TALA MAi SAMOA

FIAFIA LE KOMITI A MALO AUFAATASI

 

Ua lipotia mai le faafiafiaina o sui o le komiti faapitoa a le Faalapotopotoga o Malo Aufaatasi lea o lo o asiasi mai i Samoa e asia tapenaga a le malo mo le fonotaga faavaomalo a atumotu laiti o le lalolagi, lea o le a talimalo ai Samoa i le masina o Setema o le tausaga nei.

 

Na faaalia le agaga fiafia ma le faateia o le failautusi aoao o lea fonotaga, le susuga Wu Hongbo, i tapenaga ua maea ona faatinoina, ma o le a faagasolo a latou feutagaiga ma sui o le malo i itu e ao ona toe faaleleia atili. O le nofoaga o taaloga i Tuanaimato o le a faatautaia ai lea fonotaga faavaomalo lea o le a auai mai ai sui e pe a ma le to’a 3,000 mai atumotu laiti o le lalolagi.

 

O se tasi o fale taalo tetele (gymnasiums) o lo o i ai o le a faatautaia ai le fonotaga ‘ao le isi fale taalo o le a avea ma nofoaga e fai ai taumafataga mo le au usufono. O le a saunia foi tama’i taavale e faaaoga i tagapolo (golf carts) e feafioa’i ai le au usufono i totonu o le lotoa i Tuanaimato.

 

VAAIGA MASANI I APIA IA TAGATA AISI

 

E iloa gofie i Apia ia foliga o se atunuu la’ala’a i luma ma tagata ola finau ina ia faaleleia atili le tulaga o le soifuaga i aso taitasi, e pei ona molimauina i le au faifaatoaga o lo o faala ma timuia i aso taitasi i le faatauina atu o fua o a latou faaeleeleaga. Peitai, ua avea foi ma vaaiga masani nisi o tagata o lo o nonofo solo i vaega eseese o le taulaga ma aisi tupe solo i tagata feoa’i.

 

Pe a ma le to’a 20 i latou faapenei o lo o faia lenei amio i le taulaga i aso taitasi ma e eseese lava foi le matutua. Na faaalia e se tasi o ia tagata, o se alii e suafa ia Peter Junior, lea e masani ona nofonofo ma aisi tupe i lalo o le maota o le NPF, o ia e sau mai Pesega ma e le lelei lona mafaufau toe maua o ia i le ma’ifatu.

 

Fai mai a ia, e leai sona aiga ma o le mafuaaga lea e aisi solo ai o ia aua se tupe e faatau ai sana tapaa ma sana meaai. Na faaalia e Junior, a lelei lava le aso e maua lana $100. Na faaalia e lea alii, e leai sana galuega ona e lei lelei lana aoga ma nao le pau lea o le auala e maua ai sana tupe.

 

MALIU SE TINA UA ‘ONA I LE I’A

 

E 51 tausaga o se tina na maliu ina ua ‘ona i se i’a i le faaiuga o le vaiaso ua tuanai. Na lipotia mai e faapea, na maliu lea tina ina ua uma ona fai sana taumafataga i se sua i’a sa fai i le i’a o le pelupelu.

 

Na faaalia e nisi o tautai e faapea, e iloa gofie lava le pelupelu e oona e u sese ona uga ma e tusa lava pe saka, e le alu ese ai lava le ‘ona o le i’a.Na faaalia, o le faaumatia o a’au amu i faalavelave faalenatura ua mafua ai ona sosolo le limu i amu, lea e ai e i’a, ma mafua ai ona ‘ona ia i’a.

 

FAAFITAULI I LE SUIGA O TAIMI O AOGA

 

O le tausaga aoga ua amatalia nei ua amata faamamaluina ai suiga i taimi o aoga a alo ma fanau i aoga a le malo ma ua tulai mai ai foi ma faafitauli. O le vasega muamua e oo i le vasega 3 e amata mai le iva i le taeao e oo i le itula e lua i le aoauli.

 

O le vasega fa e oo i le vasega valu, e amata mai i le iva i le taeao e oo i le itula e tolu i le aoauli, ao le vasega iva e oo i le vasega 13 e amata mai le itula e iva i le taeao e oo i le itula e fa i le afiafi. O ia suiga ua tulai mai ai le faafitauli o le tutumu o pasi ona ua tuua faatasi tamaiti aoga ma le manava o galuega i aso taitasi. Na faaalia e nisi o le fanau aoga, o le tulaga lea ua i ai, e omia mai i pasi i le taeao pe a usu mai i le aoga, toe omia foi i le afiafi pe a tuua. Na faaalia e nisi o le fanau, e leai se mea e leaga ai le tuai ona tuua ona o lo o latou naunau ia lelei a latou aoaoga, ae ua le manuia tele le tulaga o le omia i totonu o pasi.

 

O se tasi lea o mafuaaga e le o mulimulita’i ai aoga a ekalesia eseese i le atunuu i lea suiga a aoga a le malo. Na saunoa le Faatonu o Aoga a le EFKS, le susuga i le Faafeagaiga ia Vavatau Taufao, o le isi mafuaaga, ina ia maua ai le taimi e o ai le fanau i aoga a le Faifeau. Fai mai a ia, e tele le taua o aoga a le Faifeau i olaga o le fanau ma e tatau lava ona fa’aauau ia aoga.

 

SOLOFUA MOLIAGA O LE FAIAOGA

 

Ua solofua moliaga faasaga i le tamaitai pule aoga o le Aoga Tulaga Lua a le afioaga o Safaato’a, Lefaga lea na ia faatonuina nisi o tamaiti e lolo faamalosi le ulu o se tasi tamaititi i totonu o le ipu o le fale le taua.

 

O le aso Faraile o le vaiaso na te’a nei na faia ai le faaiuga a Faamasino Mata Tuatagaloa ina ia faasolofua moliaga faasaga i lea tamaitai faiaoga. Na faaalia e le tamaitai faamasino, ua iloiloina e le Faamasinoga le faasalaina o lea tamaitai e le fono a tamalii ma failauga a lona nuu, toe faamalolo mo se taimi le tumau o ia mai lana galuega ao faagasolo suesuega a leoleo i lea mataupu.

 

Na logoina foi le Faamasinoga e faapea ua uma ona faia se ifoga a le aiga o lea tamaitai faiaoga i le aiga o le tamaititi na aafia ma ua uma ona talia e le aiga. O le tamaitai pule aoga o Fale Fetu sa molia i moliaga e lua o le faaoolima i ni tamaiti se toalua ma sa ioe o ia i le moliaga e tasi ae tetee i le isi moliaga.

 

FALEPUIPUI I LE TU’I O SE LOOMATUA

 

E 25 tausaga o se alii mai Ululoloa ma Vailoa, Faleata ua falepuipui nei mo le tolu masina ona o lona faaoolima i se tina e 50 ma ona tupu tausaga. Na molia Tevesi Muaau i le moliaga e tasi o le faaoolima. E le o le taimi muamua lea ua molia ai lea alii i le tulafono. O le 2011 na molia ai foi o ia i le tauai maa.

 

Lilomaiava Andrew Fa’asau, Naenae Productions

Comment Here