Ads by Google Ads by Google

TALA MAi SAMOA

ASIASI MAI AUFAIPESE A SAMOANA

 

O le amataga o le vaiaso nei na taunuu mai ai le aufaipese a tama ma teine o le Aoga Maualuga a Samoana mo se latou asiasiga e tasi le vaiaso e faafiafia ai aoga eseese i totonu o le atunuu.

 

O lo o taitaia mai lea aumalaga e le alii faiaoga musika, le susuga Pati Pati, Jr. ma nisi o faiaoga, ma o le aso

 

Sa na te’a nei sa talimalo ai le Ekalesia Faapotopotoga Kerisiano I Samoa i le afioaga o Saoluafata i lea aumalaga. Sa faapea ona lagiina ai e le aufaipese a Samoana nisi o viiga o le sauniga ma na faaalia le agaga fiafia o le susuga i le Faafeagaiga, le susuga Limuaa Samuelu i le avanoa ua maua e talimalo ai i alo ma fanau mai le Teritori.

 

Na saunoa le susuga i le faafeagaiga, e le o le taimi muamua lea ua talimalo ai le latou aulotu i aoga mai Amerika Samoa e pei o nai tausaga ua tuanai sa latou talimalo ai i le aufaipese mai le Aoga Maualuga a Leone ma isi.

 

PAPALII: “E MAMA O’U LIMA”

 

Ua faaalia le faanoanoa o le alii faipule sa avea muamua ma minisita o Tupe, le afioga papalii Niko Lee Hang, ona o saunoaga a le alii palemia, le susuga Tuilaepa Lupesoliai Sailele Malielegaoi, ua fesiligia ai lona tagata ma ua aafia ai lona aiga.

 

O ia atugaluga a Papalii e mafua ona o taimi uma lava e fesiligia ai le alii palemia i le faatinoga o tiute o le alii minsita i Tupe ua i ai nei, le afioga Faumuina Tiatia Liuga, e laga lava e Tuilaepa ia “faaletonu” na tulai mai i le vaitaimi o minisita o Tupe ia Papalii. “Ua aafia lo’u tagata ma le faatinoina o o’u tiute ao ou tauavea le tofi minisita o Tupe,” o le faagaulemalie lea a Papalii.

 

“E 30 tausaga o ou tautua i le mamalu o le atunuu lautele e ala i le pulea o le Ofisa o Mavaega Tausi i lalo o le fautuaga a le HRPP ma i lena taimi atoa, e lei fesiligia lava lo’u nei tagata.” Na faaalia e Papalii, e lei i ai lava se taimi ao ia tauaveaina le tofi minisita o Tupe sa tuuaia ai o ia i le faaaoga sese o tupe a le malo, pe solia taiala a le malo i le faatinoina o ona tiute e pei ona faia e le minisita o Tupe o lo o i ai nei. Fai mai a ia, o le faafitauli o lo o tulai mai nei e mafua i le sopo o le faaaoga a le malo i tupe e ese mai i le aofaiga o lo o i le tala o le tupe.

 

TAOFIA SE ALII I LE FAALAVELAVE

 

E 43 tausaga o se alii mai Ulutogia, Aleipata ua molia nei i le fasioti tagata faamoemoeina ona o le faalavelave na tulai mai i lea afioaga i le amataga o le vaiaso nei lea na maliliu ai ni alii se toalua i manua tuga mai se agaese.

 

Peitai ua faailoa mai e faapea, o lo o masalomia e aafia le ua molia i gasegase o le mafaufau e pei ona faaalia i suesuega sa faagasolo i le vaiaso nei i lea alii. E le o mafai ona faailoaina le igoa o lea alii ma o lo o taofia pea o ia e leoleo. Na faamaonia mai e le komesina le tumau o leoleo, le susuga Fauono Talalelei Tapu, le molia ai o lea alii i moliaga e lua o le fasioti tagata faamoemoeina.

 

Na faaalia e leoleo, e aiga le ua molia ma le toalua o se tasi o alii ua maliu, ma sa tulai mai se feseeseaiga i le va o le ua maliu ma i laua ua maliliu i le ao ae lei tupu le faalavelave i le po.

 

TOE PEPESI FOI LE FAAMA’I MATA

 

Ua faapopoleina le Matagaluega o le Soifua Maloloina ona o le maitauina o le faatupulaia pea o le aofai o tagata ua aafia i le faama’i mata i lenei vaitau. E silia ma le to’a 80 i latou ua resitalaina sa saili togafiti atu i maota gasegase i totonu o le atunuu i le lua masina ua tuanai, faatusatusa i le to’a 200 sa faamauina sa aafia o latou fofoga i le tausaga na tea nei.

 

Na saunoa le susuga i le fomai ia Dr. Mau Imo, ua televave na’ua le pepesi o lea faama’i ma o se tulaga ua faapopoleina ai le matagaluega. Fai mai a ia, ua uma ona lapataia ia aoga i totonu o le atunuu ina ia faatonu le fanau ua aafia e nonofo i le fale, faapea foi u latou e faigaluega, ina ia tau taofiofi ai le pepesi o le faama’i. Na faaalia e Dr. Imo, e leai se togafitiga faalesoifua maloloina mo lea faama’i seia vagana ai le faamalosia o le tumama.

 

MAUA E LEOLEO MARIUANA MA LE FANA

 

E 31 tausaga o se alii mai Malololelei na osofaia e leoleo lona fale ma maua ai le laau faasaina o le mariuana ma se tama’i laau malosi e pei ona faamaonia mai e le komesina le tumau o leoleo, le susuga Fauono Talalelei Tapu.

 

E le o mafai ona faalauiloa mai le igoa o lea alii ona o lo o faagasolo pea suesuega a leoleo. Na faaalia e Fauono, sa maua i lea alii ni sikaleti mariuana se fa, o laau mariuana e silia ma le sefulu, o lau mariuana ua uma ona faamamagoina faapea se tama’i laau malosi ma ututau e tolu.

 

Lilomaiava Andrew Fa’asau, Naenae Productions