Ads by Google Ads by Google

Tala mai le Fono Faitulafono

$35,000 MO LE MOTU O SWAINS

Ua i luma o le maota o sui se tulafono taufaaofi na faaulu e le faipule mai Swains, e talosagaina ai le faasoasoa atu o le tupe e $35,000 e faaopoopo i tupe mo Fela’uaiga mo Swains.

I se vaega o lenei tulafono o loo taua ai, talu ai le teena e le alii kovana o suiga sa faia e le Fono i le Paketi a le malo mo le tausaga tupe lenei 2012, ua leai ai se tupe o i ai i le taimi nei e faatupe ai felauaiga mo le motu, ma ua faamoemoe o le tupe lea o le a toe faatupu ai le tupe ua ave ese.

Ua i ai le faamoemoega o le a tauoloa lenei tulafono i le taimi lava e pasia ai e le fono ma sainia e le alii kovana.

I le paketi a le malo mo le tausaga tupe 2012, na aofia ai i totonu le $35,000 e faatupe ai felauaiga mo Swains, lea sa faamoemoe e faatupe mai totonu o Polokalame Faapitoa a le malo, peitai ina ua teena e le kovana se suiga sa faia e le fono e faaopoopo ai le  tupe i totonu o le vaega tupe mo Swains, na mafua ai loa ona teena uma lea vaega tupe.

O le komiti o le Paketi a le maota o sui ua taoto atu i ai le iloiloina o lenei tulafono.

PILI E FAATULAI AI LE MATAGALUEGA O FAAMATALAGA

Ua i luma o le Fono se tulafono na faaulu mai e le Ofisa o le Kovana, e talosagaina ai le faatula’iina o se isi Matagaluega fou a le malo ua taua o le Matagaluega o Faamatalaga.

O lea tulafono tau faaofi ua taoto atu i le komiti o Sailiga mo Alamanuia a le maota o sui mo le iloiloina.

O le matagaluega fou e pei ona faatulai e le alii kovana, o nisi o ana tiute tauave  e aofia ai le sainia lea o auala tau fesootaiga mo matagaluega uma ma ofisa o le malo, ina ia faigofie ai ona maua fesootaiga i totonu lava o galuega a le malo.

O nisi o ia tiute e aofia ai le faatinoina lea o fesootaiga vavalalata faaonapo nei i masini televavave, ina ia mafai ai ona faalautele le tomai ma le malamalama o tagata faigaluega a le malo.

O le masina o Setema na tea nei na faatulai ai e le kovana lenei matagaluega i lalo o sana poloaiga faalauaitele, ma talu mai lea taimi, o loo pisi le matagaluega i le faamautuina o nisi o ana tiute tauave e aofia ai ma le tau tuu faatasia o masini ma mea uma e faaaoga i ana galuega.

$2 MILIONA MO LE FALEMAI O LE LBJ

O le taeao nei lea ua faamoemoe e fesiligia ai e le komiti o le Sailiga o Alamanuia o le malo a le maota o sui, molimau mai le malo mo le tulafono tau faaofi lea ua i luma o le maota, e faasoasoa atu ai le aofai e $2 miliona e fesoasoani ai i le falemai o le LBJ i Fagaalu.

O lenei tulafono taufaaofi ua faamoemoe e faatupe mai i tupe tulei o le Feagaiga Osia mo tupe maua o le Tapa’a.

O lenei tulafono taufaaofi ua faamoemoe e aloaia i le taimi e pasia ai e le fono ma sainia e le alii kovana.

O loo i luma nei foi o le komiti o le paketi a le Senate sa latou pili tau faaofi e aiga lelei ma le tulafono lenei, e faasoasoa atu ai le $2 miliona mo le falemai, ma o loo fuafua e faatupe mai foi i le alagatupe lava lea e tasi, o le Feagaiga na osia mo le Tapa’a.

O molimau o le a fesiligia e le komiti a le maota o sui i le taeao nei e aofia ai le Teutupe a le malo ia Magalei Logovi’i, atoa ai ma le pule o le Ofisa o le TOFR ia Falema’o Pili, ma o le iloiloga ua faatulaga e faia i le itula e 8:30.