Ads by Google Ads by Google

Tala mai le Faamasinoga

TETE’E I TUUAIGA UMIA O FUALAAU FAASAINA

Na te’ena e ni ali’i se to’atolu, ia tu’ua’iga i le umia fa’asolitulafono o vaega o laau faasaina o le mariuana, ina ua latou tutulai i luma o le Faamasinoga Maualuga i le taeao ananafi.

I le tali tete’e a Keiana Talaese, Vaoeli Lafoia ma Hefa Vahe, ua fa’atulaga ai loa a latou ulua’i iloiloga, mo le masina fou.

O lo o taofia pea i latou nei e toatolu i le toese i Tafuna, ina ua le mafai ona o latou totogia vaega tupe ua uma ona faatulaga e tatala ai i latou i tua mai le toese.

E taitasi moliaga o le umia faasolitulafono o fualaau faasaina o le mariuana o loo tuuaia ai e le malo i latou nei e toatolu, ma o ia tuuaiga na afua mai ina ua agai atu leoleo e fofo se vevesi na tulai mai i le vaega o loo i ai le uafu o vaa faila i Malaloa i le masina na tea nei, ae maua ai e leoleo se vaega itiiti o lau mamago o mariuana i le taga o le ofu a Lafoia, faapea ai foi ma Vahe.

Na fesiligia e leoleo Lafoia po o fea na ia aumaia ai le mariuana, ae na tali le ua molia, sa aumai i se tasi o ana uo  o lo o i totonu o le vaa fagota, o lona igoa o Keiana. Na agai atu leoleo i le vaa fagota ma maua ai ni vaega laiti o le laau faasaina o le mariuana ia Keiana, ma taofia ai loa foi o ia e leoleo.

TONE PULOU

O le alii faiaoga lea o lo o tuuaia i le ma’itaga o se tamaitai aoga, ua toe tolopo lana ulua’i iloiloga, i le aso 22 Mati, ina ua talia e le faamasinoga se talosaga a lana loia mo se isi taimi, sei fa’aauau talanoaga a itu e lua mo se maliliega aufaatasi e faamuta ai lenei mataupu.

O le alii o Tone Pulou o lo o tuuaia i moliaga e aofia ai le faiaiga i se tamaitai e laititi i lalo o le tulafono, tagofia o itutinosa o se teineitit, atoa ai ma le faia o gaioiga e ono lamatia ai le saogalemu o se fanau e laititi i lalo o le tulafono.

Ua ta’ua e le malo e fa’apea, o lo o masalomia le tulai mai o lenei fa’afitauli, i le tausaga e 2010 a’o avea le ua molia o se faiaoga i le aoga tulaga muamua sa aoga ai le teineititi.

Ina ua faila e le malo lenei mataupu ia Aokuso 2010, na maua ai i faamaumauga le sola ese o Pulou mai le teritori ma agai atu i Ausetalia, faasolo atu ai loa i Hawaii, lea na maua mai ai e le FBI i le tausaga na te’a nei.

O lo o taofia pea i le toese Pulou e aunoa ma se tupe ua faatulaga e tatala ai o ia i tua, ina ua talia e le faamasinoga le faafinauga a le malo ina ia taofia pea le ua molia i le toese e aunoa ma se tupe e tatala ai o ia i tua.

JASON MUASAU MA VATIA TUGAGA

Ua talia e le Faamasinoga Maualuga se talosaga na faaulu e loia a Jason Muasau ma Vatia Tugaga, ina ia toe tuu atu se isi lua vaiaso e faaauau ai talanoaga o loo faia ma le malo, mo le faamautuina lea o se maliliega aufaatasi ma faamuta ai loa mataupu o lo o tuuaia ai i laua nei.

O le aso 22 o Mati lea ua toe tolopo i ai uluai iloiloga o mataupu a i laua e toalua ua molia ma le faamoemoega o le faamasinoga, e tatau ona oo atu i le aso lea ua taunuu itu e lua i se maliliega aufaatasi.

O Muasau ma Tugaga o lo o tuuaia i moliaga eseese e aofia ai le faaoolima i le tulaga muamua, talepe fale ma le taofia faasolitulafono o se tagata, ona o se faalavelave na tulai mai i le masina o Oketopa 2011, ina ua la osofaia se alii e nofo i luga o lana vaa faila ma o la faaoo ai ni manu’a tuga ia te ia.

O lo o taofia pea i laua nei i le toese ina ua le mafai ona la totogiina le tai $100,000 na faatulaga e le faamasinoga e tatala ai i laua i tua.