TALA MAi SAMOA

PULE I LE OLA I LE AFU TELE

 

O lo o ua taoto nei i le maota gasegase i Motootua le tino maliu o se tane na saili ma maua mai e le vaega o faalavelave faafuasei a le Pulega o Tinei Mu i le ta’ele o le afu tele i Tiavi i le afiafi aso Gafua na sei mavae atu nei. O le tumutumuga o lea afu tele o lo o faaigoaina o le Papapapaitai Falls, e i talaane o le aualatele ma o lo o avea o se mataaga, po o se nofoaga e afea e turisi ma le toatele i le itu taumatau pe a agai atu i Apia nei, ma maimoa ai le afu tele o lo o i le isi itu o le vanu.

 

Na faailoa mai e le aiga o lo o faafesagai tonu ma lea nofoaga, pe tusa o le itula e lua i le aoauli o le aso Gafua, na iloa ane ai e le tina o le aiga le agai atu o le taavale o le ituaiga o le Suzuki mai i Apia ma afea lea nofoaga ma agai sa’o ai loa ma tofu i lalo o le vanu e ui atu i autafa o le pa puipui sima o lo o i ai. Na taunuu atu le vaega o faalavelave faafuasei i le va o le 2 ma le 3 i le aoauli ina ua latou maua le valaau, ma faagasolo ai loa a latou taumafaiga e sopo atu i lalo o le vanu lea e pe a ma le 200 mita le maualalo.

 

Na faamaonia mai e sui o le aufaigaluega sa sopoina le vanu e faapea, e oo atu ua maliu lea alii ma faatoa oo ane i luga i latou ma lona tino maliu i le te’a o le fitu i le afiafi. O lo o faaauau suesuega a leoleo i lea faalavelave.

 

MOLIA PU’E O ATA O FEUSUAIGA

 

Ua ioe i le Faamasinoga Faaitumalo se alii mai le afioaga o Vailuutai i lona pueina o se ata video o i laua ma sana uo teine o faiaiga i se faletalimalo i Apia, e aunoa ma le iloa e le tamaitai na aafia. Sa tetee muamua le alii o Tautua Pualilo, 27 tausaga i lea moliaga.

 

Peitai, ina ua tulai o ia i luma o Faamasino Faaitumalo Mata Tuatagaloa, mo le iloiloina o lea mataupu, sa toe sui lana tali ma sa ioe ai e ia lona moliaga. Na faaalia i faamaumauga a le Faamasinoga e faapea, o le va o le aso muamua ma le aso 31 o Iulai, 2013 na pueina ai e le ua molia se ata video o i laua ma se tamaitai sa fai se la faigauo o faiaiga i se faletalimalo.

 

O lea ata na faasalalau e le ua molia o nisi e masani ai i luga o telefoni feaveai. Na saunoa le tamaitai faamasino, e le o ni amioga ia a se alii Samoa e i ai ni ona tuafafine, ma e lagona foi e ia le le fiafia ae fai e se tagata lea tulaga i sona tuafafine. Sa faapea ona faatonuina e le tamaitai faamasino le itu a leoleo ina ia saunia se lipoti i aafiaga o lenei mataupu i le tamaitai na aafia, faapea se lipoti faanofovaavaaia. O le aso 16 o Aperila ua faatulagaina e lauina ai le faasalaga o Pualilo.

 

OLOA GAOSI I LE AVOKA

 

Na faalauiloa e le minisita o Alamanuia Faalenatura ma le Siosiomaga, le afioga Faamoetauloa Dr. Faale Tumaalii, i tauaofiaga a le palemene i le vaiaso na te’a nei e faapea, ua maea ona sainia se Feagaiga o le Malamalamaaga (Memorandum of Understanding) mo le faatauina atu o oloa e gaosia mai le avoka i le nofoaga o le Faalapotopotoga Faasaienisi (SROS) i Nafanua.

 

Peitai e lei faalauiloaina e le alii minisita le auiliiliga o lea feagaiga seia faamautu ma faamaonia lea feagaiga ma kamupani mai fafo o lo o fia faatauina atu ia oloa gaosi a le atunuu. Na faaalia foi e Faamoetauloa, e lua ni kamupani mai fafo – o le tasi mai Niu Sila ma le isi mai Farani, o lo o fia faatauina atu le falaoamata ua latou gaosia mai le ulu, ona o le tulaga lelei o lea ituaiga falaoamata i le gaseseina o taumafa. E le gata i lea, na saunoa foi le alii minisita, o lo o faagasolo i le taimi nei ia taumafaiga a sui mai Samoa ma Amerika Samoa i se fuafua alu mamao mo le faatauina atu o lea falaoamata i Amerika. Fai mai a ia, o le fesoasoani tele ia oloa gaosi a le atunuu i le faaleleia atili o le tamaoaiga o Samoa.

 

LELEI TAPENAGA O LE FONO

 

Ua faailoa mai nei e le Komiti o Tapenaga a le malo mo le taligamalo i le Fono Tele a Atu Motu Laiti Tau Atiae o le Lalolagi ia Setema, le tulaga ua i ai tapenaga mo lea fono tele faavaomalo. I tapenaga ua i ai nei ua faamautu mai, o le aso Sa, 31 o Aukuso, o le a faia ai le tatalaga aloaia faaleaganuu o lea fonotaga.

 

O le afiafi o le aso e sosoo ai, le aso muamua o Setema, o le a talimalo ai le malo i le taumafataga o lea afiafi mo taitai uma o malo o le a auai mai. I le tulaga i galuega i le fausia o fale fono i le nofoaga o fale taalo i Tuanaimato, ua lipotia mai le sologa lelei o ia galuega.

 

Lilomaiava Andrew Fa’asau, Naenae Productions

Comment Here