Kamupani Va’aia le Fanua mo Toga i Tafuna

Ua manumalo le kamupani a le “Melie Mei Langi Money Transfer” i le tauofoga sa faia i le malo o Toga, e sailia ai se kamupani latou te fa’atautaia le fanua o le malo o Toga lea o lo’o i Tafuna - e soso’o ma le Ofisa o Oloa & Meatotino a le tatou malo.

Ma ua filifilia e lea kamupani le tamaita’i ia Langahelotu Vaivao ma le susuga ia Francis Vaivao, e va’aia ma pulea le fa’atautaiga o pisinisi ma fefa’ataua’iga i totonu o lea ele’ele e lisia atu i le malo o Toga

Ona o se feagaiga vavalalata na fa’atula’ia e le afioga ia kovana A.P. Lutali ma le afioga King Taufa’ahau Tupou 1V i tausaga ua fano, na mafua ai ona fa’amatu’u atu lea eleele i Tafuna mo le malo o Toga.

“O se maliliega aoga tele lenei eleele, mo nai o’u tagatanu’u o lo’o aumau i’inei, peita’i, e le’i iloga lava ona matua fa’aaogaina tatau e nai o matou tagata o lo’o aumau i Amerika Samoa, ona e le’i mautu ni tautua, po’o ni pisinisi e aoga atili ai le fanua lea mo nai o matou tagata. O lea ua taumafai ai ona aotelega ni tautua mo  tagata Toga i’inei, e fa’atino atu i lenei eleele. E i ai lava mea sa fa’atautaia ai, e aofia ai fefa’ataua’iga o fua o fa’aeleeleaga, ma meleni ma talo mai Tonga,” o se tala lea a le tama’ita’i o Langahelotu.

O le aso o le a tatala ai nisi o tautua ua mae’a fa’atautaia mo lenei eleele, ma e aoga ona o’o i ai le to’atele o tagatanu’u mai Tog ina ia latou sapaia lenei taumafaiga fou ua amatalia. “E ao ina iloa lelei e nai o matou tagata mai Toga, e aoga le feagaiga sa moe miti i ai le matou Tupu e fa’ataunu’u, pe afai matou te loto fa’atasi, tutu fa’atasi ma fa’atino ni tautua e mo’omia e i matou ona fa’atino e le matou malo mo i matou e ala mai le ‘Melie Mei Langi’ lea ua tofia i lenei tausaga, e latou te fa’atinoa nei auaunaga.” O se tala lea a Langahelotu.

Tina Faipisinisi, Aoaoga Fa’apitoa

Pe afai o oe le tina lea ua e loto ma e naunauta’i e fa’atautaia sau pisinisi laititi, ae mo’omia ona a’otauina lou tagata i ni agava’a e mafai ai ona va’aia toto’a lau pisinisi ma ia le toe motusia lau taumafaiga fita i ulua’i tausaga o le tau fa’atuina, ia e manatua e i ai a’oa’oga fa’apitoa ua ofoina mai e le US Small BusinessAdministration  lea ua galulue fa’atasi ai ma le American Samoa Women Business Center.

O a’oa’oga mo’omia lava, o se tasi e iloa lelei ona tali leleia ana tagata fa’atau po’o i latou o lo’o mo’omia lau auaunaga e ala i lau pisinisi ua fa’atuina, ma o i latou na e sili lo latou taua ia te oe i taimi uma.

O le ulua’i vae lea o le aoaoga lenei, aua e mo’omia uma e tagata faipisinisi lea lava tomai i aso ta’itasi e galue ai i lana pisinisi, o ala fo’i e fa’aleleia atili ai lau auaunaga.

O aso Gafua ma aso Lulu ua fa’atulaga e faia ai vasega mai le itula e 9:00 se’ia o’o i le 12:00 i le aoauli, mo tomai eseese e fa’aaogaina ai masini komipiuta i au faila, ma fa’amaumauga aoga i lau pisinisi, ia leai se mea e sasi i au galuega i aso ta’itasi.

O lo’o i ai fo’i mataupu e a’otauina ai oe i tulaga o au tupe e fa’atautaia ai le pisinisi, ina ia mautinoa e iloa lelei au paleni o au tupe, a’o e faia fa’ai’uga ma fa’atauga mo lau pisinisi i aso ta’itasi. O lea vasega fa’apitoa e faia i aso Gafua ma aso Lulu e amata i le 1:00 seia o’o i le 4:00 i le afiafi.

E le gata i a’oa’oga, ae ua fa’atulaga taimi e faia ai talanoaga fa’apitoa, e aoga ona fetufa’i ai oe ma isi sui faipisinisi fa’apea ma le vasega faufautua mai le SBA ma le ASWBC ina ia fesoasoani i le fa’atautaiga o lau pisinisi.

O Aso Lua ma aso Tofi ua fa’atulaga ai vasega fa’apitoa mai le 1:00 i le aoauli se’ia o’o i le 4:00 i le afiafi mo le fa’aaogaina o Komipiuta i isi ala uma o lau pisinisi, ae maise o le fa’aaogaina o polokalama komipiuta e fa’avasega ma teu ai au tusi o tupe ma faila eseese. E tatau ona lesitala a’o le’i mae’a le aso 22 Ianuari, 2014. Vala’au 699-8739 po’o le 699-6579 mo nisi fa’afesili i lea a’oga taua ma le aoga.