Ads by Google Ads by Google

TALA MAI SAMOA

FAUTUAINA E TUILAEPA LE FOLIGA ATAATA MA LE TAUSAAFIA

Ua fautuaina malosi e le Palemia Tuilaepa Sailele Malielegaoi le aufaigaluega i le malae vaalele faavaomalo i Faleolo ina ia faaalia foliga ataata ma le tausaafia ina ia faatosina mai ai tagata tafafao maimoa mai i Samoa. O lea fautuaga o lo o i se tusi mai le alii palemia, o ia foi o le minisita o Turisi, o lo o ia faitioina malosi ai foliga vaaia o tagata e faigaluega i le malae vaalele.

O lea tusi na auina atu i le ofisa sili o le ofisa o femalagaiga, le susuga Togatalima Faafouina Milford, ae kopi i le pulega o tagata tafafao maimoa mai i le atunuu, o le ofisa o le tiute, o le matagaluega o faatoaga, matagaluega o le soifua maloloina, minisita o le kapeneta ma le taitaifono o le komisi e pulea tagata faigaluega a le malo. Na faaulutalaina le tusi, “Smiles at the Airport” (Foliga Ataata i le Malae Vaalele) ma na faaalia e le alii palemia e faapea, “O se fautuaga taua tele a Travel Agents ia sa i Samoa nei i le vaiaso talu ai, o tagata mai ofisa ia e serve i le malae vaalele, o ni tagata mata faau’u, auleaga, mata faasiasia, pupula-a-lalo, mata masalosalo, matamata ita, foliga o ni tagata fe’a’ai, u’u e pei e lei ta’e’ele ma isi lava mau soanauna. Ae ua lava ia tala e atagia ai e tele isi galuega e tatau ona tatou faia i o tatou foliga e faafeiloai atu ai turisi.”

Na fautuaina e Tuilaepa le faia o ni “polokalamae a tou matagaluega e aoao ai ituaiga ataata eseese – ataata sagisagi faatosina, ataata fiafia, faatagata ua malo I le lotto, ataata faamaela, ataata lilivau toetoe ina a tago atu e fela’u, ataata vale ina ua maua le pepelo,

ataata taufaalili. E afe ma afe ituaiga ataata. Ona faaaoga lea o le ata e talafeagai ma le taimi ma sui ai foliga o tatou ia e serve I le malae vaalele.” Na toe faamanatu e Tuilaepa, “e oo mai I Samoa le turisi ua tele mau foliga tausaafia ua vaai I ai. Ae a oo mai ae fetaui ma foliga la ia faau’u o le aufaigaluega, na o le toe fia ninimo I fafo o turisi le mea a tatou e maua ma avatu ai I fafo ma o tatou tala I foliga o outou ma oti ai lava ma le tatou tourism industry. Amata nei loa lava le mata ataata.”

FALEPUIPUI TOLUONO FETI MO LE 5 TAUSAGA 6 MASINA

Ua faasalaina nei I le falepuipui e le faamasinoga maualuga le sa avea ma se tasi o faipule o le palemene, le tofa Toluono Feti, ina ua faamaonia ona moliaga e 15 o le taufaasese, sainia faamalosi ni pepa o se fanua I se auala faasolitulafono, ua avea ai o ia ma tagata na autu I ai ia faiga le talafeagai I le silasila a le faamasinoga. Ua faasalaina nei la Toluono Feti i le falepuipui mo le lima tausaga ma le ono masina.

O moliaga faasaga ia te ia e faatatau lea I lona faatauina o ni fanua umia saoloto se lua a ni tina se toalua ma o la aiga o lo o aumau I Niu Sila. Na saunoa le afioga i le faamasino, e fai lava si maualuga o tomai faaleaoaoga o le tofa ia Toluono lea sa avea ai o ia ma ofisa sili o le faalapotopotoga malosi faaeletise mo tausaga e 13.

O le tamaitai sa galulue faatasi ma Toluono i le faatinoina o ia solitulafono, o Vaselisa Stowers, sa ia ioeina ona moliaga i le tausaga ua tuanai ma ua tatala nei o ia i tua mai le toese i luga o le palola ina ua maea ona tuliina le afa o lona faasalaga. O se uluai taimi lenei ua fofogaina ai i luma o le faamasinoga ni moliaga faasolitulafono e uiga i le faamalosia o ni pepa o se fanua mai se e ana ia aseta. Ua faaalia e le loia na tulai mo Toluono, le susuga Toleafoa Solomona Toailoa i luga o uaealesi faasalalau a Niu Sila lana fuafuaga e toe apili le faaiuga ma le faasalaga ua tuuina mai e le faamasinoga.

PEPESI LE FIVA TAIFOI I LE TOESE I TAFAIGATA

O lo o suesueina nei e le matagaluega o le soifua maloloina le mafuaaga o le pepesi o le fiva taifoi I totonu o le toese I Tafaigata ina ua faamaonia le oo atu I le toasefulu pagota ua maua ai I lea gasegase.

O lo o togafitia e fomai ia pagota I totonu lava o le toese ona o le popolega ina nei pepesi solo pe auina ane I le falemai. Ua faaalia e se tasi o alii fomai o le matagaluega o le soifua maloloina le susuga Leausa Tolefoa Dr. Take Naseri, ua maua I suesuega le tulaga le mama o le tulaga o le suavai taumafa o lo o auina ane I le toese. Na ia taua foi e faapea, o lo o silasila le faatinoina o suesuega I itu tau tumama ma le saogalemu lelei o le siosiomaga o le toese.

FAALEAOGA MOLIAGA FAASAGA IA LEMALU SINA RETZLAFF

Na faaleaoga e le faamasinoga faaitumalo ananafi ia moliaga e valu faasaga ia Lemalu Sina Retzlaff, o se tasi o tamaitai fai pisinisi iloga I le atunuu, lea sa nonofo ma le uigi tautaua a le Manu Samoa, le susuga Muliagatele Brian Lima. Sa faatautaia lea mataupu e le afioga Faamasino Vaepule Vaemoa Vaai. Sa tulai mo Lemalu le tamaitai loia tumaoti o Brenda Heather-Latu ma e 10 moliaga na uluai faauluina faasaga ia te ia. E lima moliaga o le taufaasese ma isi moliaga e lima o lona faaaogaina o ia pepa taufaasese. Peitai na toe faaui I tua I le vaiaso nei isi moliaga e lua.

Na tulai le loia a leoleo I le aso ananafi I le faamasinoga ma ia faailoa atu e faapea, ua malie le o lo o tagi, le susuga Muliagatele Brian Lima, e toe faaui I tua lana tagi ma o le mafuaaga lea na le mafai ona faaauau lea mataupu. Sa tulai foi Muliagatele I le faamasinoga ma ia faailoa atu ia Faamasino Vaepule e faapea, ua ia filifili e faamagalo le sa avea ma ona toalua ona o lona mafaufau I le la fanau. Sa faapea loa ona faaleaoga e le alii faamasino moliaga faasaga ia Lemalu. I fafo o le maota faamasino sa vaaia ai loimata o le fiafia o le tamaitai o Lemalu Sina Retzlaff ma I latou sa oo atu e lagolagoina o ia.

O moliaga na faaleaogaina ananafi o lo o tuuaia ai Lemalu I lona sainia o le suafa o le tama o lona toalua, le susuga Pala Lima ma lona toalua, le susuga Muliagatele Brian Lima I ni pepa. O ia solitulafono na tulai mai I le va o le aso 27 o Mati, 2009 ma le aso 17 o Iuni, 2009.

MALIU LE AVE TAAVALE SAOASAOA INA UA FETOAI MA LE ULU

E 66 tausaga o se tama mai Leulumoega-tuai na maliu ina ua fetoai le taavale sa ia uliina ma se ulu I Fasitoo-tai. O ia lea o Umaga Mei, o se tama ua faaipoipo ma e I ai lana fanau. Na maliu o ia I le aoauli o le aso Lulu na sei mavae atu nei. O lenei faalavelave na molimauina e Vale Afamasaga o Fasitoo-tai ma na ia faaalia, na saoasaoa le alu a lea taavale ma fetoai ma se ulu I tafatafa o le auala.

Fai mai a ia, na toe faasaga le taavale I le mea na sau ai ma na matua maanuminumi uma le pito I luma. Na faaalia e le sui sooupu o le ofisa o leoleo, le komesina lagolago ia Leaupepe Fatu Pula e faapea, sa malaga atu lea alii I lona aiga I Leulumoega-tuai mai le malae vaalele. Na saunoa Leaupepe, sa faasua’ava lea alii.

FILIFILIA STEPHEN BETHAM E AVEA MA FAIAOGA O LE MANU SAMOA 15

I le maea ai o le fonotaga a le laulauafono a le iuni lakapi a Samoa i le vaiaso nei, ua filifilia ai nei le faiaoga a le au taitoafitu a le Manu Samoa, le susuga Stephen Betham, e avea ma faiaoga ta’iulu o le au taitoa 15 a le Manu Samoa e pei ona sa faasalalau ai lea avanoa. O le filifilia o le susuga Stephen Betham e avea ma faiaoga ta’iulu o se fuafuaga ua toe faia ina ua le faamalieina nisi o aiaiga e le sa muai filifilia, le alii Ausetalia o Adrian Thompson, ina ia aumau i Samoa nei. Ua faailoa mai foi e le iuni lakapi a le atunuu le suia ai foi o le taitai malaga lea ua filifilia i ai le tofa Namulauulu Sami Leota, o se tasi ua loa tausaga o lana tautua ile iuni lakapi a Samoa e pei ona ia taitaia ai au lakapi a tama i lalo o le 20 tausaga ma le au a le atunuu i le ipu o le pasefika.

O lea tulaga o le taitai malaga na filifilia i ai le tofa Namulauulu i le maea ai o faatalanoaga i le aso Faraile na sei mavae atu nei. O le filifilia o le susuga Stephen Betham ua sui tulaga ai i le sa avea ma faiaoga a le Manu Samoa i le ipu o le lalolagi, le susuga Fuimaono Titimaea Tafua. Ua faailoa mai e le iuni lakapi a le atunuu e faapea, o le a faamaea pea e le susuga Stephen Betham lona tofiga o le faiaoga o le Manu Samoa taitoafitu i le maea ai o vae e lua o le taamilosaga faavaomalo a le IRB lea o le a alo atu i ai i le masina fou i Egelani ma Sikotilani