TALA MAi SAMOA

AUINA ATU TUILAEPA I NIU SILA

 

Ua auina atu i Niu Sila le alii palemia, le susuga Tuilaepa Lupesoliai Sailele Malielegaoi, mo le sailia o se togafitiga faaopopo i le manua i lona vae, e pei ona faamaonia mai e le fofoga fetalai o le maota, le afioga La’aulialemalietoa Leuatea Polataivao.

 

Na ia faaalia, na malaga atu le alii palemia i le po o le aso Sa na te’a nei. O lo o malaga faatasi o ia ma lona faletua i Gillian, o se fomai tomai faapitoa e lei faalauiloa mai lona suafa, o lana fomai ma le minisita o le Soifua Maloloina, Tuitama Dr. Leao Tuitama. O lo o malaga faatasi ai foi le ofisa sili o pulega o le Matagaluega o le Palemia, le susuga Vaosa Epa ma lana faafeao, le susuga Satini Rapi. Na saunoa le fofoga fetalai, o lo o i ai le fuafuaga e tasi le vaiaso o le a faataotolia ai le alii palemia i Niu Sila ina ia mautinoa e foia le aafiaga ua aafia ai le manua o lona vae.

 

“O lo o momoli mai alofaaga o le alii palemia i le nusipepa o le Samoa Observer,” o le saunoaga lea a le fofoga fetalai ma na ia faamanino, o le tala lava lea a le alii palemia sa fai atu ia te ia ae lei malaga atu i Niu Sila.

 

FAALALA PULE A LE FOFOGA FETALAI

 

Na faamanatu e le fofoga fetalai, le afioga La’aulialemalietoa Leuatea Polataivao, i tauaofiaga a le Palemene i le amataga o le vaiaso nei e faapea, o le faagaioiga o le Palemene e faia faatatau i le “pule” ua tuuina atu ia te ia.

 

“O le tatou matafaioi o le tuu atu o mea uma i le Atua, ae a oo loa i le fuafuaina o polokalama i totonu o le Maota, o le pule lena a a’u,” o le saunoaga manino lea a le fofoga fetalai. O lea saunoaga a le fofoga fetalai na tali atu ai i fesili na laga e le taitai o le vaega faaupufai o le Tautua Samoa, le afioga Palusalue Faapo II, e faatatau i tautinoga a le malo e talanoaina i le tauaofiaga o lo o faagasolo nei i le lipoti a le Komiti a Ofisa o le Palemene, lea sa latou faamaonia ai faiga faaalatua i nisi o matagaluega a le malo o lo o aafia ai le minisita o Tupe, e pei ona taua i le lipoti a le Su’etusi Sili. Faatoa amata tauaofiaga a le Palemene ae laga loa e Palusalue lea mataupu ma na ia fesiligia pe aisea ua le aofia ai i le lisi o galuega a le fono lea mataupu.

 

“Ou te famanatu atu, o lo o faatali le atunuu e faalogo i le talanoaina o lea lipoti ma faiga faaalatua o lo o taua ai ma ua ma’ea foi ona faamaonia e le Komiti a Ofisa o le Palemene. “O le a le mea ua tupu?” o le fesili lea a Palusalue. “O tatou faatali seia toe foi mai le alii palemia?” Peitai na tali le fofoga fetalai, e le moni lea tulaga ma sa tatau i le taitai o le Itu Agai ona silasila lelei i le pepa o lo o lisi ai galuega a le maota. Sa toe tagai Palusalue i le kopi o le lisi o galuega ma ia toe fesiligia le fofoga fetalai, pe aisea ua faamulimuli ai lea mataupu. Sa uma le onosai o le fofoga fetalai ma ia faatonuina Palusalue e alala i lalo ma sa ia faaalia, e tuu atu ia te ia le fuafuaina o galuega a le Maota ma e le oge aso le Atua.

 

MOLIA LE PULENUU I LE TAGOTAGO

 

E 45 tausaga o se alii pulenuu na faamaonia i le Faamasinoga Faaitumalo i le vaiaso na te’a nei lona moliaga o le tagotago i le tino o se teineititi 15 tausaga, ao sii lea teineititi i ona vae ona o le tumu o le pasi sa la malaga ai. Na faaalia i faamaumauga a leoleo e faapea, na logoina i latou e le teineititi na aafia sa sii o ia i le ua molia ma ona o le pogisa o lena taimi i le vaveao, sa tagotago ai le ua molia i lona fatafata, ma sa ia taumafai e aveese lima o le ua molia.

 

Sa tetee le ua molia i tuuaiga faasaga ia te ia ma na ia faaalia, e le mafai ona ia faia se mea faapea ona e i ai foi lana fanau. Peitai na teena Faamasino Vaepule lea manatu a le ua molia ma ia faaalia, ua faamaonia e le Faamasinoga lona moliaga. O le vaiaso nei o le a faailoa ai le faaiuga a le ua molia.

 

OSOFA’IA FALE AOGA

 

Ua maitauina le aafia o lotoa ma faleaoga I osofaiga a le au talepe fale I lenei vaitaimi pe a fua i suesuega o lo o faagasolo nei e leoleo. E le i leva nei na osofaia ai e le au talepe fale ma le au gaoi ia nisi o aoga e pei o le Kolisi o Samoa, Kolisio Uesiliana ma le aoga o matata eseese o le APTC ma aveesea ai komipiuta feaveai po o laptops ma isi masini e alu i le uila.

 

O nisi o ia aseta e toe faatau atu i se tau maualalo ao isi e teu e ia tagata. Na saunoa le komesina le tumau o leoleo, le susuga Fauono Talalelei Tapu, o le tulaga sa i ai na o fale o aiga sa osofaia e ia tagata. Peitai ua maitauina le faatupulaia o lotoa o aoga ma faleaoga ua osofaia ma gaoia ai le tele o mea totino.

 

Saunia:Lilomaiava Andrew Fa’asau, Naenae Productions

Comment Here