AMATA ILOILOGA PAKETI ASPA

O le 9:00 i le taeao nei lea ua faamoemoe e tatala aloaia ai Tauaofiaga a Maota e lua o le Fono Faitulafono, ona soso’o ai loa lea ma le iloiloga tuu faatasi mo le Paketi a le ASPA, lea ua faatulaga i le 9:30.

O le iloiloga o le a taitaia lea e taitaifono o Komiti o Paketi a maota e lua, le afioga i le alii Senatoa ia Lemanu Peleti Mauga ma le alii faipule ia Vailiuama Steve Leasiolagi.

O le taimi nei, e na o le 4 masina o le paketi a le ASPA sa pasia e le fono i le aofai e $30.8 miliona, ma ua faamoemoe le fono e tatau ona latou pasia le paketi a le ASPA ae le’i mae’a le masina lenei o Ianuari.

O se tasi o atugaluga na faaleo e le afioga i le alii Senatoa ia Galea’i Tuufuli, o le suia lea o le auala e feiloai ai le fono ma le ASPA, e ala i le valaaulia na o le pulesili, teutupe, atoa ai ma se tagata mai le pulega e mafai ona tali mai i fesili a le fono, ae aua le toe aumaia sui o le Komiti Faafoe, leaga ua “tiga mata” o le fono e vaavaai atu i ai i o latou uiga “fia tagata,” ae o nisi o sui o le komiti faafoe ua leva ona maea taimi e avea ai i latou ma totino o le komiti.

Peitai na saunoa afioga i le Senatoa ia Fonoti Aufata, e taua foi le aofia ai ma sui o le komiti faafoe a le ASPA i le iloiloga, atonu e mafai ai ona o latou tali mai i nisi o fesili e fia malamalama i ai le fono.

Saunoa Gaoteote Palaie Tofau, o le tele o taimi ave ai le valaaulia i le ASPA mo se iloiloga, e na o i latou lava e faauluulu i ai le faatautaiga o galuega a le ASPA e valaaulia, peitai o le mea ua maitauina i le iloiloga mulimuli na te’a atu nei, e valaaulia atu na o i latou o loo avea ma taitai, ae tau fai o mai uma mai ma “Joe, Simi ma Toma” e fai ma sui o le ASPA.

PILI E MAUA AI ITU MANUMALO TUPE MO MATAUPU O SUAFA MATAI

O le taeao o le aso Tofi o le vaiaso nei ua faamoemoe e iloilo ai e le komiti o Mataupu Tau Samoa a le Senate le pilii ua i luma o le komiti, e mafai ai ona toe maua e le itu ua manumalo i se faamasinoga o se suafa matai, tupe uma sa faaalu i le faamasinoga, pe afai ua faia se faaiuga a le faamasinoga maualuga e le mafai ai ona toe apili lana faaiuga ua tuuina mati, ma o lea tupe e toe totogi atu e le itu ua faiaina.

O le komiti a le afioga ia Avegalio Aigamaua lea o le a iloiloina lenei tulafono taufaaofi, lea sa faaulufaleina e le afioga i le alii Senatoa ia Lualemana Faoa.

TALI MATAGALUEGA O AOGA I MANAOGA TULAI MAI I AOGA ATUNUU

I se saunoaga manino mai le taitaifono o le Komiti o Aoga a le maota o sui ia Lemapu Suiaunoa Talo i le aso Faraile na te’a nei, sa ia taua ai le taumafai o le Matagaluega o Aoga a le malo i le malosi e gata ai, ina ia fai le mea sili e tali atu ai i manaoga o aoga uma lava i le atunuu.

Saunoa le alii faipule, o le vaiaso nei lea ua faamoemoe e taunuu mai se container o nofoa ma kesi aoga mai fafo, ma le faamoemoe e tufa ma faasoa atu i aoga o loo manaomia kesi ma nofoa e faaaoga e le fanau aoga.

E ese mai ai i tulaga o sapalai nei, o loo taumafai malosi foi le Matagaluega o Aoga e tali atu i manaoga mo faiaoga, ina ia mautinoa e leai se tama poo se teine aoga e le aoaoina o ia i totonu o le potu aoga ona ua leai se faiaoga.

Ae mo le mataupu i le kolisi tuufaatasi, na faamaonia mai ai e le alii faipule le sologa  lelei o fuafuaga uma ma galuega faatino a le kolisi i le taimi nei, e le o i ai se fuafuaga e ono faia sa latou solotete’e poo le vaea foi o nisi o faiaoga, e pei ona o ni ripoti sa  tuuina atu i luma o le maota i le vaiaso na te’a nei, ona o tulaga faaletonu tau tupe o loo feagai ma le kolisi.

O lea saunoaga mai ia Lemapu, o sana tali atu lea i le tele o faasea ma atugaluga ma nisi o faipule i tulaga faaletonu o loo i ai aoga i le atunuu, i le manaomia ai lea o kesi ma nofoa, o faiaoga atoa ai ma faafitauli o loo feagai ma le kolisi.