Ads by Google Ads by Google

Tala mai le Fa’amasinoga

Ua toe tolopo le ulua’i iloiloga lea na fa’atulaga mo le ali’i na fa’alala se fana i le gutu o se tasi o lona aiga, lea na fuafua e faia i le aso ananafi.

O le alii o Lomitusi Filiga o loo tuuaia e le malo i moliaga o lona faaaogaina lea faasolitulafono o se aupega matautia, o lona umia faasolitulafono o se fana e lei lesitalaina, umia faasolitulafono o ni pulufana atoa ai ma le faaoolima i le tulaga tolu.

O lea faalavelave na tulai mai i Fagatogo i le amataga o le masina nei, ina ua ova le ‘ona o Filiga ma ia ta’iina ai se fana i le alii na aafia, ma aga’i sa’o atu ai loa lenei alii ma faila sana tagi i le ofisa o leoleo, e ui sa toe teena e Filiga ina ua fesiligia o ia e leoleo, ma ia faailoa i ai e faapea, o lana gaioiga sa faia o ni mea pepelo.

O loo tumau pea poloaiga o loo tatala ai i tua le ua molia mai le toese ina ua ia totogiina le $3,000 sa faatulaga e le faamasinoga, ma o nisi o ia poloaiga e aofia ai le faasa lea ona ia toe umia ni aupega matautia, poo lona toe taumafai foi e faafesootai le alii na aafia poo lona aiga i soo se auala, sei vagana ai lana loia.

Na taua e le malo e faapea, ua taofia nei e leoleo le fana o loo tuuaia na faaaoga i lenei solitulafono.

SASA I LE SU O I LE LE USITA’I

Na avea le fiu o se toeaina e 69 tausaga le matua e fautua i lona ‘nephew’ e tuu tuu i lalo lona leo ma aua le soona pisa, ae le usita’i lava le ula lea, ma itu na aapa atu ai loa le toeaina i le suo ma sasa ai loa lona ‘nephew’ ma gau lua ai le suo.

Na togi ese e le toeaina le suo gau ae aapa atu i le isi suo ma toe faaauau ai lona fueina o le papatua o le alii lea ona o le le usitai.

O le taeao ananafi na tulai ai lenei tama matua i luma o le Fa’amasinoga Fa’aitumalo, ma ia te’ena tu’ua’iga a le malo ua faia fa’asaga ia te ia, i le fa’atupu vevesi i nofoaga faitele atoa ai ma le faaoolima i le tulaga tolu.

I fa’amaumauga a le fa’amasinoga, o lo o ta’ua ai e fa’apea, sa ‘ona le ali’i na a’afia, i le taimi na tupu ai le fa’alavelave.

Na agai atu leoleo ma taofia mai le alii na aafia ona o tuuaiga i lona tagofia o le pia ae lei atoa lona 21 tausaga, peitai e lei umi se taimi ae toe agai atu leoleo ma loka mai le toeaina, susuga Levao Puaula ona o tuuaiga i lona faaoolima.

Na taua e le loia a le malo e faapea, o loo faaauau pea suesuega e uiga i lenei mataupu, ma o loo vaavaai foi le malo pe ono i ai ni moliaga mamafa e ono faila faasaga i lenei mataupu.

MAUA LE AU TALEPE FALE

O alii talavou e toa lima ia o loo tuuaia i lo latou talepeina lea o se fale i Cocoa Land i ni taimi eseese se tolu, na tutulai i luma o le faamasinoga  faaitumalo i le taeao ananafi, mo le tuuina atu o latou tali i moliaga mamafa o le talepe fale ma le gaoi e pei ona tuuaia ai i latou e le malo.

I faamaumauga a le faamasinoga o loo taua ai e faapea, e faatolu ona osofai e le aualii nei le fale lava lea e tasi i le masina o Me o le tausaga na tea nei, ae faalua ia Iuni.

O mea na gaoia e le au ula nei e aofia ai le anoanoai o oloa e alu i le uila, ma o nisi o nei mea sa mafai ona toe maua mai e leoleo e pei o taaloga xbox, remote o taaloga, o se TV e 20 inisi le lapo’a ma isi lava oloa sa ave faagaoi e le au alii nei.

Na faaaoga e leoleo telefoni feavea’i na gaoia e i latou nei e saili ai i latou ma i’u ina maua ai e leoleo ma taofia loa i latou i le falepuipui.

O le isi toatolu ua tai 17 tausaga ma le isi toalua ua tai 18 tausaga i le taimi nei, ma o loo fuafua le malo pe ono molia i latou o ni tagata matutua pe leai foi.