le aofai o mariuana sa maua ia i laua. Na maua e leoleo le 166.8 kalama o le mariuana ma sikaleti mariuana e 230 faapea se tinoitupe ia Valerie, ae na o le ono sikaleti mariuana na maua ia Petelo.

Lilomaiava Andrew Fa’asau, Naenae Productions