Ads by Google Ads by Google

TALA MAi SAMOA

SOLOFUA JONATHAN CRICHTON

 

Ua solofua moliaga faasaga I le alii pagota o Jonathan Patrick Crichton ina ua faaleaoga e le afioga Faamasino Lesa Rapi Vaai le faaiuga a le vasega o Faatonu o le Faamasinoga e faamaonia ai le moliaga o le fasioti tagata faamoemoeina I le maliu o le alii Samoa mai Niu Sila, o Hans Dalton i le toese i Tafaigata. Na taua e le alii faamasino le vaega 100 o le Tulafono o Taiala o le Faamasinoina o Solitulafono 1972, lea e tuuina atu ai le malosiaga ia te ia na te faaleaogaina ai se faaiuga a le vasega o Faatonu.

 

Na ia saunoa foi, o le a tuuina atu i Faatonu ia kopi tusitusia o lana faaiuga i le aso Faraile a sau nei. Na maligi loimata o le alii o Crichton ma fusi i lana loia, le susuga Rosella Papalii lea sa vaaia foi le maligi o ona loimata, ina ua tuuina mai le faaiuga a Lesa. Sa faapea foi ona feiloai atu Crichton ma fusi i le tina o le ua maliu, o lona uso ma lona tuafafine sa malaga mai Niu Sila e auai i lea faamasinoga ma sui o le aiga i Samoa. “Faafetai i le Atua ua maea lenei faamasinoga, ua lagona le mafanafana ma le malosi i le faaiuga a le Faamasinoga,” o a Chrichton lea.

 

O Jonathan Patrick Crichton o Malifa ma Tafuna, Amerika Samoa o lo o tuli lona faasalaga i le fasioti tagata ona o le maliu o se alii ave taavale laupasese sa ia fanaina i se tamai laau malosi i le 2012.

 

FAAULU I SI TAGI I LE MALIU O DALTON

 

E ono aafia nisi tagata ma ofisa i le tagi ua faulu e le loia a le aiga o le alii o Hans Dalton lea na maliu i le toese i Tafaigata i le faaiuga o le 2012. Sa auai i nisi o iloiloga o lea faamasinoga le loia a le aiga o Dalton, le susuga Leuluaialii Olinda Woodroffe, ae lei toe taliu atu i Niu Sila lea e faamautu ai o ia faapea le aiga o le ua maliu.

 

Na faaalia e Leuluaialii, ua ia mata’ituina ma faalogo i molimau a leoleo ao faagasolo le faamasinoga o Jonathan Patrick Crichton ma ua o lo o latou fuafua e toe faaopopo i latou o lo o faasaga i ai le latou tagi. O le masina o Oketopa 2013 na faaulu ai le tagi faasaga i le Loia Sili ma e ono faaopopo nei le Matagaluega o Leoleo ma Falepuipui faapea le Matagaluega o le Soifua Maloloina.

 

TETEE I LE SIITAGA O LE ELETISE

 

Ua matua tetee le au faipisinisi i se siitaga e 10 pasene i le tau o le eletise ua faatuina e le Faalapotopotoga Malosi Faaeletise (EPC). Na faaalia e le Faalapotopotoga o le Au Faipisinisi a Samoa (Samoa Chamber of Commerce), o lea siitaga o le a matua aafia ai pisinisi ma faamuta ai a latou taumafaiga ina ia faaleleia le tulaga o oloa gaosi auina atu i fafo.

 

Ua tuuina atu nei lea siitaga tau faatu a le EPC i le Ofisa o le Pule Faatonu (Office of the Regulator) mo le iloiloina, ae ua tuuina atu foi i ai le tali a le au faipisinisi. O lea tali e faapea, o lea siitaga tau faatu ua tele naua ma ua vave faatuina foi e aunoa ma ni lapataiga. O lo o faamoemoe le Faalapotopotoga o le Au Faipisinisi ina ia teena lea siitaga i le Ofisa o le Pule Faatonu, ae lei oo atu i le Kapeneta mo le pasiaina.

 

O lo o finau le pulega o le EPC, e moomia le faia o lea siitaga e totogi ai aitalafu lea e i le va o le $100 ma le $200 miliona tala. Peitai o lo o finau foi le Faalapotopotoga o le Au Faipisinisi, o lea siitaga o le a faamuta ai taumafaiga a le au gaosi oloa e ofi atu i maketi faavaomalo. E le gata i lea, o le a le fia omai ai pisinisi mai fafo e faatu ni a latou lala i Samoa ae o le a agai i isi atunuu o le Pasefika e pei o Fiti, lea e taugofie ai tulaga moomia mo le faatuina o pisinisi.

 

LAMATIA TAAVALE I LE LIMU

 

Ua alia’e foi le isi fili e ese mai i vaitafe pa, e lamatia ai taavale i auala sima ua fausia i nofoaga e sopoia ai e vaitafe ia auala taavale. O lea fili o le limu. Ua maitauina i nisi o auala sima e pei o le auala sima i Lotopa, le sosolo ai o le limu ma ua lamatia ai taavale e sopoia lea auala sima.

 

O le vaiaso na te’a nei na toe toso a’e ai i luga o le auala se pasi ma se taavale ina ua sesee i luga o le auala sima ona o ia limu ma agai atu ai i totonu o le vaitafe. Na feosofi ese ave taavale o ia taavale ae savali e saili se fesoasoani i le tosoina a’e o a la taavale u luga o le auala. Na faaalia e se tasi o alii e fai lana pisinisi toso taavale, ua tatau ona fausia se pa sima e puipui mai ai taavale mai le sesee ese mai le auala agai i le vaitafe.

 

MAUA UA MALIU I LONA FALE

 

O lo o suesueina e leoleo le maliu o se tama mai Sinamoga na maua e sui o lona aiga i lona fale i le aso Toonai ua tuanai. Na faaalia e le sui sooupu o leoleo, le susuga Fauono Talalelei Tapu, e foliga mai sa faasua’ava le ua maliu ma o lo o masalomia sa aafia o ia i le gasegase o le fatu. Fai mai a ia, o le a faia se taotoga i le tino maliu o lea tama e sailia ai le mafuaaga tonu o lona maliu. Na saunoa Fauono, e leai ni manua sa maua i le tino maliu o lea tama ma na faamaonia ua maliu o ia ina ua taunuu i le falemai.

 

SUIA E TUALAULELEI IA TOM IOSEFO

 

Ua faailoa mai e le pulega o le Manu Samoa Taitoafitu le maua o le tama taalo e suia le uigi saoasaoa o Tom Iosefo mo le vae o le taamilosaga taitoafitu a le IRB i Ueligitone, Niu Sila i le faaiuga o le vaiaso nei. O ia lea o Lole Tualaulelei, 23 tausaga o Sinamoga lea faatoa foi mai Farani i le mavae o tausaga o lua o taalo fakonekarate ai i lea atunuu. O ia foi o se sui tuai o le Manu Samoa Taitoafitu ma sa taaalo o ia i le 2011.

 

Lilomaiava Andrew Fa’asau, Naenae Productions