Ads by Google Ads by Google

Tala i Vaifanua

ST. THERESA - VAIASO O A’OA’OGA KATOLIKO

 

Ina ua mae’a le misasa pa’ia sa tu’ufa’atasia uma i ai fanau a’oga i a’oga eseese a le Ekalesia Katoliko ma sa fa’ataunu’uina lea i le Malumalu o le Aiga Pa’ia i Fatuoaiga i le afiafi o le aso Sa, ua te’a, ae alausu loa St Theresa i le fa’atauaina o le manulauti e pei ona fa’atulaga ai e le Komiti Fa’afoe o A’oga Katoliko : “Tautua Lo’u Nu’u i le Fa’atuatua & le Poto!”

 

“O lenei manulauti sa fa’atulaga e le Komiti Fa’afoe o A’oga a le Ekalesia Katoliko, ma ua latou fa’ailoa mai, e fa’aaoga taleni a le fanau a’oga e tusia ai se matou saini e fa’ailo ai lea manulauti i lenei vaiaso, lea ua va’aia ai se galuega a nisi o fanau a’oga o le St. Theresa.” O se tala lea a le tama’ita’i pule a’oga Anne Brown-Posala.

 

O le vaiaso atoa ua fa’atulaga ai latou fa’atasiga i le amataga o le aso a’oga ta’itasi, ma o le aso ananafi, sa avea ai le Vasega 4 & 5, ma vasega e ta’ita’ia lea fa’atasiga matagofie. Na o’o lava le ta’ita’iga lea i le fa’ailo ma fa’amatalatala i le auga tonu o le manulauti o le Vaiaso o A’oga Katoliko 2014.

 

“Nu’u, o le nofoaga ua fa’asinotonu i lo’u tagata ola mai lo’u Atua!” ona faia lea i ai o se solo matagofie na saunia ma tolaulauina e le fanau a’oga na tofia. “Fa’atuatua, ou te mafaia mea uma lava i lo’u fa’atuatua!” 

 

“Poto ma le a’oa’oina, e ao ina ou maua, ou te mafai ai ona filifili e faia mea lelei, ma ou taumafai e maua’a agava’a mo le fa’atinoina o tiute mo a’u e tautua ai tagata uma i lo’u aiga, nu’u, a’oga, Ekalesia ma lo’u atunu’u.”

 

O nisi ia o folasaga sa fa’afofogaina, o tolaulauina e le fanau, e fa’amatala ai le matagofie o lea fo’i vaiaso fa’ataua e i latou, ma le aoga o a’oga a le Katoliko i le fanau o lo’o a’otauina ai. O le fa’ataua a St Theresa mo le latou aso Gafua, sa ave lea i le Au Kuka, Ave Pasi ma Tagata Tapena Lotoa. O i latou nei, e mafai ai ona fa’aleleia mea uma i le alausu atu o fanau i le a’oga, e ese mai ai i latou aiga.

 

Na latou faia se pese matagofie ma fa’ao’o atu ula manogi ma fugala’au felanulanua’i, e avea ma fa’ailo o le latou fa’afetai. Na o’o atu fo’i le susuga Patele Kolio Etuale mo le fa’afetai a le Pulega o le A’oga, e o’o fo’i i le fa’afetai mai le Tama’ita’i Pule Anne Brown-Posala mai le latou pito la’au ma faia’oga uma.

 

Na usuina le pese matagofie, ae fa’asisiva ai lea vaega o le aufaigaluega a le St Theresa, ua mua’i ave i ai le fa’afetai. Ona o lea fo’i aso ua avea ma aso soifua o le tina sifi kuka, ua atili ai ona matagofie le tapenaga a le fanau ma faia’oga mo lana vaega i lea aso.

 

FAATAOTO KALENA OFISA O PALOTA

 

O le  vaiaso ua te’a na fa’alauaitele ai i pepa o fa’amatalaga a le Ofisa o Palota le kalena mo polokalame faatulagaina mo lenei tausaga palota i Amerika Samoa.

 

Ua fa’ailoa mai i le kalena taimi ma galuega e ao ina fa’atino e le ofisa, tagata palota, ae maisi nisi e fia tauva mo tofi faipule o itumalo eseese, fa’atasi ai ma nisi e fia tauva mo le tofi faipule o Amerika Samoa i le Konekeresi.

 

Ua i ai fo’i ma le galuega e ao ina mua’i faia e tagatanu’u uma o Amerika Samoa o lo’o  i so’o se lala o le militeri fa’apea i latou o lo’o a’o’oga i fafo, ae o lo’o fia palota i lenei tausaga, e ao ina vave talosaga mai i le Ofisa Palota mo sau pepa palota e fa’auia atu i le emeli pe lafo atu fo’i, a’o le i o’o i le aso o le palota ia Novema aso 4.

 

E afua mai ia Ianuari 1, 2014 e amata ai ona talosaga le “absentee ballot” pe o le pepa palota mo i latou e palota ae o lo’o a’o’oga i fafo atu o Amerika Samoa, ae maise lava i latou i le militeri. O lea foi aso e mafai ai ona lesitala latou i totonu o le militeri e fia palota i lenei tausaga.

 

Mo i latou uma lava o lo’o lesitala o latou suafa e palota ae o le a malaga i fafo e auauna i le militeri, e tatau ona talosaga lau “absentee ballot” ae le’i malaga i fafo, ina ia fa’afaigofie ona maua le pepa palota.

 

O le aso 14 o Iulai e amata ai ona maua pepa faatumu mo i latou e fia tauva i tofi mo lenei tausaga palota ae o Setema 2 e tatau ona faila ai uma pepa talosaga a sui tauva. Ose vaitaimi i le ogatotonu o Setema e maua ai le lisi aloaia o sui tauva mo palotaga i lenei tausaga.

 

O le palota a Amerika Samoa o le 2014 e palotaina ai sui o le Maota o Sui o le Fono Faitulafono ma le sui i le Konekeresi.

 

Mo nisi o fesili i lenei mataupu faamolemole faafesootai le Ofisa o Palota i lona nofoaga i Tafuna.