SAUNI FAIPULE FESILIGIA POLOKALAMA 1602

O le isi polokalama lea ua sauni alii faipule e fesiligia i le vaiaso fou, o le polokalama lea o lo o fa’atupe mai e le feterale, lea e fesoasoani ai i le fausiaina o fale e mau totogi ai tagata e vaivai le tamaoaiga.

O ni fa’asea ua i luma o le maota o sui, o lo o taua ai le tele o aiga ua mae’a ona tu’uina atu i ai nisi o vaega tupe mo lenei polokalama e amata fausia ai a latou fale, ma e oo mai i le taimi nei ua le maea galuega ona ua leai se tupe.

Na taua e nisi o alii faipule e faapea, afai o le faafitauli lea ua feagai ma i latou sa agavaa i le polokalame, o lona uiga e tatau ona sailiili pe i ai se mafuaaga.

O se tasi o faasea na taua e alii faipule, o fesili mai le atunuu poo ai ituaiga tagata e agavaa i lalo o le polokalame, ona o lea ua manino mai i nisi o finagalo o le atunuu, e fiu aiga lima vaivai e talosaga mo ni nonogatupe e le talia, ae o i latou o loo maua avanoa e nono mai ai tupe i le polokalame, o tagata e malolosi ma mautu o latou aiga.

O le mataupu foi lenei ua faatele ona fesiligia e nisi o le atunu i luga o le polokalame a le alii kovana, ona o le fia malamalama lava o le atunuu i le mafuaaga e le agavaa ai tagata lima vaivai, ae o i latou tonu ia na mafua ai ona aumai le polokalame.

O le tofa ia Lolo Moliga lea o lo o avea ma peresetene o le Faletupe o Atinae o le a molimau i le Aso Lulu o le vaiaso fou, e fa’atatau i lenei mataupu.

SAUNI FONO E ILOILO FINAGALO ENI FAATATAU FAAVAE

O le vaiaso fou lea ua faatulaga e le maota o sui e tatau ona maua ai sa latou lava feiloaiga e talanoa ma soalaupule ai se tusitusiga na tuuina mai e le alii faipule mai le Konekeresi, e uiga i le Faavae o le malo o Amerika Samoa ma nisi o fuafuaga i pili ua ia fuafua e faaulu i le konekeresi.

Ona o le taua tele o lenei mataupu e uiga i le talanoaina lea o le Faavae o le atunuu, na talosagaina ai e le fofoga fetalai o le maota ia Savali Talavou Ale le tatau lea ona faia se feiloaiga a maota e lua, e talanoa ma soalaupule ai le finagalo o le alii faipule ia Faleomavaega Eni, ina ia oo atui le taimi e malaga mai ai mo sa latou feiloaiga, a ua malamalama le fono i le aanoo le mataupu.

O le vaiaso fou lea ua faamoemoe e feiloai ai le maota o sui mo le talanoaina o le finagalo o Eni, ae lei mautu mai se finagalo a le maota maualuga.

FESILIGIA FAIPULE NONOGATUPE MO PISINISI

O le vaega tupe lea ua faamatuu mai e le feterale e fesoasoani ai i nonogatupe mo le atina’eina o pisinisi i le teritori, o se tasi lea o mataupu ua agai ai nei sailiiliga a le maota o sui, ina ua fesiligia e le toatele o faipule le mafuaaga ua tuuina atu ai vaega tupe o lenei polokalame i faletupe tua, ae ua le tuuina atu i le Faletupe o Atina’e a le malo o Amerika Samoa.

Talu mai le taimi na faalauiloa mai ai lenei polokalame, e le o utuva lava le fesiligi e alii faipule o le mafuaaga ua ala ai ona faia le faaiuga e tuuina atu ai le faasoasoani o lenei polokalame i faletupe tua.

Saunoa le alii faipule ia Puleitumalo Dick Koko, o le itu o loo fia malamalama ai lona sui faipule, poo a auala o loo faatautaia ai e faletupe tua ia ua tuuina atu ia i le vaega tupe nonogatupe mo pisinisi.

Sa ia taua, afai o loo faaaogaina e faletupe tua auala o loo latou tuuina atu ai nonogatupe i tagata lautele e aofia ai ma le pasene e toe totogi mo nonogatupe.

O le afioga i le alii faipule ia Toeaina Autele, Larry Sanitoa ma Taotasi A. Soliai isi faipule na o latou fesiligia le fofoga fetalai e uiga i lenei mataupu.

Na taua e afioga i alii faipule, afai o le polokalame na tuuina mai mo pisinisi, e tatau foi ona taulimaina e le faletupe o Atinae a le malo le faafoeina o lea polokalame.

O le aso Faraile o le vaiaso fou lea ua faamoemoe e taunuu ai i luma o le komiti o le Faagaoioigao le malo a le maota o sui le peresetene o le Faletupe o Atinae a le malo ia Lolo Moliga, mo le faamalamalamaina o lenei mataupu i luma o alii faipule.