Ads by Google Ads by Google

Tala i Vaifanua

Ua tula’i mai e ese mai le Liki Pasiketipolo a Fanau A’oga i A’oga Maualuluga a le tatou Malo o lo’o fa’atautaia nei, ua fa’apea fo’i ona faia le Liki Pasiketipolo a le Ekalesia a Iesu o le Au Pa’ia o Aso e Gata Ai i le latou Stake Tutotonu i Tafuna lea e aofia ai: Ualota e lua a Tafuna; Ualota e lua Mesepa ma Ualota e tolu a Makeke.

 

Ua faailoa mai e le susuga Howard Afualo, o matua faufautua o le “Single Adults” fanau talavou e 18+ tausaga le matutua, e tofu Ualota ma le ‘au pasiketipolo a tama fa’apea ma le ‘au  a teine lea o lo’o faia ai le liki lenei mo le lua vaiaso.”

 

Ona o lenei liki na amatalia i le aso Gafua ua te’a, o lea e fa’amae’a lelei lea liki i le aso Faraile o le vaiaso fou, ma faia ai loa le latou siva tele e tufatufaina ai fa’ailoga o ‘au ta’itasi sa tauva, fa’atasi ma fa’ailoga i sui taito’atasi po’o ai a lautogia i le tama lelei le ta’alo ma le teine ta’alo lelei fo’i.

 

O le aotelega o le tupulaga talavou o aofia i le 18+tausaga le matutua, ua fa’ailoa mai e tusa ma le 200+ i latou ma o lenei lava taumafaiga, e tau taofiofi mai ai fanau talavou a le ekalesia mai le so’ona fa’apotopoto i nisi fa’atasiga e le lelei mo i latou, ae fa’amasani i ta’aloga e fa’aleleia atili ai a latou taleni, o le tele fo’i lea o ni filifiliga tatau e ono aoga mo le latou lumana’i.

 

Ona o lea ekalesia ua lava tapena fo’i latou malae pasiketipolo i totonu o le latou hall tele i Ottoville, o lea e leai se fa’afitauli ia i latou o le fa’atautaiga o ta’aloga uma i afiafi ta’itasi, e ui ina o timuga le atunu’u. “E pau lava le fa’aletonu tuga o i ai, o le vaivai ua matua loloto o lo’o lumafale i ai lenei malumalu, ae o se mea lea e le pa’u mai ia i matou e ao ona fa’aleleia.” O se tala ata lea a se tasi o tina o le ekalesia.

 

Liki Softball Ben Solaita

 

Ua fa’ailoa mai e le Matagaluega o Paka ma Malae Ta’alo a le malo, le taumafaiga ina ia vave fa’aulu atu Au Softball uma mo le liki o le a amatalia ia Fepuari 8 ma e faia lea liki i le Malae Pesipolo Tony Solaita i Tafuna.

 

O le matutua o le fanau ua fa’ailo mai e ao ina lesitalaina o tagata ta’a’alo i nei ‘au e ta’i 16+ tausaga, ae ta’i 25 i le 30 tagata ta’a’alo e ao ina lisia mai e so’o se ‘au. Ua le gata i lea, ae ua fa’amamafa mai le ta’alo e fa’aaoga ai tulafono ua mae’a lisia pe afai e te ‘auai i so’o se ‘au e tauva i lea fa’agatama.

 

O le totogi ma lisi o ‘au fa’aulufale e ao ina fa’ao’o uma i le Matagaluega o Paka ma Malae Ta’alo, ma e mafai fo’i ona vala’au i ai mo ni si fa’amatalaga e tusa ai o lea ta’amilosaga i le  numera 699-0155.