Ads by Google Ads by Google

TALA MAI LE PASEFIKA

Fuala’au Fa’asaina Kokeni Fa’afo’i i Ausetalia

I le fa’ai’uga lava o Novema 2012, ua fa’ataunu’u ai e le malo o Tonga le toe fa’afo’i uma lava o le tele o le kokeni na maua i luga o le va’a folau “JeReVe” lea e fa’apea o se papalagi Ausetalia e ona, ae o lona auva’a o se taule’ale’a mai Tonga.

O lea va’a na mafua ai fo’i ona faia se su’esu’ega tele a le vaega o leoleo nana mai Ausetalia i totonu o le Malo o Tonga, ona o tu’ua’iga lava e afua mai le uta kokeni tele lea sa maua ai, ae ua afua ai nei ona maua se tasi o le Palemene a Tonga, o le Nopele mai Vavau, ua molia i lona auai i le fa’auia mai o nei fuala’au fa’asaina i Tonga, ma le fa’amoemoe e fa’atauina ai.

Talitonu Rock ‘Duane Johnson’ Malosi o le Manu Samoa

Ua fa’ailoa mai le talitonu na’ua o se tasi ua lauiloa ai Samoa - ‘The Rock’Duane Johnson, i le malosi fa’apulusila o lo’o i le Manu Samoa pe a e talanoa loa i le ta’aloga Lakapi fa’avaomalo!

O lona talitonu fo’i lea i le malo o le Manu ua mafua ai sana fa’amatalaga, “E tauau e tu’u uma mea ua ou faia i le taimi nei, ae sauni e ta’alo Lakapi.”

Ua tatou iloa lelei, sa si’itia e lea alo o le atunu’u Samoa i le tulaga o Pi’iga Fa’apolofesa i luga o alaata o le Televise i le lalolagi, ma ua matua mautu ai le manatu o tagata, o lona igoa pi’i “The Rock” o se tagata sili ona tino lelei toe aulelei, e fa’asalala i ai aga a tama’ita’i.

Ua avea nei fo’i o ia ma se tasi e pu’e ona ata tifaga, ae le o ave’esea ai le lagona fa’a-Tama Samoa Moni lava lea, i le ta’aloga o le Lakapi Fa’avaomalo, lea e matua iloga ai le Manu Samoa i le pu’e mata’utia.

Lea ua fa’ailoa mai, sa a’oga o ia mo sina taimi i Niu Sila, ua mae’a fo’i ona ta’alo Lakapi ai o ia, ae o se taimi lea na ia iloa ai, o le matua laki lava na le lavea tauga ai a’o ta’alo Lakapi. Lea ua mae’a ta’alo i le American Football mo lona olaga a’oga o se talavou ua matua, uma lelei lea vaitaimi e le o lavea, toe pi’i fo’i lea mo se taimi umi, ae le’i afaina lava lona tino, ma ua toe matamata nei i le Lakapi i Egelani, “Oka, e leai se ta’aloga sili ona faigata e pei o le Lakapi.”

Sa ia fa’aalia fo’i, “E tele taimi matou te finau ai ma a’u uo mamae i Amerika i le va o le Football ma le Lakapi, ae ou fai i ai, ‘ave ese uma lava pulou ma safety guards na i tou tino, ae o ane la e fusu i le maso le Rug By ali’i, se’i fai po’o le a se umi e te fa’atau tutu ai i le malosi o le isi itu?”
O le mea e sili ona fia maimoa ai le tama o Rock, se o le Haka a Samoa ma le All Blacks - i’ina lava le mea e sili ona fa’aoso fiafia i le ta’aloga!

Tamaiti A’oga Tonga mo Iapani:

Mai Nuku'alofa, Tonga ua fa’ailoa mai ai e le nusipepa a le Matangi Tonga e to’a 22 le fanau a’oga mai Tonga ua mae’a fa’atulaga e a’oa’oina i Iapani mo le na’o le tolu lava vaiaso i lalo o se maliliega ma lea malo e fa’aigoaina o le “Kizuna Project.”

O  le aiaiga ua fa’atulaga ina ia mafai ona fa’aleleia atili tomai o le fanau a’oga mai Tonga, ae maise o le taumafaiga fo’i a malo e lua, ina ia fa’amautu le tulaga “iloa lelei”o Iapani e alo talavou o Tonga, ma ia fa’aleleia ai ala o fefa’ataua’iga ma isi tulaga o feuiuia’iga i le va o malo e lua i le lumana’i.

O le lumana’i o Tonga o lo’o i ai lea i a’ao ma le tomai o nei fanau pe a o’o ina tutula’i mai i latou e avea ma ta’ita’i o le latou malo i le lumana’i.

saunia: Leua Aiono Frost