MALIETOA UILEMATUTU POO MALIETOA FAIGA, #5

Malo le silasila i le mamalu o le tatou atunu'u, ae alo mai loa i le vaega mulimuli lenei o le tatou polokalame, lea na gata mai i le vaiaso na te'a nei i le taimi lea ua tuu atu ai e Sa’umani Afaese le ato i le Tuitoga, ae faapena foi le Tuitoga ona tuu atu lana ato ia Sa’umani Afaese.

Ua lilo atu le va'a a le Tuitoga, ona taumafai lea e tatala le ato, peita'i e tatala atu ae felelei mai i fafo lulu, ae le o ni moa, ona maua ai lea o le upu, "ua moa moa lulu." Ua manatu Sa'umani Afaese, ua oti le Tuitoga i lana palo, fai mai ua lilo atu fo'i le va'a a Sa'umani Afaese, ona taumafai lea e tatala le ato o loo i ai niu, ma le tatala atu, e le o ni niu, ae na o pulu o loo i ai, ona maua ai lea o le upu, "ua niu niu pulu," ma o iinei lea e maua atoa ai le upu e faapea, "ua moa moa lulu, ua niu niu pulu."

O matua o Sa'umani Afaese poo Puleiite, o le ulugali'i e igoa ia Tutula ma Tutula lea sa nonofo i le pitonu'u i uta o le nuu o Foaluga i Savai'i. Na usu Tutula ia Tutula faaee le gafa, o Pa'iatea ma Pa'ialala. Fai mai ua oo i le isi aso a'o mamafa le fafine o Tutula, sa alu ai i le sami e utu vai, ae fanau le au ai i le sami, ona fanau mai le o lana tama o le alualu toto, ona ia tia'iina lea o le alualutoto i le sami, ona alu ane lea o le fefe ia tausi ma faa failele le alualutoto, ona tupu mai ai lea o le tama e igoa ia "Pule", ma o iina lea e mafua ai le upu a Samoa, e faapea, "e le o se fe'e na Tutula," ona faaaoga lea e Samoa le muagagana lenei ona faapea lea o lona faitauina, "e le o se futu na tafea mai ma ola i tae tafe, e le o se fe'e fo'i na Tutula, a'o le tama lava a Tutula ma Tutula," o lona uiga, e le o se tama a le fe'e, ae o le tama moni lava a le ulugali'i o Tutula ma Tutula. Ia, o le faaiuga lena o lea fo'i vaega o le tatou polokalame, tatou toe feiloa'i i le vaiaso fou. Soifua.