2 TAMAITI A’OGA VOCTECH MANUNU’A I LEONE

I le afiafi o le aso Faraile i ta’aloga Pasiketipolo i le va o Leone High ma VocTech High, ua fa’amaonia nei sa fa’amanu’alia ai tamaiti a’oga ta’a’alo a Polytech i ni tau’aiga ma’a sa fetogi mai ai i latou e le fanau a’oga i Leone High.

O le tala mai ua fa’amaonia fo’i e le tama’ita’i pule a’oga a VocTech lea fo’i fa’amatalaga, o lenei mea na mua’i tupu i Leone, lea sa faia ai le ta’aloga a le latou a’oga ma Leone High.

“Na taofia le tamaititi e to’atasi, ae o lea isi na alu le ‘ala ma ave le isi itu atoa o le ofutino a’oga, ma sa i ai fo’i se manu’a i lena tamaititi o le matou ‘au.”

Ina ua fa’amatala mai e le fanau a’oga sa i ai, sa latou fa’ailoa mai, o i latou na fetogi atu i ala a’o i ai i totonu o le fale’ai. E ese lenei mea, ma le mea fo’i ua fa’aleagaina ai le pasi a’oga i le va o le ta’aloga a Tafuna High ma Faga’itua.

Ua mae’a faia le fonotaga a le Komiti Fa’afoe a le ASHSAA i le itula e 10:00 ile taeao ananafi, ma ua le maua mai se tulaga i i’ugafono a lea fonotaga ma le Fa’atonu sili o A’oga, i se latou filifiliga ua fa’ataoto ai lea mataupu, ona o a’afiaga e tele o lo’o fa’aolioli mai e ono tutupu i fanau, pe afai o le a fa’aauau pea ona tutupu nei ituaiga o fa’aletonu, a’o sauni le fanau e tauva i fa’agatama o fa’asolo nei.

TAMA FUSU - NONOFO MA FUFUSU I LE STADIUM

Ua tula’i mai e ese fo’i lea faiga fou ua i ai nei, e le o se Malae Ta’alo e nonofo ai nisi, ae ua fa’anonofo ai nai tama fusu mai Samoa, na malaga mai mo le Ta’amilosaga sa fa’atautaia i le fa’aiuga o le vaiaso na te’a nei.

O le aofai o le aumalaga e silia ma le to’a 14 peita’i, o isi ua o i o latou aiga, ona ua fa’ailoa mai e tama fusu nei, “E leai ni mea’ai, aua o lea ua leai se tasi na vala’auina matou e o mai o toe iinei!”

O le susuga Tupai Henry Tavake sa fa’aautu i ai le ta’amilosaga sa fa’atautaia, ma sa ia vala’auina fo’i le aufusu mai Samoa ina ia latou tauva, peita’i, ua o’o ina mae’a le ta’amilosaga, ua siakia fo’i le Lady Naomi na o mai ai, ma ua le toe malaga ai le va’a se’ia mae’a lea tapenaga ma pasia lelei e toe malaga. O le afua lea ona i ai o nei tama ta’a’alo i le Malae Ta’alo i Tafuna ma ua faia lava ma latou nofoaga tumau mo le 2 vaiaso lea e nonofo ai i Amerika Samoa.

Ina ua vala’au i le Ofisa o le Stadium i Tafuna, sa i’u ina ioe mai i latou o lo’o nonofo ai tama fusu, peita’i, ua le mafai e sui faigaluega o i ai ona faia se isi fa’ai’uga i nei tama ta’a’alo, aua ua alu i Amerika le ali’i na fa’atautaia le ta’amilosaga fusu lea.

Ua fa’ao’o fo’i le fa’afesili i le susuga Joseph Pereira i le Ofisa o le Kovana, aua sa auai le Kovana e tali lona vala’aulia i le ta’amilosaga fusu lea. O le tali mai a Pereira i fesili sa tu’uina atu, “Ou te le mailoa pe na totogi le Malae Ta’alo e faia ai le ta’amilosaga fusu i lea po! Ma ou te le o iloa fo’i o i ai nisi o tama ta’a’alo o momoe ma fa’aaoga le Malae ta’alo e nonofo ai se’ia toe fo’i i Samoa.”

Pe afai o le a mae’a le fonotaga a le pule lua o le Malae Ta’alo i Tafuna ma le afioga le Kovana i le taeao nei, ole a fa’ailoa atu se tali aloaia o nei fo’i fesili.

I le toe matau atu i le fa’agasologa o ta’amilosaga fa’apenei e fa’atautaia e Tavake, ua iloa ai, na mua’i fa’afalepuipuia fo’i le isi au fusu ma o latou fa’atonu i ni soligatulafono muamua i le tausaga ua te’a, ona o le le va’aia lelei, i taimi e mae’a ai ta’amilosaga, ma ua fa’atalia ala e toe taliu ai i Samoa.

O moliga sa a’afia ai tama fusu mai Samoa i le tausaga ua te’a, e aofia ai le fa’amalosi tama’ita’i ma le feusua’i ma tama’ita’i e le’i te’a pule a matua.

Peita’i, o lenei tausaga, ua tula’i mai, o le susuga To’o Mita’i, sa fuafua e fusu fa’apolofesa ma Alema i le Heavy Weight, ua na fasia le ali’i sa fusu i le paga mama i fusu’aga fa’a-amateur. O le susuga Tasi Tele na fusu i le welter weight.