Ads by Google Ads by Google

Tala mai le Fono Faitulafono

MANA’OMIA SE $50,000 FAAMAE’A AI GALUEGA FALE SAMOA I UTULEI

O se pili tupe ua tuuina atu e le alii koana i luma o le Fono Faitulafono, ua ia talosagaina ai le faamatuu atu o se vaega tupe e $50,000. e fesoasoani ai i le faamaeaina lea o le galuega o le Fale Samoa a le malo, lea o loo fausia ile malae ole Su’iugaula a le Atuvasa i Utulei.

I se tusi a le afioga i le matua ia Togiola Tulafono i taitai o le fono i le vaiaso na tea nei, sa ia taua ai le agai atu o foliga vaaia o le malae o le Suiga ula o le Atuvasa i Utulei i se tulaga matagofie, ona o lea ua toeitiiti maea le galuega o le Fale Samoa o loo fausiaina ai.

Sa ia taua foi e faapea, o le agaga maualuga o le malo, ia faatumauina pea le naunau e puipui  ma faataua tu ma agaifanua a Samoa, aua o lana aganuu lea e mamalu ai, peitai e le mafai ona taunuu lea fuafuaga pe afai e le maea le Faletele lea o loo faagasolo lona fausiaina i le taimi nei.

PASIA SENATE PILI TEENA AI MALOSI KOVANA

O le vaiaso na tea nei na pasia ai e le Senate le pili sa teena e le alii kovana, ina ia faaleaoga ai le malosi o loo i ai i le kovana na te teena ai se pili e pasia atu e le Fono, e silafia e le alii kovana e i ai ona faaletonu.

O le vaiaso nei la lea ua faamoemoe e taoto atu ai i le maota o sui le pili lea mo sa latou faaiuga, ma oo iina lea ua faamoemoe e maua mai ai se tulaga tonu o lea pili tau faaofi, pe finagalo le maota o sui e pasia pe leai foi.

O le pili na pasia e le Fono e faasoasoa atu ai le aofaiga e $60.3 miliona mo le Paketi a le Faalapotopotoga o le Eletise ma Suavai (ASPA) mo le isi ono masina ua teena e le alii kovana.

I se tusi a le afioga i le matua ia Togiola Tulafono i taitai o le fono sa ia taua ai e faapea, o le latou pasia o le paketi a le ASPA mo le isi ono masina, o le a feteenai lea ma nisi o tulafono o loo maua mai ai e le ASPA tupe mai fafo e fesoasoani ai i lana galuega, e le gata foi i lea, o le a feteenai foi le tulafono lea ua pasia ma le tulafono na faavae ai le ASPA, e aofia ai le tuu atu o le malosi i lana komiti faafoe na te pasia ai le paketi a le ASPA

O le vaiaso na tea nei na toe faaulu ai e le Senate le pili lea ma ua latou pasia i le faitauga faatolu ma le faamoemoe, o le taeao ananafi na pasia ai e le maota o sui i lona faitauina faalua lea tulafono ma le faamoemoe e faitau tolu i le taeao nei.

O le isi pili na teena e le alii kovana ao lea ua toe faaulu e le Senate, o le pili e faasoasoa  atu ai le $1.6 miliona e faatupe ai galuega a le falemai o le LBJ, lea e aofia ai le tuuina atu o le $800,000 e fesoasoani ai i gaioiga a le falemai, ae o le isi $800,000 e tuuina atu e fesoasoani ai i le faafetauiina o tupe o loo tuuina mai e le feterale e fesoasoani ai i le toe faaleleia o mea sa faaleagaina i le galulolo.

MANAOMIA SE $50,000 FESOASOANI AI AU FOOTBALL FANAU AOGA

Ua i luma o le Fono Faitulafono se pili tupe na tuuina atu i ai e le kovana sili, e talosagaina ai se $50,000 e fesoasoani ai i le faatupeina o le au lakapi football a fanau aoga i lalo o le 19 tausaga le matutua, lea ua faamoemoe e malaga atu e tausinio i le taamiloga o le a faia i Ausetalia ma Texas i ni nai masina o loo muamua.

O le $50,000 lea ua talosagaina e le alii kovana, o loo ia fuafua e faatupe mai i aofaiga e $253,000 o vaega tupe mai polokalame faapitoa, lea sa ia teena lona faasoasoaina mai le paketi na pasia a le Fono Faitulafono, mo le tausaga tupe lenei 2012.

Na faailoa e le alii kovana i taitai o le fono i lana tusi e faapea, e taua tele le fesoasoani a le malo mo le auina atu o le au lakapi a fanau aoga, ina ia mafai ai ona faailoa ma faalautele le taleni a fanau aoga i atunuu ia ua faamoemoe e faataunuu ai le taamilosaga.

Ua i luma nei o le komiti o le paketi a le maota o sui lenei tulafono ma le faamoemoe o le aso Tofi e faia ai le iloiloga mo le fesiligiaina o molimau a le malo.