Ads by Google Ads by Google

TALA MAi SAMOA

TUUMALO PERESETENE ASOSI SOKA

 

O le aso Lulu na maua ai le tala faanoanoa i le tuumalo o le afioga i le Peresetene o le Asosi Soka a Samoa, le afioga ia Savae Togia Toetu Petana i le maota gasegase tele i Motootua, sa faataotolia ai o ia i sona gasegase. Na faailoa mai e le afioga i le tamaitai pule o le Asosi Soka a Samoa, le susuga ia Sarai Bareman, le tulaga faanoanoa ua i ai le pulega ma le aufaigaluega i lenei tala faanoanoa.

 

E le tau fesiligia le tele o le sao o lenei foi tamalii i le atinaega o le taaloga soka i le atunuu, ae faapea ai foi le itulagi nei ma le lalolagi, aemaise o lana kalapu soka i le afioaga o Vaivase tai. O le tausaga e 2011 na filifilia ai Savae e avea ma Peresetene o le Asosi, i le na taimi na toe taumafai mai ai le tuufaatasia o le asosi soka a le atunuu, ma filifilia ai foi o se sui totino o le Komiti Faafoe o le asosi soka a le itulagi nei po o le Oceania.

 

Sa galue foi le afioga ia Savae i nisi o komiti autu a le Faalapotopotoga Soka a le Lalolagi le FIFA, e aofia ai le komiti o tapenaga mo taaloga olimipeka o lenei taaloga aupito i lauiloa ile lalolagi.

 

SII TOTOGI O FAIAOGA

 

Ua faamaonia nei e le kapeneta le siitia ai o totogi o faiaoga a le malo, e pei ona tuuina atu ai se talosaga e le afioga i le minisita ma le Matagaluega o Aoga, Taaloga ma Aganuu. O lenei tulaga ua o se fatu e pa’u i eleele lelei i finagalo o nisi o faiaoga na auai i se mafutaga a faiaoga faato’a faauuina mai i le Iunivesete Aoao o Samoa i le Papaigalagala i le aso Lulu na sei mavae atu, lea na toe faaauau i le aso ananafi i le maota fono a Samoa i le maota o le Tui Atua Tupua Tamasese Efi i Sogi.

 

E le i mautu tonu mai le aofaiga o lea siitaga peitai, na faailoa mai e le afioga i le minisita o le matagaluega, le afioga ia Magele Mauiliu Magele, o taumafaiga uma ia a le malo e fesoasoani ma tuuina atu ai avanoa mo le siitia o tomai ma faailoga o faiaoga, e pei foi ona i ai ni avanoa sikolasipi ua lagolagoina ai e le malo ma le Iunivesete o le Pasefika i Saute, le 60 avanoa mo faiaoga i mataupu faa-saienisi, e faia ai o latou faailoga tikeri.

 

TULAGA O TUPE PEPA TUAI

 

Ua faailoa aloaia mai nei e le Faletupe Tutotonu o Samoa, le le toe taliaina ai o tupe pepa tuai ma o le a le toe faaogaina amata atu i le aso 30 o le masina fou o Me. O tupe pepa tuai o le a le toe taliaina ma o le a le toe I ai se aoga, o tupe pepa ia e i tua atu o le tausaga e 2008, a o le i faalauiloa ma faaogaina tupe pepa fou o loo I ai nei.

 

Na faailoa mai e le Faletupe Tutotonu, ua silia nei I le lima tausaga talu ona taumafai e taofia le faaogaina o tupe pepa tuai. Sa i ai foi le taimi na faagata ai peitai, o le taimi ua faailoa mai nei, le aso 30 o Me, o le taimi faaiu lea e faagata ai le toe auina atu i totonu o tupe pepa tuai e fesuiai i tupe pepa fou, ma o le a le toe i ai foi so latou aoga. Faailoa mai e le Faletupe Tutotonu, o lo o maitauina pea le tele o tupe pepa tuai o lo o faaogaina i tua i le taimi nei, ma o lo o faatagaina pea i le taimi nei, seia oo i le aso 30 o le masina fou, sei vagana ai le 2 tala tupe pepa ua le o toe aoga lava, lea ua suia i le tupe apa.

 

O lo o faatagaina foi e le tele o faletupe faapea faleoloa, le fesuiai o tupe pepa tuai i le taimi nei. O tupe pepa tuai e aofia ai le lima tala, sefulu tala, lua sefulu tala, lima sefulu tala ma le selau tala. O tupe apa uma foi po o tupe siliva, ua le o toe i ai lava se tupe siliva tuai o toe faaogaina ma faatagaina foi talu ona faagataina i le 2012, ina ua faalauiloa tupe siliva fou i le 2011.

 

MALIU SE TAMA I SAVAII

 

O lo o faatinoina nei suesuega a le Matagaluega o Leoleo ma Falepuipui i le mataupu o le maliu mai ai o se tama i le motu tele i Salafai i le amataga o le vaiaso nei. O lea mataupu na tulai mai i le afioaga o Asau, e faapea o se fagotaga a nisi o tama o le afioaga i le po o le Aso Sa na malemo ai le tama ua maliu, ae faatoa maua lona tino maliu i le vaveao o le aso Lulu na sei mavae atu nei i gatai ane o le afioaga o Vaisala. Faaalia e le afioga I le Komesina Lagolago ia Fauono Talalelei Tapu le faatinoina ai o suesuega i lenei mataupu.

 

Saunia: Lilomaiava Andrew Fa’asau, Naenae Productions