Ads by Google Ads by Google

Tala mai le Fono Faitulafono

FA’ATA’ITA’I SAILINI I MASINA UMA LAVA

Aua e te te’i pe tuu fesili foi pe afai e te fa’alogoina Sailini  i faaiuga o masina taitasi, aua o lea fuafuaga o le a faia, ina ia mautinoa ai le tumau pea o le lelei o faailoilo nei.

Na faailoa e le taitaifono o le Komiti o le Puipuiga o le Saogalemu Lotoifale a le maota o sui ia Tuuamolimoli Saena Moliga e faapea, ua i ai se fuafuaga a le kamupani lea o lo o faia sa latou konekarate ma le Matagaluega o le Puipuiga o le Saogalemu Lotoifale (HLS), e faia faataitaiga mo sailini i Aso Tofi mulimuli o masina uma lava mo le lima tausaga, ina ia mautinoa ai o lo o lelei ma ola uma sailini nei.

Na taua e nisi e alala i afioaga o l oo tulalata i le talafatai, e pei o Pago Pago, Fagatogo, Satala ma Aua le manino o le latou faalogo i le Aso Toona’i na faia ai se faataitaiga i sailini.

Na saunoa Tuuamoli e faapea, o le faamatalaga na tuuina mai i le Ofisa o le HLS, ua latou faamaonia mai ai le faia o faataitaiga mo sailini i masina uma lava, ona o le agaga ia faatumauina pea le lelei o sailini, aemaise ai e tusa ma le $250,000 le vaega tupe lea o lo o konekarate ai le matagaluega ma le kamupani mo le siakiina sailini ina ia mautinoa o lo o lelei.

Sa ia taua foi e faapea, o le a faalua i le tausaga ona malaga mai le kamupani mai Amerika lea sa galulue mo le faapipiiina o sailini mo le faia o siaki.

I’UGAFONO E LAGOLAGOINA AI PILI A FALEOMAVAEGA

O se iugafono e lagolagoina ai le tulafono taufaaofi a le faipule i Uosigitone ia Faleomavaega Eni Hunkin, e fa’aagafua ai ni mana’oga faasitiseni mo tagata Amerika Samoa ae avea ma sitiseni o le Iunaite Setete, na faaulu i luma o le maota o sui i le vaiaso nei, ma ua taoto atu nei i le Komiti o Tulafono a le maota, lea o loo taitai fono ai le Sui Fofoga Fetalai ia Talia Faafetai Iaulualo.

I le tino o le iugafono o lo o taua ai e faapea, i lalo o tulafono tau Femalagaaiga ma Nesionale a le Iunaite Setete, e manaomia ai le mulimulitai i faatonuga e masani ona faia i tagata ese ina ia faataga ai ona nonofomau i totonu o le Iunaite Setete, pe afai e fia avea se tagata Amerika Samoa ma sitiseni.

O ia faiga masani e aofia ai le tatau lea ona iloa tautala i le gagana faaperetania, malamalama ma iloa le tala faasolopito faapea ai tu ma aga faasitiseni, aemaise ai ia le itiiti ifo i le 3 masina e aumau ai i totonu o le Iunaite Setete ao lei faauluina le talosaga.

Fai mai le iugafono, o le faaaogaina o ia manaoga uma e tagata Amerika Samoa, e le gata o le a avea ma avega mamafa, ae o le a le tusa ai foi ma nisi o mafuaaga, e pei o le tatau lea i tagata Amerika Samoa na fananau i totonu o le malo tele o Amerika le tautua ma auauna i le malo tele, ma ofo atu lea tautua e auauna ai i vaega au, e pei ona vaaia i le taua muamua o le lalolagi e oo mai lava i fevesiaiga e pei ona faia i Iraki (Iraq) ma Afekanisitani (Afghanistan).

O aoaoga o loo faavae ai aoaoga i totonu o Amerika Samoa, o loo mulimulita’i i aoaoga a le malo tele, e aofia ai tu ma aga faapea ai tala faasolopito, e oo foi i tulaga o faiga malo faatafatolu, o loo mulimulitai ai foi Amerika Samoa i ia tulaga uma, e pei foi ona faia i totonu o le malo tele o Amerika.

O nisi o tulaga mautu e aofia ai le silia i le 100 tausaga talu ona tuuina atu Amerika Samoa i le Iunaite Setete, ma o loo  faamanatuina pea lea tulaga i tausaga taitasi.

I le faaiuga o le iugafono, o loo talosagaina ai le tuuina mai lea o se ala televave ma le faigofie mo Amerika Samoa e avea ai ma sitiseni o le malo tele, pe afai latou te manatu i ai, ma o le Fono Faitulafono o le a matua lagolagoina ma sapasapaia lea faamoemoe.

O le afioga i le alii faipule ia Puletuimalo Kono na faaulufaleina lenei iugafono, ma ua faamoemoe o le a tufatufaina atu ni kopi i le tofa Faleomavaega, o sui o le konekeresi e aofia ai  Senatoa Daniel K. Inouye, Senatoa Daniel K. Akaka ma le afioga i le matua ia Togiola Tulafono, le kovana o Amerika Samoa.