Ads by Google Ads by Google

TALA MAi SAMOA

FAATAOTOLIA LE PALEMIA I LE FALEMAI

 

O lo o faataotolia nei le alii palemia, le susuga Tuilaepa Lupesoliai Sailele Malielegaoi, i le maota gasegase i Motootua. Na tuua e ia le maota fono i Tiafau ina ua lata i le malologa a le Palemene i le 8.45pm i le po o le aso Lulu, ma auina atu ai loa o ia i le vaega o gasegase tigaina i le maota gasegase.

 

Sa malaga faatasi o ia ma le minisita o le Soifua Maloloina, le afioga Tuitama Dr. Talalelei Tuitama. Ina ua toe tauaofia le palemene i le taeao o le aso Tofi, na faaalia e le minisita o Leoleo ma Falepuipui, le afioga Sala Pinati e faapea, o lo o manuia lava le alii palemia. O se faaaliga aloaia muamua lea mai se sui o le malo talu ona faataotolia le alii palemia. Na faaalia e Sala, ua uma ona logoina o ia e le komesina le tumau o leoleo, le afioga Fauono Talalelei Tapu, o lo o tiute leoleo i le leoina o le vaega o le falemai o lo o faataotolia ai le alii palemia. I se faaaliga mai le falemai, na taua ai o lo o solosolo manuia le faatafagasegase o le alii palemia ma sa aafia o ia i le fiva.

 

Ae lei tuua e Tuilaepa le maota fono, sa vaaia lona faaaogaina o se palanikeke e ufiufi ai lona tino. Na tolopo galuega a le Fono Faitulafono i le aso Faraile ae o le a toe faaauau i le aso Gafua o le vaiaso fou.

 

FAAILOA LAAU FAALAFUA

 

O lo o galulue nei le Matagaluega o Punaoa Faalenatura ma le Siosiomaga, i le taofia o le toe soona ola o laau faalafua i vaomatua ma laufanua, aemaise i nofoaga faasao. Ua faatinoina e le matagaluega se mafutaga faaleaoaoga, mo le mamalu lautele o le atunuu i afioaga ma alalafaga, e faailo ai ituaiga laau eseese faalafua, lea e oo atu i le 200 laau faalafua ua maea faamauina, o lo o ola i laufanua o le atunuu, e pei o le pulu vao, o pulu mamoe, tamaligi ma isi. Ua tele ina aafia nofoaga e tuufua ai manu lele ma meaola faasao e faasino ia Samoa lava ia, i le soona ola ma sosolo ai o ia laau faalafua i eleele ma fanua o le atunuu.

 

O le faatinoga o lea taumafaiga a le matagaluega, ua mafai ona o le fesoasoani mai o le malo o Iapani, lea o lo o latou faatupeina lenei faamoemoe, o lo o faafaigaluega ai ni konesale ua loloto le tomai ma le silafia i mataupu faapenei e uiga i laau Samoa moni, ma laau faalafua mai i isi atunuu ua tele ina aafia ai le ola faalenatura o laau a Samoa, ae faapea ai ma manu ma meaola.

 

TATALA ATINAE A LE MALO I SAVAII

 

O le aso ananafi na tatala aloaia ai nisi o atinae na fesoasoani malosi ai le malo i le motu tele i Salafai, e pei o le maota gasegase faaitumalo i Vaipouli, i le nofoaga lea sa i ai le Kolisi o Vaipouli. Na tatala aloaia ai foi le faleaoga fou a le Aoga Tulaga Lua a le afioaga o Gautavai.

 

O lenei faleaoga na fausia e le malo o Saina, i se tau e silia i le $5 miliona tala. O le masina o Aperila o le tausaga talu ai na amata ai le galuega, ina ua tuuina i lalo le faleaoga tuai, seia maea le galuega i le masina o Ianuari i le tausaga fou. O lenei faleaoga e fogafalelua, ma ua maea ona fausia i fausaga faaonaponei ma faatotogaina uma e le malo Saina. E tofu lava le potu ma le TV aua aoga a le fanau, o kesi ma nofoa ma tulaga moomia uma. O le fogafale pito i luga e lima potu aoga, o le potu mo le faitau tusi a le fanau, faapea le potu musika.

 

O le fogafale i lalo, e tolu potu aoga, o le potu komipiuta, lea e oo atu i le 15 komipiuta ua maea ona saunia, o le potu mo taaloga i totonu o le fale e pei o le ping pong ma i si taaloga, o le potu o le pule aoga, ma le potu mo faiaoga uma po o le staff room. E ese mai I le faleaoga, ua maea foi ona fausia se hall mo le aoga.

 

IA FAAAOGA LELEI O VAILAAU

 

Ua faataua e le Matagaluega o Faatoaga ma Faigafaiva, le lelei ona faaogaina o vailaau oona mo atinae tau faatoaga, i le tineia o manu faalafua ma le faato’aina o fanua, aua le saogalemu ma le malu puipuia o le soifua maloloina o tagata.

 

Ua faaauau i le aso e le Vaega o Laau Toto a le Matagaluega o Faatoaga ma Faigafaiva i Nuu, se aoaoga mo le mamalu o le au faifaatoaga i le afioaga o Aleisa, mo le faaogaina o nei vailaau. Maitauina e le Matagaluega, e ui o lo o tatala le avanoa i tagata faifaatoaga lava ia e agai e faatau ma faaoga ia vailaau, peitai, e moomia le faamalamalamaina lelei o nisi o tulaga taua, ma o se tulaga na faailoa e le au faifaatoaga, le aoga tele o lenei mafutaga mo i latou, ua faaopopo i le poto masani ua iai, e atili lelei faatino ai a latou atinae.

 

O lo o i ai lava taiala i le faaaogaina o ia vailaau, o vailaau sa’o e ao ona faaaoga e fua i le atinae o lo o fai, o le tulaga o le teu maluina o vailaau pe a maea ona faaoga, ma le puipuiga o le soifua maloloina lelei o le tagata o lo o faaogaina ina ne’i manavaina le ea oona, po o le aafia ai foi o isi tagata lautele, e ala i le faaaogaina o meafaigaluega talafeagai.

 

Saunia: Lilomaiava Andrew Fa’asau, Naenae Productions