FAATULAGA ILOILOGA FONO MO LE PAKETI ASPA

O le Aso Gafua e o’o atu i le Aso Lulu o le vaiaso fou ua fa’atulaga e le Fono Faitulafono, e toe iloiloina ai le Paketi a le Faalapotopotoga o le Eletise ma le Suavai (ASPA) mo le isi vaega o loo totoe o le Tausaga Tupe lenei 2012.

E na o le 4 masina o le Paketi a le ASPA na pasia e le Fono i le tausaga na te’a nei, ma le tu’utu’uga e  tatau ona toe o’o atu le pulega a le ASPA i le Fono i le masina nei, mo le toe faia o se isi iloiloga i le latou Paketi.

I se feiloaiga a taitai o le fono fa’apea ai taitaifono o komiti o le Paketi a maota e lua i le vaiaso nei, na malilie ai o le a fa’ataunu’u le iloiloga i le vaiaso nei, manu o lea e le i mae’a le masina, e atoa i ai le 4 masina o le paketi o loo faagaioi ai galuega a le ASPA.

E pei ona silafia, o se tasi lenei o vaega tuma’oti a le malo o lo o tumau pea le i ai o ni faafitauli ma le Fono i tulaga o tulafono ma le faatautaia o ana gaioiga, aemaise ai lava le mataupu e uiga i le paketi a le ASPA, poo ai e pulea, poo ia lava poo le Fono foi.

Mai le paketi e $130 miliona a le ASPA na tu’uina atu i le Fono i le masina o Setema na te’a nei, e na o le $30.8 miliona na pasia e le Fono e fa’aauau ai ana galuega.

O afioga i taitaifono o le komiti o le Paketi a le fono ia Senatoa Lemanu Peleti Mauga ma le afioga i le alii faipule ia Vailiuama Steve Leasiolagi o le a faatautaia iloiloga a le fono.

FAATULAGA ILOILOGA FAIPULE  MO TOFIGA KOVANA

O le taeao o le Aso Tofi ma le Aso Faraile o le vaiaso fou, ua fa’atulaga e faia ai iloiloga a komiti o Aoga ma le Faagaoioiga o le malo a le maota o sui, e fesiligia ai tofiga a le kovana ia Dr. Jacinta Galea’i ma Ivy Aiumu-Taufaasau e avea ai i latou ma faatonusili o le Ofisa o Aoga ma le Ofisa Pulea Oloa a le malo.

O le afioga i le alii faipule ia Lemapu Suiaunoa Talo lea o loo taitaifono i le komiti o Aoga ma Faimealelei A. Allen lea o loo taitaifono i le komiti o le Faagaioiga a le Malo o le a gafa ma le taitaiina o iloiloga nei e lua, e pei ona faatulaga ai le iloiloga a Taufaasau i le aso Tofi ae o Dr. Galea’i i le aso Faraile.

$2 MILIONA MO LE FALEMAI LBJ

O le taeao nei, o le a fa’ataunu’uina ai le iloiloga a le komiti o Sailiga o le Tamaoaiga a le maota o sui, mo le iloiloina lea o le tulafono taufaaofi a le maota, e faasoasoa atu ai le aofaiga e $2 miliona mai le Teugatupe o le Feagaiga sa osia mo le Tapa’a, e fesoasoani ai i galuega a le falemai o le LBJ.

O le tulafono taufaaofi lenei o loo faamoeome e faatupe mai i tupe o initeresi (interest) sa fuafua e maua mai e le malo o Amerika Samoa, mai lalo o le feagaiga na osia ma le Matagaluega o le Initeria, e mafua mai i se feagaiga aitalafu sa fuafua e amata totogi mai i le masina o Aperila 2008, ma le faamoemoe e faamuta i le masina Aperila 2017.

Na taua i le tino o le tulafono e faapea, talu mai lava le taimi na amata totogi ai lenei aitalafu, e lei toina mai lava e le malo o Amerika Samoa lana initeresi o loo fuafua e maua mai ai.

O le agaga o le fono, o le tupe lenei o le a tuuina atu e fesoasoani ai i le tele o le mau manaoga tau tupe o lo o feagai ma le falemai i le taimi nei.