AU USO TAMA’ITA’I I LE MILITERI TOFU MA FAAILOGA “E-8”

“O se aiga sa taumafai mai, e to’atele le fanau, ma sa taumafai e fa’aa’o’oga uma i latou ia maua se lumana’i manuia, peita’i, ua sa’o le latou filifiliga, ma ua fa’amanuia fo’i le Atua i le a’oa’iga ma le una’iga ina ia o e saili le manuia i le olaga nei, ae ia le galo le amataga, ia fa’amuamua le Atua i le olaga,” o se tala lea na amata ai le talatala a le tina Fa’atamali’i Migo ina ua fesiligia le tofu o le fanau ma le E8, le isi i le US Coast Guard, ma le la’ititi i le Air Force.

O alo tama’ita’i o Leo ma Fa’atamali’i Migo o Nuuuli, sa a’oa’oina lava iinei, fa’asolo atu ai i le a’oga maualuluga fo’i iinei, ae fa’ato’a ulufale ai lava i le Vaega Au ma aga’i atu ai i fafo mo la’ua koleniga ma a’oa’oga fa’apitoa e tautua ai.

Mo E8 senior petty officer Janet Migo i le US coast Guard, na amata lona olaga a’oa’oina mai le Aoga tulaga muamua a St Frances ma faauu mai ai i le vasega 8. Si’itia le a’oa’oga i le A’oga Maualuga a Fa’asao ma fa’au’u ai i le tausaga e 1994 ma ulufale loa lava i le US Coast Guard mai le tatou malo.

I le taimi nei ua alaala o ia i le setete o Kalefonia, fa’atasi ma lona ali’i o Chase ua atoa le 17 o ona tausaga lona matua. I le taimi nei ua silia ma le 20 tausaga o le tautua matavela a Janet Migo i le US Coast Guard.

Mo le tamaitai, E8 Senior Master Sgt Jacinta Migo Buckhalter i le US Air Force, o ia o le lona tolu o alo tama’ita’i ua fa’ato’a taua’aoina fo’i lana fa’ailoga E8 i le masina o Mati 2016. Lea ua fa’ailo mai ai lana tautua matavela i le Fuava’alele a le Vaega Au a le Malo tele.

Na amata mai fo’i ana a’oa’oga i le St Frances i Lepua soso’o ai ma le siitia fo’i o a’oa’oga i le A’oga Maualuga a Fa’asao Malisi i Lepuapua ma fa’au’u mai ai i le tausaga e 1998. O lenei tama’ita’i talavou sa avea ma togisilia o lana vasega fa’au’u i le 1998.

I le taimi nei, ua fa’ae’e atu ia te ia lana fa’ailoga E8 ae ua atoa fo’i le 17+ tausaga o lana tautua i le US Air Force.

Ua faaipoipo lea alo o le atunu’u ma ua to’a fa fo’i o la’ua alo. Ua alaala tumau i latou i Colorado.

FOAI MASI I LE HOP HOUSE

O le aso ananafi sa fa’ataunu’uina ai fo’i le foa’i a le MASI [Miss American Samoa Inc.] mo le vasega o matua matutua ma e gasegase tumau i le “Maota o Fa’amoemoega” i Fatuoaiga.

O lenei foa’i, e ao lava ina fa’ataunu’uina, ona o se iugafono a le Komiti Fa’afoe a le Masi i tausaga ta’itasi ia faia lea foa’i fa’alemasina i ulua’i aso Lulu o le masina.

O se fiafiaga i le tama’ita’i tausala lalelei o Amerika Samoa Suluga Tali’au lona lea tiute o le fa’atasi ma le MASI ina ia faia lea foa’i taua. “Ou te fiafia tele e o’o mai i aso Lulu muamua o masina ta’itasi, aua e tofusia i matou ma ni fuala’au ‘aina mata, o fua o fa’aeleeleaga o so’o se ituaiga, o matai’ai fo’i ia a le atunu’u, ina ia momoli atu e avea ma sao i le tausiga o le mamalu o matua matutua fa’atasi ai ma e ua po’ia gasegase tumau ma e mana’omia le tausiga fa’apitoa o aofia faatasi ai.”

O le tama’ita’i peresetene Fou Imo ma le sui Peresetene Igafo Maria Brown Va’a sa auai fa’atasi uma mo le fa’ataunu’uina o lea foa’i taua i le aoauli o le aso Lulu na te’a nei. Ina ua mae’a taliaina e le tama’ita’i o Josephine le pule o le Hope House ma le aufaigaluega ae maise o e uma o tausia fa’apitoa i le nofoaga lenei le foa’i taua, sa talosagaina loa e sausaunoa le lalelei o Amerika Samoa mo i latou, le tausala o Suluga Tali’au.