MANANA’O FAIPULE E AAMI LE FAATONU OFISA GALUEGA

Ua a’e se manatu i afioga i Faipule, ina ia ‘a’ami le Fa’atonusili o Galuega a le malo, mo se fa’amatalaga, ona o le tele o fa’asea ua o’o atu i o latou ofisa, i tulaga fa’aletonu o i ai vaega ese’ese i luga o le alatele.

E le o se mata’upu fou lenei i totonu o le Maota o Sui, ma na toe fa’atula’i e le ali’i faipule ia Puleleiite Li’amatua Tufele i le aso ananafi, ona o fa’alavelave lea na tofu ai le pasi mai i Aoa i le sami i Lauli’i, i le vaiaso na te’a nei ma manunu’a ai le pasese e silia ma le to’a 20.

Na saunoa Puleleiite, o lo o ta’ua i ripoti ua o’o atu ia te ia, o le fa’aletonu o le auala na mafua ai ona lavea le pasi.

Na talosaga Puleleiite i le taitaifono o le komiti o Galuega Lautele a le maota o sui ia Simei Pulu, ina ia fai se fuafuaga e fesiligia ai le Matagaluega o Galuega mo se auala e foia ai faafitauli i auala, pe afai ua le mafai ona faaleleia atoa magaala i le atunuu.

Na faamaonia mai e Simei i luma o le maota, o le vaiaso fou lea o le a aami ai le faatonusili ia Taeotui Punaofo Telei mo le mataupu e uiga i auala.

E tusa ai ma se faamatalaga na tuuina mai i se molimau faatuatuaina sa taua ai e faapea, na faailoa e le alii ave pasi o le pasi na lavea, o Opetaia Farani e faapea, o le faalavelave na mafua mai ina ua oso le pa’u o le pasi i se omo tele lava ma motu ai le foeuli o le pasi.

SAUNI KOMITI ILOILO TOFIGA A LE ALII KOAVNA

O le taeao nei lea ua fa’atulaga e le komiti o Fa’agaioiga o le malo a le maota o sui, e iloiloina ai tofiga a le alii kovana mo Ivy Aiumu-Taufaasau e avea ma Fa’atonusili o le Ofisa e Pulea Oloa a le malo, atoa ai ma Lealaosoloata Melila Purcell Jr e avea ma Fa’atonusili o le Matagaluega o Fa’atoaga a le malo.

E tusa ai ma se tusi na tuuina atu e le alii kovana i taitai o le fono i le aso 10 Ianuari o loo ia taua ai e faapea, o Taufa’asau o lo o galue o le faatonu le tumau o le Ofisa e pulea Oloa a le malo, talu mai lava le taimi na tu’umalo ai Tauiliili P. Tervola i le tausaga na te’a nei.

O Taufa’asau sa galue i le Matagaluega o le Navy a le malo tele mo le silia i le 22 tausaga.

O le tofa ia Lealaosoloata o lo o avea ma faufautua i nisi o polokalama a le Matagaluega o Fa’atoaga.

FESILIGIA SANITOA IUGAFONO NA PASIA FONO E SUI AI FA’AVAE

Ua talosagaina e le afioga i le alii faipule ia Larry Sanitoa le Fofoga Fetalai o le maota o sui, i se avanoa e mafai ai ona toe mulimulita’i e le Fono sa latou Iugafono ua maea ona pasia i le tausaga na tea nei, e fa’atulaga ai se suiga i le Fa’avae o Amerika Samoa, e ala i le fa’aleaoga o le malosi a le kovana e te’ena ai mataupu e pasia atu e le fono,  e aunoa ma se gaioiga a le Failautusi o le Iinteria e toe faia i ai.

Na saunoa Sanitoa, e taua tele lenei mata’upu, aua o se tasi lenei o mata’upu sa aofia i suiga sa taumafai atu i le fono o le Fa’avae i le 2008, peitai sa te’ena e le atunu’u, ona o le toatele sa le’i malamalama i le tele o suiga sa faia e le Fono.

Na saunoa le alii faipule mai le itumalo o Tualauta, afai ae toe silasila totoa i ai le fono i le mataupu lenei, e talitonu ai lona taofi o se taimi talafeagai lenei ma lelei mo le toe fesiligia, aua o lea ua i ai lona talitonuga e toatele naua tagata o le atunuu ua malamalama i le mataupu e uiga i le Faavae.

O le Iugafono Soofaatasi lenei a le Fono ua maea ona pasia ma o loo i ai nei i luma o le alii kovana i le taimi nei.

Na lagolagoina e le afioga i le Fofoga Fetalai ia Savali Talavou Ale le finagalo o le alii faipule ia Sanitoa e uiga i lenei mataupu, aemaise ai le talitonuga i le toatele lea o le atunuu ua malamalama ma silafia le aano moni o taumafaiga i suiga o le Faavae.

Saunoa Savali Talavou Ale, o le Iugafono Soofaatasi lenei ua uma ona pasia e le Fono, peitai e lei tuuina mai ai lava se faaiuga a le alii kovana.