Tala I Vaifanua

SAILI MOLIMAU O LE PAN-AM 806

 

O le aso 30 o le masina lenei e atoa i ai le 40 tausaga talu mai ona pa’u le va’alele a le Pan American World Airways i lana malaga numera 806 i Fogagogo, a’o aga’i mai e sese’e i le malae va’alele i Tafuna.

 

O lea fa’alavelave le ma’alofia, ose tala faanoanoa i aiga Samoa, Ausetalia, Niu Sila, Thailand, Amerika, Hawaii, Kanata ma Peretania.

 

Ma o le faaiuga o le masina nei, e malaga mai ai i le teritori se tasi e fai ata tifaga, Paul Crompton mai le kamupani Barge Pole Productions - e fa’amautu i Peretania -  e toe fa’afo’i o tatou mafaufauga i tua, po’o fea sa e i ai i lea taimi tonu lava.

 

“E ui la ina e i ai feso’ota’iga tau emeli i lenei vaitau e mafai ona faia ai fa’afesili ma tali, ae le lava lea mo le malamalama atoaga i le nofoaga, le atunu’u ma ona tagata, na tupu tonu ai lea fa’alavelave tau va’alele. E tatau lava ona ou o’o atu i Amerika Samoa,” o le saunoaga tusitusia lea a Crompton.

 

E le gata i lea, ae ua mana’omia fo’i aiga uma o i latou sa maliliu i lea faalavelave e saunia lelei sau fa’amatalaga e fa’ao’o ia Crompton e fai ai sou sao i lana ata o lo’o fia tu’ufa’atasia.

 

O le a i ai Crompton i totonu o le teritori mai ia  Ianuari 31 e oo atu ia Fepuari 3 mo le faatalanoaina o nisi o le atunu’u i lenei mataupu.

 

O le mana’oga o Crompton ia maua se avanoa e talanoa ai i tagata sa i ai i le malae va’alele i lea po, ae va’aia lenei mea o tupu. Po’o a ni mea na faia i lea taimi e tagata ma le malo ae maise o le aso na soso’o ai, i lagona o tagata ma ni mea na latou faia? O le isi mea patino lava, po’o fea o i ai toega o lea va’alele, po’o fea o tanumia ai? 

 

E mafai ona e talanoa ma fa’ailoa lou igoa i lenei emeli a Paul Crompton - crompton@yahoo.co.uk

 

TAUSALA AMERIKA SAMOA I LE VAEGA O TURISI

 

O le amataga o le vaiaso nei sa amata faigaluega ai le tausala lalelei o Amerika Samoa, Eleitino Ma’ae Tuiasosopo, i le Ofisa o Turisi a le malo, le American Samoa Visitors Bureau.

 

I se tusitusiga a le ofisa o turisi, o lo’o taua e le fa’atonu o lenei ofisa, David Vaeafe e faapea, o Tuiasosopo o se tasi o tagata faigaluega e taua tele ona aofia i le latou aufaigaluega.

 

“E mautu atili lea fa’ai’uga, aua o ia, ua tu’u atu i ai le fa’atuatuaga o le atunu’u, e avea ma ta’imua i le fa’afeiloa’iga o a tatou malo fa’aaloalogia, ma i latou e asiasi mai i le atunu’u,”

 

Taua foi e Vaiafe faapea o le umi o le faigaluega o Tuiasosopo i lona Ofisa e faamuta i le faaiuga o le tausaga lenei pe a sailia le isi tausala fou o Amerika Samoa.

 

Ua atoa le 23 tausaga o le soifua o Eleitino Tuiasosopo, ma o ona fa’ailoga maualuluga uma e auga lea i le ‘Pulega o Fausaga o Fale Tetele ma alatele,’ ona sa avea o ia ma tagata fa’amoemoeina i le pisinisi a lona aiga, fa’atasi ai ma le Blue Sky Communications i le teritori. O ia fo’i lenei sa avea ma Tausala Lalelei o Tafuna High School i lona tausaga fa’au’u, 2008.

 

O lea ofisa mai se taimi umi, sa na’o le to’alua lava sui faigaluega sa i ai, e aofia ai ma Vaeafe.

 

O lenei tausaga, ua si’itia le aofaiga o le aufaigaluega, ma faaopoopo isi tagata faigaluega e to’alua.

 

MALAGA MUAMUA - SILVER WHISPER

 

O le ulua’i malaga a le Meli o le Silver Whisper na taula i le taeao o le aso Lua, sa aumaia ai lana pasese silia ma le 600 e aofia ai tagata turisi ma le au faigaluega a le va’a. O le taimi muamua lea ua afea ai e le Silver Whisper ia Amerika Samoa.

 

O i tatou la o lo’o aofia ai i le tele o uafu o atunu’u o aofia i le malaga e 64 aso o lo’o ta’amilo ai le Silver Whisper i le lalolagi lea na amata mai Los Angeles i Amerika, ae fa’a’iu i Barcelona, Spain.

 

O isi Meli sosoo mai ai e taunu’u ia Fepuari 1, 2014 o le “Armsterdam” ma le “Amadea”.

 

Mo le masina o Fepuari, e ono lelei meli e malaga mai i le tatou teritori. O nei avanoa lelei e talimalo ai i le to’atele o tagata maimoa mai fafo, ma e mafai ona si’itia ai le tatou tamaoaiga.

saunia: Leua Aiono Frost

 

Comment Here