TALA MAi SAMOA

LE FAAALOALO SEKULATI O LE FALEMAI

 

Ua faitioina malosi e nisi o le atunuu ia alii sekulati o le maota gasegase o Tupua Tamasese Meaole i Moto’otua, ona o a latou amioga le faaaloalo ma le faasiasia i se tina matua sa oo atu e asi lana tama o lo o faataotolia ai. E le gata i lea, ua tuuaia foi ia alii sekulati i lo la tuuina atu o faamatalaga sese i lea tina.

 

O faitioga aupito i lata mai ia faasaga i le vaega o sekulati o lo o faigaluega i le falemai. Na faaalia e se tina mai Niu Sila sa molimauina felafolafoaiga i le va o alii sekulati ma le tina sa oo atu e asi lana tama e faapea, sa tulai mai se feeseeseaiga ona o le le faaaloalo o ia alii sekulati. Sa fesili atu lea tina po o fea le vaega o le falemai e agai i ai sei asi si ana tama o lo o faataotolia ai, ae faasino i ai e se tasi o sekulati le nofoaga sese o le falemai.

 

Na faamatala foi e le tina mai Niu Sila e faapea, sa ia faalogo o fai le isi sekulati i lea tina, “E sili pe a e to’a mai, aua e lelei atu le ma pepelo ia oe!” O le faatoa tatalaina o le falemai i Motootua na faitioina ai foi sekulati ina ua latou faasaina tamaiti mai le ulufale atu i le vaega mo gasegase tau savali. Na faaalia e ia sekulati, e faasa ona e palapala ai le falemai. Peitai na teena e le pulega o le falemai lea tulaga ina ua fesiligia e le au tusitala.

 

AI E SEKULATI MEAAI A GASEGASE

 

I se isi lipoti mai le falemai, o lo o taua ai le faamalolo mo se vaitaimi o ni alii sekulati se toalua ona o lo la aai ai i meaai sa alu atu ma se tasi tina e asi ai se tasi o lona aiga o lo o faataotolia I le falemai. Na faaalia, o lo o faamalolo mo se vaitaimi i laua a o faagasolo suesuega i lea mataupu.

 

Na taofia e ia alii sekulati se tina sa alu atu ma meaai e asi ai se tasi o lona aiga o lo o faataotolia i le falemai, ma sa la faailoa i ai ua faasa ona toe avatu ni meaai mo gasegase ona o lo o fafaga lava e le falemai gasegase.

 

Sa faapea loa ona tuu ai e lea tina le meaai sa alu atu ma ia i alii sekulati ma le faamoemoe e toe piki pe a toe foi ane. Peitai, e toe foi mai ua toeititi uma le meaai ona fai ai le taumafataga a ia alii sekulati! Na fesiligia le alii pule o le falemai, le susuga Leota Laki Lamositele Sio, i tulafono fou a le falemai ua faasa ai ona toe avatu meaai i gasegase. Na faaalia e Leota, ua mafua lea tulaga ina ia puipuia ai le soifua o gasegase ona e le o mautinoa po o saogalemu ia taumafa mo gasegase. Mo se faataitaiga, na saunoa Leota, o taumafa o lo o gaseseina e le aufaigaluega a le falemai, e laititi lava le masima e ave i ai ona o le puipui i le soifua maloloina o gasegase.

 

MANOGI LEAGA ‘AUTU I FUGALEI

 

Ua toe faaopopo foi le isi faafitauli o lo o feagai ai ma le au faifaatoaga o lo o faatau fua o a latou faaeleeleaga i tafaala i Fugalei. Ua le gata i le laina i le vevela o le la ma le timuia i timuga, ae ua molimauina foi le le manuia o le manogi o ‘autu o lo o va ai ma le aualatele a le malo. Na faaalia e se tasi faifaatoaga, o le manogi lava lea sa latou faafesagai talu ona tuu i lalo le maketi tuai sa i ai, ae see atu i le nofoaga o lo o faatauina ai nei a latou meatoto.

 

Fai mai a ia, e ui i le manogi leaga o ia ‘autu, ae ua latou masani ai lava ona o le manogi lava lea latou te manavaina i aso uma. Peitai, o timuga mamafa e lei mamao atu nei ua atili ai le manogi leaga o ia ‘autu. Na faaalia e lea tama, o nai tagata o lo o faatau a latou talo ma isi fua o faaeleeleaga i tafaala autafa o ia ‘autu, o lo o matua tigaina i le manogi leaga. Na saunoa le tama, e iloa lava i tagata e ui atu i autafa o ia ‘autu le faaletonu o le manogi ona e uu uma o latou isu. Na ia faaalia, a timuga nei e tafe mai i fafo le vai o lo o to’a ai i ia ‘autu, ma o latou savavali ai i luma.

 

TU’I LE TINA MA’ITAGA

 

E 33 tausaga o se tina ua lima masina o lona ma’itaga na tu’i ona foliga e se alii o lo o tau sailia nei e leoleo. O lea faalavelave na tulai mai i autafa o le auala i Vaivase-uta i le aso Sa na te’a nei ao matamata i ai nisi o tagata.

 

Na faaalia e lea tina, e leai ma se isi na oso ina ua tupu le faalavelave lea na ta’e ai le pito i luga o lona mata agavale. Na faailoa e le tina o Joreka Seumanutafa i le au tusitala e faapea, o le alii na tu’iina o ia e igoa ia Avei.

 

O lea alii e le faigaluega ma o se tagata faatupu leaga i totonu o lo latou nuu. Na saunoa le tina o Joreka, ua tuuina atu nei lea mataupu i leoleo ma ua latou faailoa mai, e ono oo atu i le fa tausaga le umi e nofosala ai lea alii i le falepuipui i le faoolima.

 

FAAMALOLO PEA TAITAI LEOLEO

 

Ua faaauau seia oo i le masina o Mati, 2014 le faamalologa mo se vaitaimi o le alii komesina o leoleo, le afioga Lilomaiava Fou Taioalo, ma le alii komesina lagolago sa pulea le toese i Tafaigata, le afioga Sala Seaga Uili.

 

Na faaalia e le loia o lo o fesoasoani i le Komisi Suesue, le susuga Sine Lafaialii-Koria e faapea, ua pasia e le Kapeneta le toe faaauau o le taimi o lea faamalologa le tumau, ina ia lava ai le taimi e tuufaatasi ai le lipoti a le komisi. Ua silia nei ma le lima masina talu ona faamalolo le tumau Lilomaiava ma Sala ao faagasolo suesuega i tuuaiga i faiga le talafeagai sa la faatinoina i le toese i Tafaigata lea e aofia ai pagota ma leoleo o lo o faigaluega ai i lea toese.

 

MOLIA I LE GAOI

 

Ua molia nei i le Faamasinoga Maualuga se alii sa faigaluega i le vaega o tupe a le Pulega o le Malae Vaalele i moliaga e 70 o le gaoi ao avea ma tagata faigaluega, i le leiloa ai o le tinoitupe e $61,000 o tupe a le Pulega mai lafoga mo le faaaogaina o le malae vaalele ma le tau o le faaaogaina o pakaga taavale.

 

Na tuua e Lee Apineru le atunuu mo Niu Sila i le lua tausaga talu ai ina ua faatoa alia’e lea solitulafono i suesuega a le au suetusi. Na faaalia i le lipoti a le au suetusi le aveesea o tupe totogi a kamupani vaalele e tulaueleele a latou vaalele i le malae vaalele faavaomalo i Faleolo, o lafoga a le pulega ma tupe mo le faaaogaina o le pakaga taavale ma isi aseta a le pulega.

 

O le 2012 na molia ma faasalaina ai i le falepuipui le alii sa pulea le vaega o Tupe a le Pulega o Malae Vaalele, le susuga Muliagatele Rapi Tevaga, ina ua faamaonia ona moliaga e 30 o le gaoi ao avea ma tagata faigaluega, o le tinoitupe e $35,000 tala Amerika.

 

Lilomaiava Andrew Fa’asau, Naenae Productions

Comment Here