TALA MAi SAMOA

TASI AVANOA TUU I LE EPC

 

Toe tasi le avanoa ua tuu e le afioaga o Taelefaga, Fagaloa i le Faalapotopotoga Malosi Faaeletise e faaleleia ai le nofoaga o lo o i ai le afi eletise i lea afioaga, ina ia aveesea ai le manogi le manuia o lo o mafatia ai le afioaga.

 

I se feiloaiga a le fono a tamalii ma failauga o Taelefaga ma sui o le pulega o le EPC na faia i le aso Faraile na sei mavae atu, na faamanino ai e le fono a le afioaga, a oo atu i le masina o Iuni o le tausaga nei e lei foia lava lea faafitauli, o le a latou talaina loa i lalo le fale ma masini uma a le EPC o lo o gaosia ai le eletise mai le malosiaga o le suavai (hydroelectric plant), o lo o i o latou eleele. Na saunoa se tasi o tamalii o le afioaga, le afioga Leuta Sialafau, “O le a matou talaina uma i lalo mea totino a le EPC pe afai e oo atu ia Iuni e lei aveesea le manogi le manuia ua leva ona matou pologa ai. ”

 

Peitai, e $3,000 le seleni na faameaalofa i ai e sui o le pulega a le EPC i le fono o matai o le afioaga ma le tautinoga o le a amata galuega i le foia o lea faafitauli ina ia oo atu ia Iuni ua aveesea lea manogi le manuia.

 

FAIAIGA MA LE MAFINE E LE ATOA MALOSI MAFAUFAU

 

E 19 tausaga o se taulealea ua tulai i le Faamasinoga Maualuga i le moliaga o le faiaiga ma se tamaitai e le atoatoa le malosi o le mafaufau, ma le faaoolima mataga.

 

O lea alii ma le tamaitai na aafia e omai mai le alalafaga e tasi. Na tulai le molimau a le itu a le malo, le tamaitai fomai o Dr. Cecilia Bartley ma ia faaalia, o le faaiuga o le masina o Aperila i le amataga o Me, 2013 na faiaiga ai le ua molia ma le na aafia.

 

O lona uiga, e tatau ona fanau le na aafia i le amataga o Fepuari, 2014. Ina ua suesue e le loia a le ua molia, le susuga Patrick Fepuleai, le tamaitai fomai i le taimi na fanau ai le na aafia, sa faasalavei le afioga Faamasino Sili Patu Tiavaasue Falefatu Sapolu ma ia faaalia, e le o molia le ua molia ona o le maitaga o le na aafia, ae o lo o molia ona o lona faiaiga ma se tamaitai e le atoatoa le malosi o le mafaufau.

 

FALEPUIPUI I MARIUANA

 

O se alii na pueina e leoleo i Savaii i le aso e sosoo ma le aso Kerisimasi o le tausaga na tea nei, ua faasalaina nei i le falepuipui mo le tausaga e tasi ma masina e valu, ina ua maua ai ni mariuana e mafai ona taai ai sikaleti e 153.

 

Na pu’e e leoleo ia Gafatali Luamanu Keti ma se isi alii ina ua logo e se tagata leoleo o lo o auina faanana atu e Keti ma lana uo ni mariuana mai le uafu i Mulifanua i le motu tele i Salafai. Sa faapea loa ona mataitu e leoleo ia alii ao malaga atu i le vaa i Savaii ma ina ua taunuu i Salelologa, sa feosoi i se pasi ma malaga atu i le faleaiga o Tui ma Masi i Salelologa. Ina ua vaaia e le alii sa toalua ma Keti leoleo, sa taumafai o ia e sola ese ae na tuliloa ma maua e leoleo.

 

Sa auina atu loa i laua i le ofisa o leoleo mo suesuega ma maua ai se pepa iila o lo o i ai i totonu nil ala mariuana se fa, o lala mariuana e lei mamago e fitu, o se pepa sikaleti Pall Mall o lo o i ai i totonu ni tamai lala mariuana se lua ma se sikaleti mariuana se tasi.

 

LE MAUTONU AVEPASI

 

Ua le mautonu avepasi i taimi pisi o femalagaiga i taeao ma afiafi o aso taitasi pe faatu a latou pasi i pasese, e ui ua tumu pasi. O lea faafitauli ua faateteleina nei ona o le suiga o itula aoga a aoga a le malo lea ua tuua i le itula e fa i afiafi. Na faaalia le faagaulemalie o nisi o avepasi e faapea, o le alolofa i alo ma fanau aoga ina nei tuai i aoga le mafuaaga e faatu ai i ai a latou pasi e ui ua tumu.

 

Na faaalia e se teine aoga mai le Kolisi o Maluafou o Emma Poseta, e leai se mea e leaga ai ia te ia le sii ona ua tumu le pasi. Nao le pau mea taua ia te ia, ia aua nei tuai i le aoga. Peitai ua faaalia e le sui sooupu o leoleo, le susuga Fauono Talalelei Tapu, e le tatau lava i avepasi ona ave ni pasese pe afai ua tumu le pasi.

 

FAUTUA PALUSALUE I LE MALO TOTOGI AITALAFU

 

Ua fautuaina malosi e le taitai o le vaega faaupufai o le Tautua Samoa, le afioga Palusalue Faapo II, ia le malo ina ia tauaveina le totogiina o le nonogatupe e $200 miliona tala lea na faaaoga e faatupe ai le fausiaina o le nofoaga e gaosi ai le eletise i Fiaga.

 

Na faaalia e Palusalue i se feiloaiga ma le au tusitala i le vaiaso nei e faapea, afai e tauave le malo le totogiina o lea nonogatupe, e leai se mea o le a manaomia ai le faia o se siitaga e 10 pasene i le tau o le eletise e pei ona ua faatuina nei e le Faalapotopotoga Malosi Faaeletise. Fai mai a ia, sa ia laga lea mataupu i tauaofiaga lata mai nei a le Palemene, ae sa tetee le alii palemia ma i tatai ese felafolafoaiga mai lea mataupu.

 

Lilomaiava Andrew Fa’asau, Naenae Productions

Comment Here