Mai Ueligitone i Niu Sila ua fa’aalia mai ai le ali’i sa ta’uta’ua mai lana ta’alo lakapi i le Olopeleki - Sonny Bill Williams, lea ua ofo nei o le a fusu mo Niu Sila i le tausaga a sau, i lana fusuaga muamua lava ta’i 5 ta’amilosaga  o se tama fusu fa’apolofesa.

Na sainia e Williams lana konekarate fou e tasi le tausaga ma le NZRU a le Malo o Niu Sila, i le masina talu ai, ma ua fa’apea lava ona fa’atagaina ai o ia e tauva i se isi fo’i fa’agatama e fia tauva ai.

O le ali’i o Bill Williams e na’o le 26 ona tausaga, ae le’i faia’ina lava o ia i ana fusu’aga fa’apolofesa e fa ua mae’a nei. E lua ana fusu’aga ua malo ai i ‘ai, ae tasi ua malo ai i tu’ioti, ae o nai ali’i sa latou fetaui i le maea, ua na’o nisi lava e avea fo’i fusu’aga o ni a latou ta’aloga fa’asamasamanoa, ae le o nisi e a’otauina mo le avea ma tama fusu tumau.

Ua fa’ailoa e Williams o lana fusu’aga lea e muamua mai, e le’i fa’ailoa maia po’o ai la te fetaui ai, peita’i e faia lea ia Fepuari 8, 2012, ae 17 loa aso e mulimuli mai oso le ta’aloga a Waikato Chiefs lea e ta’alo ai fo’i mo le ta’aloga muamua o le Ta’amilosaga o le Super 15.

FA’AMAVAE DIGBY IOANE

Mai Sini Ausetalia, o le ali’i o Digby Ioane,  sa avea ma uigi a Ausetalia ua le mana’o nei e sainia se feagaiga e ta’alo ai mo le ‘au a Iapani ae ua toe sainia le isi feagaiga fou ma Ausetalia Ualapi mo le isi 3 tausaga.

E ui lava ina matagofie le ofo mai a le ‘au a Iapani, o le Kalapu lea a Kubota, e le o mana’o ai le tama 26 tausaga le matua, ua fiafia lava o ia e avea ma totino o le Wallabies, lea fo’i e avea ai le latou ‘au ma siamupini o le Iuni, le ‘au malosi a le Queensland Reds.

Ua fa’ailoa mai e le ARU, o le ali’i o Ioane, o le lona 21 ai lea o tama ta’a’alo a le Wallabies ua toe saini uma lava latou konekarate ma i latou.

E iva lelei sikoa a le ali’i o Ioane i ta’aloga faitaulia a le Wallabies e 21 e aofia ai ma lana taumafaiga mata’ina i le ta’aloga ma Wales i le tausaga 2007. Na tu malosi ina ia manumalo Ausetalia i le ta’aloga a le Tafatolu ma toe sikoa fo’i i le ta’aloga a le Wallabies e tatala aloaia ai le Ta’amilosaga o le Ipu o le Lalolagi i la’ua va ma Italia, ae na fa’amatu’u mai o ia i tua ona ua lavea lona vaematua.

Na toe ta’alo loa lea o ia i le ta’aloga mulimuli ma Aferika i Saute, ae na le mafai ona ia tatalia le faia’ina a lana ‘au ia Niu Sila i le to’a fa o ‘au pito i luga o le ta’amilosaga e saili ai ‘au e lua e fetaui mo le siamupini.