Ads by Google Ads by Google

Tala I Vaifanua

ASO FA’AMAMA MO AMERIKA SAMOA

 

I se poloaiga fa’alaua’itele a le afioga le Kovana Sili Lolo Moliga i matagaluega ma ofisa o le malo, faapea fa’alapotopotoga ma pa’aga pisinisi, o lo’o taua ai e faapea o le aso Faraile o le vaiaso aso lona lua o masina ta’itasi o le tausaga atoa 2015, o le a avea ma aso Fa’amama o le Teritori.

 

Ua mae’a fa’atuina fo’i se komiti fa’apitoa mo lea fa’amoemoe e ala i se tusi fa’amaonia mai a le ta’iulu o le tatou malo, ma ua ia fa’ailoa mai, e taumafai ai ona fa’atulaga se fa’amama  mautu a le malo. O le ‘auga o le fa’amoemoe, e pei ona fa’ailoa e le Kovana, “Ia matua tete’e lava i le fa’alapisi, lea ua iloga mai, ua matua fa’aleagaina ai le si’omaga o le atunu’u, ma ua tele ina fa’aletonu ai ma le soifua maloloina o ona tagata uma e alaala i Amerika Samoa, peita’i, afai o le a mama le atunu’u, o le a’ave atu ai tala lelei e tusa o le tatou atumotu.”

 

O le komiti ua tofia nei, o i latou nei o le a fa’ataoto atoa mai se ‘auivi e fa’atino ai lea fa’amoemoe, ma ua fa’atonuina fo’i ofisa ma matagaluega o le malo e ao ina latou fa’amamaina nofoaga ua fa’atulaga mai, mai le 3:00 i le 4:00 i le afiafi.

 

E ese mai lea ua fa’ailoa atu fo’i i le Kolisi Tu’ufa’atasi o Amerika Samoa fa’apea ma a’oga uma i le teritori, e ao ina latou fa’amamaina o latou lotoa i le aso ua atofaina nei.

 

Ua fa’atalosagaina foi kamupani tua ma pisinisi ina ia alofagia e galulue fa’atasi ma le malo e ala i lenei fa’amoemoe lelei.

 

Ua fa’ailoa mai fo’i e le Kovana, o ta’ita’i o kamupani, fa’atasi ma fa’atonu o matagaluega a le malo o i latou na ua avatu i ai le fa’atuatuaga tele, e latou te lalamua e sapalai ane mea e fa’atino ai lenei galuega fa’amama, ma ia mautinoa lava ua fa’atino lea fa’amama.

 

FONOTAGA LONA 33 A LE ‘US CORAL REEF TASK FORCE (USCRTF)’

 

O galuega patino e lua ua fa’atulaga e le DMWR e ao ina avea ma autu o le latou folasaga i lea fonotaga taua, o “Suiga tuga o le Tau ua tatou a’afia ai ma le Fa’ateleina o Alamea i le ogasami o Amerika Samoa.”

 

O lo’o avea le faatonu sili o le matagaluega ia Dr. Ruth Matagi Tofiga e fai ma sui usufono o Amerika Samoa i le fonotaga lea i Uosigotone DC. E fa’alua ona faia fonotaga  ale USCRTF i le tausaga, i le masina o Fepuari ma le Oketopa i le laumua i Uosinitone.

 

O le USCRTF e ao fa’atasia i ai setete o Florida ma Hawaii ma teritori o Amerika e aofia ai Amerika Samoa, CNMI, Guam, Puerto Rico ma le Virgin Islands ma motu o le Atu Malesala, Palau ma FSM.

 

O lo’o ta’ita’ifono e to’alua ua mae’a tofia e aofia ai Lori Faeth o le DOI, ma Eileen Sobeck o le sui mai NOAA.

 

E tusa ai ma se fa’amatalaga mai a Matagi-Tofiga, “O le USCRTF o i latou ia e fa’ataunu’uina mai nisi o galuega fa’atino e taumafai ai ona sailiili ma su’esu’e toto’a o tatou a’au, o le tele o sailiga pe aisea ua mafua ai pea ona fa’aitiitia o tatou a’au ma pepe ‘amu, ma o i latou fo’i ia e toe taumafai e fa’aofi mai nisi o galuega e toe fa’aleleia ai na tulaga fita i le gataifale, ina ia toe olaola lelei le ‘amu ma a’au o le tatou atunu’u.”

 

O le folasaga a Matagi-Tofiga ua ia tima’i ai i le afaina tele o le ola o ‘amu ona o le vevela ua malosi tele i o tatou atunu’u, o suiga nei o le tau ua tatou o ola ai nei. Ua fa’apea fo’i ona ia fa’ao’o atu le popolega, e ono le toe gafatia e a’au ona olaola lelei, pe a tumau pea le si’isi’i o le vevela.

 

O le isi lu’iga ua ia fa’ailoa manino i lea fonotaga, ona o le Alamea ua fa’atuputeleina toe vave lona lauolaola i a’au, peita’i, ua mae’a fa’auia mai le fesoasoani tele a pa’aga galulue fa’atasi ma lana matagaluega, ina ia tineia ese Alamea mai a’au o Amerika Samoa. O i latou ia e aofia ai le National Park o Amerika Samoa, National Marine Sanctuary o Amerika Samoa, NOAA ma le DOI Coral Program.

 

Ona o le sami ma ona a’au o se tasi lea o nofoaga e sailia ai e tagata Samoa mea ‘ai i aso ta’itasi, o lea ua talosaga fo’i le tama’ita’i fa’atonu, ina ia fa’ataga pea ia ituaiga faiva fa’asamoa e fai e tagata Samoa e sailia ai se i’a mo le fofoga taumafa.

 

Ua fa’ailoa mai fo’i, sa auai ane le Sui i le Konekeresi o Amerika Samoa ia Aumua Amata i lea fonotaga.