Ads by Google Ads by Google

Tala mai le Fono Faitulafono

IUGAFONO LAGOLAGO AI FAAIUGA FALEOMAVAEGA

 

Ua i luma o le maota o sui se i’ugafono e faailoa ai lo latou lagolagoina o le tete’e a le alii faipule i Uosigitone ia Faleomavaega Eni Hunkin, lea fo’i ua lagolagoina e le alii kovana ia Lolo Matalasi Moliga, ina ia aua ne’i toe faia ni suiga i le tulafono lea e faatau ai taumafa mo polokalame a aoga i totonu o setete ma teritori e aofia ai ma Amerika Samoa, faapea ai kamupani tuna i le atunuu.

 

I se tino o lenei iugafono o lo o taua ai e faapea, i tulafono o lo o faamalosia e le Matagaluega o Fa’atoaga a le malo tele (USDA), o lo o latou faatulaga ai tulafono ma ta’iala mo le faia o polokalame e aafia ai taumafa mo fanau atoa ai ma pepa meaai lea o lo o gaosia mai e le kamupani i’a o le StarKist Samoa (pouched tuna fish).

 

O se tulafono fou a le fetarale, o le a vaaia ai ni tulaga faaletonu i le tulafono o polokalame o taumafa a le fanau aoga i le malo tele, ma e ono avea lea ma itu e vaivai ai ma le faatauina atu o le oloa o le tuna o lo o gaosia i Amerika Samoa.

 

E talitonu le maota o sui e pei ona taua i le iugafono lenei sa fa’aulu i le aso Gafua, o le a tele le aafiaga o le oloa gaosi a le StarKist Samoa i se vaega o le tulafono a le fetarale ma faaititia ai le oloa e faatau atu i totonu o le malo tele, ma aafia ai fo’i le tamaoaiga o Amerika Samoa faapea ai tagata faigaluega.

 

Ua tutu faatasi nei le Fono Faitulafono e pei ona taua i lenei iugafono, e lagolago le faatuiese a Faleomavaega lea fo’i ua lagolago e le alii kovana, ina ia faatumauina pea le lelei o le taumafa o le tuna i le 100%, ae aua ne’i toe faia i ai ni suiga e ono faavaivaia ai le tulaga lelei o nei taumafa.

 

TAUNUU ISI TOFIGA A LE KOVANA I LE FONO

 

E lua isi tofiga a le afioga i le alii kovana ua i luma nei o le Fono Faitulafono, e ui o lea ua alo atu le Fono mo lana malologa e lua vaiaso.

 

O ia tofiga e lua a le tofa Lolo Matalasi Moliga e aofia ai le tofiaina o Jonathan Fanene e avea ma Faatonusili o le Ofisa o Tupulaga Talavou, Tina ma Tama’ita’i, faapea ai ma i latou e to’afitu ua filifilia e avea ma Totino o le Komiti Faafoe a le Litaea o le malo.

 

I se vaega o le tusi a Lolo sa tuuina atu i ta’ita’i o le Fono Faitulafono e faatatau ia Fanene, sa ia taua ai e faapea, o se tasi o itu e maualuga ai le auaunaga a lenei alo o le atunuu, o lona mafai lea ona faia auala e siitia ai tulaga maualuga e mafai e tupulaga talavou a Amerika Samoa ona ausia, e le gata i taaloga ae faapea fo’i i aoaoga.

 

O Fanene e pei ona taua e Lolo, sa taalo mo le au lakapi faa Amerika (NFL) o le Cincinati Bengals, ma ua toe taliu mai i le atunuu e tautua lona atunuu ma lona aiga, ma e ui e leai sona agavaa i tulaga o galuega faalemalo, ae o le tele o lona auai i polokalame tau i tupulaga talavou e pei ona taalo ai i Amerika, ua mafai ai ona ia faatulaga auala e siitia ai le soifua aoaoina o fanau a le atunuu i tulaga tau taaloga.

 

Ua i ai le manatu o le masina fou pe a toe a’e atu le Fono mai lana malologa, o le a faatulaga ai loa taimi ma aso mo iloiloga a maota e lua faasaga ia Fanene.

 

Mo tofiga a le kovana mo le Komiti Faafoe a le Litaea, e to’a fitu i latou ua tofia e Lolo e avea ma totino o le Komiti a le Litaea, ma ua faamoemoe le Fono latou te iloiloina ia tofiga pe a toe a’e mai i lana malologa.

 

O i latou e to’a fitu e aofia ai Dr. Falema’i ‘Phil’ M. Pili, Sonny Thompson, Toafala Iafeta, Aloma E. Aumau-Langford, Lauvao Stephen Haleck, Maaelopa Bob Tuiasosopo ma Faoa Aitofele Sunia.

 

Na taua e Lolo i lana tusi i taitai o le fono e faapea, o Aloma ma Faoa o le a ta’i 2 tausaga e galulue ai i le komiti o le Litaea, o Toafala ma Maaelopa e ta’i tolu tausaga e galulue ai, o Sonny ma Lauvao e ta’i fa tausaga, ma Dr. Falema’o e 5 tausaga.

 

Na taua fo’i e le alii kovana e faapea, o i latou ua ia filifilia ua lava lo latou tomai e faatinoina ai lenei tofiga, ma ua tele fo’i tausaga o latou galulue i galuega a le malo atoa ai ma pisinisi tua.