TALA MAi SAMOA

MALIU SE TAMA INA UA TAFEA I LE SAMI

 

O le taeao o le aso Gafua na sei mavae atu nei na maua ai e nisi mai le afioaga o Satitoa, Aleipata le tino maliu o se tama na tau sailia mai i le po o le aso Toonai ina ua tafefea ma nisi alii sa alu se latou faiva. O le ua maliu o Segialii Feiloaiga Tuliese, 53 tausaga le matua mai le afioaga o Aufaga, Aleipata.

 

Na lipotia mai e faapea, o lea tama o se tasi o se au lama sa alu se latou faiva i le po o le aso Toonai, ae o le tulaga faaletonu o le tau na tafefea ai i latou ma isi alii e to’aono o lo latou aiga mai lo latou afioaga. O le vaveao o le aso Sa na toe maua uma ai i latou e to’aono sa tafefea o lo o soifua uma. Peitai na o le ua maliu e lei maua ma faato’a maua i le te’a o le valu i le taeao o le aso Gafua i talaane o le uafu i Satitoa ua maliu o ia.

 

O le ua maliu e fai lona toalua ma e to’aono o laua alo e i le va o le valu ma le 24 tausaga le matutua.

 

TUUMALO NISI O TAMALII ILOGA O LE ATUNUU

 

O le amataga o le vaiaso nei na maua ai le tala faanoanoa i le tuumalo o se tasi o tamalii sa avea ma faipule o le itumalo Vaimauga I Sisifo, le afioga Anauli Pofitu Fesili, faapea le faatonusili o le Pulega o le Suavai, le afioga Tainau Moefaauo Vui Taputoa Titimaea.

 

O le afioga Anauli sa avea ma Komesina o le Ofisa o Lafoga mo le 14 tausaga ae lei avea ma faipule i le tausaga e 2006, ma o ia foi o se tasi o alii fai pisinisi iloga o le atunuu. O ia foi o se Aoao Fesoasoani o le ekalesia EFKS i Tanugamanono ma e tuumalo o ia ua 65 tausaga o lona soifua. O le afioga Tainau ua loa foi tausaga o lana tautua i matagaluega a le malo, ae lei filifilia e avea ma faatonusili o le Pulega o le Suavai a le atunuu ma o le tausaga na te’a nei na toe filifilia ai o ia e fa’aauau lea tofiga mo le isi tolu tausaga.

 

E 11 tausaga o ia tauaveina lea tofiga. E tuumalo le afioga Tainau ua 53 tausaga o lona soifua. O le po o le aso Sa na tuumalo ai i laua i le maota gasegase o Tupua Tamasese Meaole ona o ni gasegase oso faafuasei.

 

FALEPUIPUI I LE FASIOTI TAGATA

 

Ua faasalaina e le Faamasinoga Maualuga le alii e 23 tausaga o Michael Toleafoa Faafouina o Faleatiu i le falepuipui mo le fitu tausaga ina ua faamaonia lona moliaga o le fasioti tagata pa’ivalea. O lea moliaga e mafua mai i se feeseeseaiga na tulai mai i le aso 2 o Me, 2013 i Fasitoo-tai i lo la va ma le tama o lona toalua.

 

 Na faaalia i faamaumauga a le Faamasinoga e faapea, sa tulai mai se vevesi i le va o le ua molia ma lona toalua ma sa ia faaoolima ai i lona toalua ma sa matapogia ai lona toalua. Sa tuua loa e le ua molia le fale sa la nonofo ai ma lona toalua ae alu atu i le fale o lona aunty i Fasitoo-tai lava. Ina ua logotala le tama o lona toalua, o Alai Agalelei, i lea feeseeseaiga, sa ia alu loa ma se agaese e su’e le ua molia. Na faaalia, sa tau atu o ia i le ua molia o fai mai se latou inuga pia ma nisi o ana uo ma sa ia lafoina i ai ni masoa, ona toe alu ai lea i le fale. Ina ua uma le inuga pia a le ua molia ma ana uo i lena po, sa toe alu loa o ia i le fale o le aiga o lona toalua ma ia faaoo ai ni manua tuga i le tama o lona toalua i se agaese.

 

Na faaalia i le lipoti a le falemai, na maliu lea tama ona o le tele o le palapala ua alu i le tuga o ia manua. E oo atu i le maota gasegase i Leulumoega, ua maliu o ia.

 

ULU VELA I MAKETI I AUSETALIA

 

O se tala fiafia mo le au faifaatoaga ma le atunuu lautele le ofi atu o le ulu vela i se tasi o maketi tele i atunuu i fafo i totonu o Ausetalia. O le masina o Tesema o le tausaga na sei mavae atu na auina atu ai le uluai uta o ulu vela mai Samoa mo lea maketi ua matala mai, ma e silia ma le 500 kilokalama le mamafa o lea uta. Ua lipotia mai i Ausetalia le tulaga maualuga o le manaomia o le ulu vela mai Samoa ma ua fuafua ai nei le isi uta e auina atu i se taimi e le o toe mamao.

 

O lenei laasaga manuia ua tele tausaga o taumafai mai i le galulue faatasi o le Matagaluega o Faatoaga ma Faigafaiva, o le kamupani o le Farmer Joe ma le fesoasoani mai o le malo Ausetalia i lana polokalama fesoasoani tau faatoaga ina ia faafaigofie ai ona felauai fua o faaeleeleaga i maketi faavaomalo, aemaise o le faamalieina o aiaiga a ofisa fa’aasu a atunuu e lua.

 

O ogaumu faapitoa a le kamupani o le Farmer Joe o lo o faaaogaina e favela ai ulu ina ia ausia ai le tulaga o lo o moomia, aemaise ina ia mate ai ni iniseti faalafua e ono ola ai i totonu o ia taumafa.

 

FOAI A SAMOA MO TOGA

 

Ua faailoa mai e le malo Samoa le tuuina atu o lana fesoasoani tupe e $50,000 Pa’anga po o tupe Toga e tusa lea ma le $60,000 tala Samoa, mo le malo Toga ona o aafiaga o lea atunuu mai le afa o Ian i le amataga o le masina na sei mavae atu. O le tuuina atu o lea fesoasoani a le malo Samoa ua atagia ai le vavalalata pea o fesootaiga i le va o malo e lua. Sa tuuina mai foi le fesoasoani a lea atunuu mo Samoa ina ua aafia i le afa o Eveni i le faaiuga o le 2012.

 

LE TAALO TOM IOSEFO I UELIGITONE

 

Ua lipotia mai le le mafai ai ona taalo o le uigi saoasaoa a le Manu Samoa Taitoafitu o Tom Iosefo i le vae o le taamilosaga taitoafitu a le IRB o lo o faagasolo nei, lea e faia i Niu Sila i le faaiuga o le vaiaso nei.

 

Na faaalia i se pepa o faamatalaga mai le Iuni Lakapi a Samoa e faapea, e ono suia Iosefo e se isi tama taalo, ae o le taimi nei o lo o talia le faamaoniga o lea tulaga e ala i se lipoti a se fomai i manuaga o le alii o Iosefo - o se tasi lea o alii sa faamoemoe i ai le alii faiaoga o Viliamu Punivalu e faatigi i le au taitoafitu a le atunuu ona o le saoasaoa. Peitai, sa feagai ai o ia ma manuaga mai le tausaga ua tuanai, lea ua toe faaletonu.

 

E le o mautinoa i le taimi nei po o ai o le a filifilia e Punivalu e suia Iosefo.

 

Lilomaiava Andrew Fa’asau, Naenae Productions

Comment Here