PASIA SENATE PILI TUPE $100,000 A LE KOVANA

E 12-2 le palota na pasia ai e le Senate i le vaiaso na tea nei le pili tupe a le alii kovana lea foi na pasia e le maota o sui i le vaiaso na tea nei, e faasoasoa atu ai le $50,000 e fesoasoani ai mo le au football a tamaiti aoga e i lalo o le 19 tausaga, ma le isi $50,000 e faamaea ai galuega o le fale Samoa a le malo, lea o loo fausia i Utulei i le taimi nei.

O le agaga o le pili tupe na faaulu e le afioga i le matua ia Togiola Tulafono, ia i ai se fesoasoani a le malo e tuu atu i le au taaalo football a fanau aoga, e fesoasoani ai i le latou malaga atu i Texas, mo le sailiga siamupini a le lalolagi lea o le a faia ai i le faaiuga o le masina nei.

O le masina na tea nei na toe taliu mai ai i le atunuu le au football a le fanau aoga mai le latou malaga i Brisbane i Ausetalia mo se tasi o ana taaloga faitauina, lea na manumalo ai i le au fili a Ausetalia i ai e 93-7.

Ae mo le  isi $50,000 lea ua faamoemoe e faamaea ai galuega o le fale Samoa i Utulei, e ui sa tele i ai fesili a Senatoa ma Faipule ona o le auala sa faaaoga i ai e le malo le $250,000 na foai mai e le Initeria e faatupe ai le galuega, peita’i o lea ua faailoa le lagolagoina e le fono o lenei faamoemoe e ala i lo latou pasia o le pili.

I le maota o sui na saunoa ai le alii faipule ia Taotasi Soliai e faapea, afai e i ai se isi mea e tatau ona ave i ai le faamuamua a le Fono, o le tuuina atu lea o se fesoasoani tupe mo le falemai i Fagaalu, ina ia mautinoa e sologa lelei galuegaa le falema’i mo lana tautua i le atunuu.

O lagona foi ia na faaalia e nisi o faipule e aofia ai Vaamua Seseparasa ma Tapumanaia Galu Satele Jr ina ua felafolafoa’i le maota e uiga i lenei mataupu, ina ia ave le faamuamua a le Fono i le falemai ma tulaga faaletonu o loo i ai, ona faatoa aapa atu ai lea i isi manaoga o loo mulimuli mai.

Ae i le maota maualuga, na fesiligia ai e Malepeai Setu le tupe na aumai e le Initeria e fausia ai le fale Samoa lea e lei mae’a lava e oo mai i le taimi nei.

Saunoa Malepeai e faapea, ua uma ona ia fautuaina le au tufuga ina ia toe silasila i le fausaga o le fale Samoa ua maea ona fausia, ona o le tele o taimi afai e malosi timuga, e alu uma i totonu le susu ona e le o i ai ni faataumata i autafa e taofi ma pupuni ai le pisi.

E to’a 6 faipule na palota leai ina ua palota e le maota o sui le pili tupe lea a le kovana i le vaiaso na tea nei, ae lua palota leai a le Senate, o palota leai a le Senate na maua mai lea i le afioga i le alii Senatoa ia Velega Savali Jr ma Fuata Dr. I’atala.

MALOLO GALUEGA A LE FONO FAITULAFONO

O le aso Faraile na tea nei na maea aloaia ai galuega a le Fono Faitulafono, mo lana Tauaofiaga lona tolu i le Nofoaiga lona 32 lenei o loo nofoia, i le maea ai lea o aso e 45 e pei ona faatulaga mai i le Faavae sa galulue ai maota e lua, i le tau sailiina lea o ni fesoasoani mo le atunuu, ae maise ai nisi o mataupu e pei o pili tupe mo le falemai ma fesoasoani mo le malo.

O se tauaofiaga ese lenei a le Fono Faitulafono ua maea lelei aso e 45 e le’i i ai se malologa e pei ona masani ai i le tele o tauaofiaga ua tuna’i.

I le tapunia ai o galuega a maota e lua, na faafetaia ai e taitaifono afioga i Senatoa ma Faipule ona o galuega fita sa galulue i ai i masina amata o lenei tausaga.

Na saunoa faafetai le alii Peresetene o le Senate ia Gaoteote Palaie Tofau i afioga i Senatoa, ona o galuega lelei ma le mae’ae’a sa galulue ai mo se manuia o le atunuu.

“Ou te faafetai atu ona o lea ua maea aloaia galuega o lenei foi tauaofiaga, e lagona ai le agaga fiafia ona o le tele o mataupu ma mea taua sa tatou lalafo i ai aua se manuia o le atunuu, lea ua mafai ai ona tatou pasia nisi o galuega e tali atu ai i le atunuu o loo tagi mai,” o le saunoaga lea a Gaoteote.

Sa ia faailoa i Senatoa uma e faapea, talu ai e lei taunuu atu se faaaliga mai le kovana mo sana fono faapitoa, e i ai le manatu o le a toe fesootai le maota pe afai e valaau e le kovana se fono faapitoa.

O le lagona lava foi lea na momoli e le Fofoga Fetalai ia Savali Talavou Ale agai i afioga i faipule ia ua tapunia galuega a le maota o sui. E le gata sa ia faafetaia faipule e tusa ai o galuega lelei ma le maeaea ua faia mo le falemai ma le atunuu, ae sa ia momoli ai foi malui puega pe afai sa i ai se taimi na lape ai le taitaiga o le galuega faapea ai ma nisi o faaiuga fai.

“E ui o loo i ai nisi galuega a le maota e lei maea, peitai o nisi o mataupu ua tatou pasia ua avea lea ma auala e ufiufi ai faafitauli ma tulaga pagatia o loo feagai ma le falemai i le taimi nei, e faafetai atu ai i la outou tofa saili, lea ua a’e malo i lenei taeao,” o le fetalaiga lea a le tofa Savali e faafetaia ai afioga i faipule.

O nisi o mataupu sa mamafa i ai galuega a le fono i lana tauaofiaga lona tolu lenei o le a tapunia, o pili tupe e fesoasoani ai i le tulaga pagatia ua i ai le falemai o le LBJ i Fagaalu, ma o nisi o ia pili tupe e aofia ai le $3 miliona lea ua saini e le kovana.

E tapunia galuega a le Fono i le aso Faraile na tea nei ae faatoa tuuina atu e kovana Togiola Tulafono lana poloaiga e valaauina ai le fono faapitoa mo le umi e le silia ma le 30 aso, lea ua faamoemoe e amat ai le taeao nei.