Ads by Google Ads by Google

TALA MAi SAMOA

MATA’ITU KAMUPANI FAI AUALA

 

Na fautuaina e le Komiti o Galuega, Felauaiga ma le Siosiomaga a le Palemene i lana lipoti mo le tausaga faaletupe o le 2010, ia le Pulega o Felauaiga I Luga o le Laueleele (L.T.A.) ina ia mata’itu ma le toto’a ia kamupani o lo o faatinoina konekarate mo le fausiaina o auala, ina ia mautinoa le tulaga lelei ma anagata o ia galuega ma ia le leaga gofie pe a faaletonu le tau.

 

O lea fautuaga a le komiti i le L.T.A. ua faia ina ia mautinoa ai le tulaga lelei o auala pe a oo i taimi o timuga mamafa faapea le uia o ia auala e loli la’u uta tetele i aso uma. Na fautuaina foi le faaititia o patupatu i luga o auala.

 

E le gata i lea o le faaauau pea o saini ma faailoilo i tafaala e fesoasoani i ave taavale. Na faaalia e le komiti, e silia ma le $1 miliona tala ia tupe na aoina mai sala a ave taavale, ae o lo tulai mai pea le faafitauli o le ta’u o faamatalaga sese e ave taavale i le aufaigaluega a le L.T.A.

 

TAFANA LE AUFAIGALUEGA

 

Ua molia se alii mai Vaigaga ina ua tulai ma se feeseeseaiga i lo la va ma se alii e faigaluega i le pamu kesi i Vailoa, Faleata i le aso Toonai na te’a nei. Na lipotia mai le pa’ilima o ia alii ma sa faapea ona se’i e le ua molia se tamai laau malosi ma ia tafanaina ai le aufaigaluega a lea pamu kesi.

 

Na faaalia, na toatamai le ua molia ina ua so’a e se tasi o le aufaigaluega a’o utu le kesi o lana taavale i le pamu a Meredith i Vailoa, Faleata. E leai se isi na manu’a ina ua tafana e le ua molia. Ua taofia nei e leoleo lea alii e 27 tausaga mai Vaigaga. Na saunoa le komesina le tumau o leoleo, le afioga Fauono Talalelei Tapu, faapea na ita le ua molia ina ua so’a e le alii faigaluega o le pamu kesi ao utu le kesi o lana taavale ma sa ia se’i loa le tama’i laau ma faasiilima ai lea alii.

 

Sa vaovao lea alii ma sa oso i lana taavale ma alu ese atu. Peitai sa toe liliu mai o ia ina ua oo atu i Vaiusu, ma sa toe foi mai o ia ma tu i le isi ituala mai le pamu kesi, ona ia tafanaina lea o le aufaigaluega. O le taimi lena ua tamomoe solo le aufaigaluega e lalafi mai lea alii ma sa iu ina toe ale ese le ua molia. O lo o taofia nei o ia e leoleo ao tau sailia le tama’i laau malosi na ia faaaogaina.

 

TALIA FAIAOGA FAITIOGA

 

Ua talia e le faiaoga e le au lakapi taitoafitu ale Manu Samoa, le susuga Viliamu Punivalu, ia faitioga a le toatele o le atunuu ona o le faaletonu o le tulaga na i ai le taumafai a le Manu Samoa i vae e lua o le taamilosaga taitoafitu a le IRB i Iapani ma Hong Kong.

 

Na maitauina le pa’u maualalo o le taaalo a tama o le Manu Samoa lea na iu ina faamo’amo’a ai e le au a Iapani e 42 i le 12 i le taamilosaga na faia i Iapani ae lei oo atu i le vae i Hong Kong. I se faatalanoaga ma le au tusitala i le vaiaso nei, na faailoa ai e le alii faiaoga e faapea, o le mafuaaga na pa’u ai le taumafai a le au ona o le toatele o tama na filifilia, faato’a oo lea i se taamilosaga faavaomalo.

 

Fai mai a ia, o le le avanoa o Alatasi Tupou, Tulolo Tulolo ma Lilo Lolo na mafua ai ona filifilia i latou sa tauaveina le au i ia vae e lua o le taamilosaga. Na saunoa Punivalu, so o se au lava e fou tama taaalo, e le mafai ona o atu loa faamoemoe e ausia se siamupini i le tulaga ua i ai tauvaga faavaomalo i lenei vaitau. Na ia taua, sa ausia uma e tama na filifilia tulaga moomia i le manava ma tomai i le faatinoina o le taaloga.

 

Peitai, na meia i latou ina ua taaalo ai mo le taimi muamua i se tauvaga faavaomalo faapea, ona o le le lava o tapenaga o le mafaufau. “Pau lava lea o le mea e le mafai e le faiaoga ona pulea,” o a Punivalu lea. “O le tulaga o mafaufau o tama taaalo.” Na ia faaalia, na te talia faitioga a le atunuu ma o le a ia taumafai foi e faaleleia le au a le atunuu.

 

KOMESINA MA LE PULE O LE TOESE

 

Na faailoa e le alii palemia, le susuga Tuilaepa Lupesoliai Sailele Malielegaoi, i lana feiloaiga ma le au tusitala i le faaiuga o le vaiaso na tea nei, le talia o le faaiuga a le Kapeneta i le lipoti a le komiti suesue faapitoa lea sa taitaifono ai le Komesina o Sulufaiga, i tuuaiga o faiga le amiotonu faasaga i le komesina o leoleo, le afioga Lilomaiava Fou Taioalo ma le pule o le toese, le afioga Sala Seaga Uili.

 

Na saunoa Tuilaepa, o le vaiaso nei e tatau ona faailoa faalauaitele ai le faaiuga a le Kapeneta ia i laua o lo o tuuaia i lea mataupu.Na faaalia e le loia sili, le susuga Aumua Ming Leung Wai, o lo o iloiloina e le Kapeneta lea lipoti i le taimi nei ma seiloga lava e faia se latou faaiuga, faatoa faalauiloa faalauaitele lea lipoti.

 

Saunia: Lilomaiava Andrew Fa’asau, Naenae Productions