Ads by Google Ads by Google

Tala mai le Fono Faitulafono

FAAMUTA MALO LE TOE AVE’ESE O LE LAFOGA 2%

Na faamaonia e le Teutupe a le malo i luma o le maota o sui e faapea, o totogi a le malo lea o le a maua i le aso, e le toe ave’ese ai se vaega tupe mo le lafoga e 2% lea sa pasia mai e le Fono i le tausaga na te’a nei, e tipi mai lea i totogio tagata faigaluega uma lava i le teritori.

Na faamanino e le afioga Magalei Logovii i luma o le komiti o le Paketi a le maota o sui e faapea, na mafua ona tipi pea le lafoga lea i le isi piriota totogi a le malo lea na mae’a atu, ona sa aofia ai i le piriota totogi lea a le malo itula faigaluega mai le masina o Tesema.

O le lafoga na maea le aoga i le aso  31 Tesema 2011 peitai o lea ua finagalo le Fono Faitulafono e toe faaauau, ae tuu atu e fesoasoani ai i le falemai o le LBJ, ma o lea fuafua ga ua faalogoina ai le toatele o le atunuu ua faaalia lo latou tete’e i le toe faaauauina o lea lafoga.

PASIA FAIPULE TOFIGA KOVANA MO LEALAO PURCELL JR

Na fulisia finagalo o afioga i alii faipule i le aso Faraile na te’a nei e ala i le latou palota e 13-0, e lagolago tofiga a le afioga i le kovana sili mo le tofa Lealaosoloata Melila Purcell Jr, e avea ma Faatonusili o le Matagaluega o Faatoaga.

O lea faaiuga a le maota o sui na faia lea i le mae’a ai o se iloiloga sa valaauina e le komiti o Faagaioiga a le malo, lea sa fesiligia ai le tofa Lealao i nisi o fuafuaga ua ia faataoto mo le manuia o le  Ofisa o Faatoaga faapea ai le aufai faatoaga.

O nisi o mataupu sa taula’i i ai fesili a afioga i faipule e aofia ai auala ua faataoto e faaleleia ai tulaga o faatoaga i le atunuu, ona o se tasi lenei o mataupu e masani ona faasea i ai le aufai faatoaga i nisi o faipule, e oo foi i luga o le polokalame a le alii kovana i faaiuga o vaiaso taitasi, o le faaletonu lea o le tautua a le Ofisa  o Faatoaga, taugata vailaau, ma le tele lava o taimi e leai ni vailaau e maua i le Ofisa o Faatoaga.

Saunoa le faatonu filifilia, ua ia sauni e tuuina atu lana lagolago ma lona tomai e faaleleia ai manaoga e pei ona tulai mai i le aufai faatoaga.

Na manino foi i le taimi o le iloiloga lea, o le tofa Lealao o se alii faifaatoaga, e i ai lana ma’umaga talo, toga fa’i, toga esi atoa ai ma manioka.

O le vaiaso nei lea ua faamoemoe e iloilo ai e le maota maualuga le suafa o le tofa Lealao.

I se tusi a Kovana Togiola Tulafono i le Fofoga Fetalai o le maota o sui sa ia taua ai e faapea, o le tofa Lealao sa galue o se Sooupu mo le Ofisa o Faatoaga i se taimi e lei mamao atu, lea sa ia aoaoina ai ma unaia tagata i auala e atina’e ma amata ai ni a latou togalaau ma faatoaga.

Ao lei galue o ia i lea galuega, sa avea o ia o se alii pule i le vaega o Tagata Faigaluega a le kamupani o le StarKist Samoa, sa avea ma faufautua o le polokalame o le soifua maloloina, atoa ai ma le maua o le tino malosi mo le Ofisa o Aoga.

O loo ia umia le faailoga o le BA mai le Iunivesite o BYU, atoa ai ma le faailoga o le M.A i mea tau aoaoga mai le Iunivesite o Hawaii. E 20 tausaga sa tautua ai o ia mo le Ami Faaleoleo.

MANATUA SENATE AFIOGA SENATOA SEUI LAAU I SE TULA’I FAAALOALO

O se tula’i faaaloalo na faia i totonu o le maota maualuga i le taeao o le aso Faraile na te’a nei, e manatua ai e afioga i Senatoa le tautua a le afioga i le alii Senatoa ua tuumalo o Seui Laau Sr, ma faailoa ai le misia e le maota maualuga o lenei taitai o le atunuu.

O se ula sa i luga o le laulau a le afioga Seui i le aso o le aso Faraile, ao le’i valaauina e le alii peresetene o le Senate ia Gaoteote Palaie Tofau le maota ina ia tutulai mo ni sekone e faailoa ai lo latou faaaloalogia o le alii Senatoa ua tuumalo.

O Senatoa Seui na valaauina e le Atua i le po o le aso Tofi o le vaiaso na tea nei i le maota gasegase o le LBJ i Fagaalu, ao i ai o ia i le potu tigaina.  E tuumalo Seui ua 69 tausaga o lona soifua.

O le afioga Seui sa avea ma taitaifono o le komiti o le Faagaioiga o le malo a le maota maualuga, atoa ai ma nisi o komiti o loo avea ai o ia ma totino.

Ia faamaise le Agaga Paia o le Atua i le paia o aiga faanoanoa ona o lana valaau paia i lana auauna.

PASIA FAIPULE MA SENATOA A LA PAKETI MO LE ASPA

O le aso Faraile na te’a nei na pasia ai e faipule ma Senatoa, a la pili mo le paleti al e Faalapotopotoga o le Eletise ma le Suavai (ASPA) mo le isi 6 masina, ma ua faamoemoe e tatau ona maea galuega a le fono faitulafono i le aso a taeao, ua la pasia le paketi a le ASPA ma le faamoemoe ia tuuina atu i le  alii kovana mo le sainia ao lei mae’a galuega i le aso Lua o le vaiaso nei, le 31 Ianuari.

O le paketi lea ua pasia e faipule ma Senatoa o loo faasoasoa atu ai le aofaiga e $60,373,010 mo le ASPA seia oo atu i le aso 31 Iulai.

O le paketi lea ua pasia e maota e lua ua faamoemoe e faatupe ai gaioiga a le ASPA mo le isi ono masina, e aofia ai le $46.4 miliona ua faamoemoe e tuu atu mo le tautua a le Eletise, $6.03 miliona mo le Suavai Taumafa, $6.03 miliona mo le Lapisi, ma le $1.8 miliona mo le Suavai Lafoa’i.