Tala mai le Fono Faitulafono

MALOLO LE FONO MO LE 2 VAIASO

 

E lua vaiaso lea ua malolo ai le Fono Faitulafono mai ana galuega masani, ma le faamoemoe e toe amata ana galuega i le aso Gafua, Fepuari 10. O le vaiaso na te’a nei na pasia ai e maota e lua o le Fono Faitulafono se i’ugafono malilie faatasi, e aloaia ai le alo atu o le Fono mo ana malologa.

 

E ui o lea ua alo atu le Fono mo lana malologa aufaatasi, ae o lo o i ai lava iloiloga a ni isi o Komiti a maota ta’itasi ua fa’atulaga mo le vaiaso nei, e aofia ai le iloiloga a le maota o sui mo le Komiti o le Soifua Maloloina, faapea ai ma le iloiloga a le Senate mo le Komiti o le Faagaioiga o le malo.

 

Sa fautuaina e ta’ita’i o maota e lua ia ta’ita’i o komiti ta’itasi a le Fono ina ia faaauau pea a latou galuega ma suesuega, i ni isi o mataupu e fia maua i ai so latou finagalo, e ui o lea ua alo atu le Fono mo lana malologa.

 

I luma o le maota o sui, na fesiligia ai e le afioga i le alii faipule ia Fetui Fetu Jr le Fofoga Fetalai o le maota ia Savali Talavou Ale, pe talafeagai ma tulafono a le maota le faia o iloiloga a komiti a’o lea ua aloaia le malologa a le Fono mo le lua vaiaso.

 

Ae na faamanino e Savali e faapea, e leai se tulafono e taofia ai komiti mai le faia o a latou galuega i le taimi e malolo ai le Fono, o le malosi’aga fo’i e faia ai iloiloga a komiti i ni mataupu a’o malolo le Fono, e auala mai i le ta’ita’i komiti ae le o se fa’aiuga e avatu e le ta’ita’i o le maota.

 

I luma o le Senate, na tula’i ai le afioga i le alii senatoa ia Soliai Tuipine Fuimaono ma talosaga se i’ugafono e faataga ai ona faia iloiloga a komiti, ona o lea ua alo atu le Fono mo lana malologa e lua vaiaso, a’o lea e i ai iloiloga o lo o faatulaga a ni isi o komiti a le maota.

 

Saunoa Soliai e faapea, e tatau ona i ai se i’ugafono e faaulu ina ia mafai ai ona faatino galuega a komiti, ina ia tusa ai ma tulafono a le maota, ae na saunoa le afioga i le alii senatoa ia Laolagi Fonoti Savali Vaeao e faapea, e le tau mana’omia se i’ugafono e fa’ataga ai ona faia iloiloga a komiti, aua o matafaioi na a soo se komiti a le maota, o le faia o a latou iloiloga ma suesuega i mataupu e manuia ai le atunuu, tusa lava pe malolo le Fono.

 

Na pau le komiti e manaomia ai ona faaulu se i’ugafono ina ia mafai ai ona nofoia e pei ona faamanino e Laolagi i luma o le maota, o le Komiti Su’esu’e a le Senate (SIC), ona e le o i ai le komiti lena i totonu o komiti ta’itasi a le maota ua maea ona fa’atulaga ma tofia.

 

FESILIGIA FAIPULE SUIGA A LE LBJ

 

Mai le tele o suiga ua faia e le pulega a le falema’i o le LBJ i Faga’alu, o se tasi o suiga ua fesiligia e ni isi o afioga i faipule, o le suiga i le fa’aogaina o le Falesa a le Falema’i e faia ai fonotaga a Teine Foma’i i aso Lulu o vaiaso ta’itasi, ma ua avea ma itu ua taofia ai le atunuu mai lo latou fa’aaogaina o le malumalu mo taimi o sauniga o maliu.

 

Na taua e le afioga i le ali’i faipule ia Vailoata Amituana’i Eteuati e faapea, ua to’atele ni isi o le atunuu aemaise ai lona itumalo ua fa’asea i le suiga lea ua faia e le falema’i, i taimi ma aso e faaaoga ai le Falesa mo maliu i le falema’i.

 

“O le faafitauli lea ua tula’i mai, afai e maliu se tagata o se aiga i le taeao o le aso Lulu mo se fa’ata’ita’iga, e fa’atali lava le aiga se’i vagana ua maea le fonotaga a Teine Foma’i, ona faatoa avanoa lea o le malumalu i le aoauli, ae na mafua ona fausia le malumalu lenei mo le fa’aaogaina e le atunuu i taimi o maliu atoa ai ma isi sauniga taua mo i latou e pele ua maliliu,” o le saunoaga lea a Vailoata.

 

O le isi suiga ua faia e pei ona faailoa e Vailoata i luma o le maota, ua suia le igoa o le malumalu mai le LBJ Chapel i le Community Center, ma o se suiga e tatau fo’i i le atunuu ona silafia, pe aisea ua faia ai nei suiga.

 

Na taua e le taitaifono o le Komiti o le Soifua Maloloina a le maota o sui ia Maugaoalii Leapai Tusipa Anoa’i e faapea, talu ai o ni isi o tulafono mai le vaega a le feterale o lo o faatupeina ni isi o auaunaga ma tautua a le falema’i o le LBJ, e mana’omia ai le tatau lea ona fono Teine Foma’i fa’atasi i le vaiaso, ina ia mafai ai ona ausia ni isi o ta’iala o lo o mana’omia mo le faatinoina o a latou tiute tauave.

 

Talu ai e leai se isi nofoaga e mafai ona faatinoina ai nei fonotaga, o le mafuaaga lena ua fa’aaoga ai e Teine Foma’i le malumalu a le falema’i mo a latou fonotaga.

 

Mo le faamaninoina atili o lenei mataupu, o le a maua i le iloiloga lea ua faatulaga mo le taeao o le aso Tofi o le vaiaso nei i le itula e 9:00, lea o le a fesiligia ai e le komiti a le maota o sui le Pulesili a le LBJ atoa ai ma le Ta’ita’ifono o le Komiti Faafoe, e faatatau i ni isi o suiga e pei ona fia malamalama i ai ni isi o faipule.

Comment Here