LEOLEO A SAMOA MA NIU SILA

O lo o galulue faatasi leoleo i Samoa ma Niu Sila i le tau sailia ma le tuuina atu i le tulafono, o se alii Samoa o lo o tuuaia i lona ave faagaoi o alagatupe sa faaagaaga mo se polokalama faasao mo alamanuia o le sami i itumalo Aleipata ma Safata. O lea tulaga na faamaonia e le minisita o Alamanuia Faalenatura ma le Siosiomaga, le afioga Faamoetauloa Ulaitino Faale Tumaalii i tauaofiaga a le Palemene i le aso Lua.

O lea mataupu na laga e le taitaifono o le komiti faapalemene mo Alamanuia Faalenatura ma le Siosiomaga, le afioga Tusa Misi Tupuola, ina ua talanoaina le latou lipoti i le faatinoga o matafaioi a le matagaluega. Na ia faaalia, o le o lo o tuuaia i lenei mataupu ua atoa nei le tolu tausaga talu ona alala ma lona aiga i Niu Sila. Na saunoa Tusa, e pe a ma le $140,000 le tinoitupe ua toesea ma ua tuuina atu i leoleo lea mataupu. O le polokalama faasao sa faaagaaga ai lenei tinoitupe sa amata faagasolo i le 1996, ae o le va o le 2005 ma le 2009 na amata toesea ai e le ua tuuaia ia tupe.

Na faaalia e se sui o lea polokalama, o le aofaiga sa’o ua toesea e silia ma le $300,000 ae le $140,000 e pei ona taua i le lipoti a le komiti a le palemene. O le ua tuuaia sa faigaluega muamua i le Matagaluega o Alamanuia Faalenatura ma le Siosiomaga.

TAPUNIA FOI AOGA A EKALESIA

Ua tapunia le tumau nei nisi foi o aoga a le Ekalesia Katoliko, ona o le pepesi o le faama’i o fofoga. O le vaiaso atoa lenei o lo o malolo uma ai aoga a le malo ona o lea tulaga i faama’i mata, e pei ona i ai fautuaga a le Matagaluega o le Soifua Maloloina.

O se tulaga fo’i na faailoa mai ai e le Sui Faatonu Sili o aoga a le Ekaelsia Faapotopotoga Kerisiano i Samoa, le susuga ia Makesi Ilai, i le amataga o le vaiaso, le malolo ai foi o aoga uma a le Ekalesia Faapotopotoga Kerisiano i Samoa. Ae i aoga a le Katoliko, faailoa mai e le afioga i le Faatonu Sili o Aoga a lea Ekalesia le afioga ia Aeau Chris Hazelman, o nisi o aoga ua malolo nei, e aofia ai le Kolisi o Sagato Iosefo, o le Aoga Tulaga Lua a Sagata Maria i Savalalo, ma le Aoga Tulaga Lua i Leauvaa.

AUAUNAGA FAAMAMA TOTO

O le a ono oo atu i maota gasegase i itumalo le auaunaga o le faamamaina o le toto, mo le mamalu lautele o atunuu. O se tasi lea o manulauti a le Faalapotopotoga o Fatugao a Samoa, e pei ona iai se tulafono taufaaofi mo le teuteuga o le tulafono o loo iai, e mafai ai ona faatino lea auaunaga i se taimi o i luma mo o tatou tagata.

O le taimi nei o loo faatinoina lea auaunaga, i le nofoaga tutotonu a le Faalapotopotoga i Maota Gasegase tele i Motootua, faapea ai sina vaega i Tuasivi i Savaii. Pe tusa ma le 25 masini faamama toto o loo iai ile Falamai tele, ma le 7 i Tuasivi, o loo togafitia ai le oo atu ile 75 o gasegase ile taimi nei.

FAAMANUIAGA MO AIGA SAVAII

O le a faamanuiaina nei le silia ile 80 aiga ile motu tele i Salafai, i ni tane vai ma isi mea totino mo le faatoaina o le suavai, i afioaga e 4 e aofia ai Falealupo, Auala, Asau ma Sapapalii. O le faaiuga o le vaiaso nei, o le a tauaaoina ai e nei afioaga ni tane vai fou lava e tai 3,500 lita, e faatoa ai suavai timu.

O le a mafai ai foi ona faasoa atu ia suavai faatoa, i le silia ile 3,300 tagata i totonu o nei lava afioaga, o le a siitia ai ile 87,000 lita o suavai o le a mafai ona faatoaina e ia afioaga, faatusa atu ile taimi nei. O ia aseta ma atinae ua mafai ona faatutuina i nei afioaga ile motu tele, ona o le fesoasoani mai o le malo tele o Amerika, i le latou polokalame o Atinae poo le USAID, e faasino tonu ia fesoasoani mo afioaga tulata ile sami.

O loo galulue faatasi le malo tele o Amerika, ma le tatou malo, e tauala ile Matagaluega o Tina ma Tamaitai, Atinae o Nuu, Afioaga ma Agafesootai, ile tuufaatasia o lenei faamoemoe. Ua maea ona faatautaia aoaoga faapitoa mo sui o afioaga.

Saunia: Lilomaiava Andrew Fa’asau, Naenae Productions