TULAGA TOLU TAFUNA HIGH SUEGA I LE INITENETI

O se tala fiafia ua maua mai le polokalama a le JROTC i le Tafuna High lea sa pikia ai tamaiti e ta’ito’afa mai vasega ta’itasi 9-12 ina ia latou su’ea le suega e fa’aigoaina o le Academic Bowl, e faia i feso’ota’iga fa’ainiteneti.

E 137 le aofa’iga o a’oga na su’ea le suega lenei, ae tulaga tolu ai Tafuna High i ona vaega uma e 2, e ta’i lua fo’i teams ta’i 4 sa su’ea ai.

O a’oga na tauva e aofia ai aoga mai Amerika Samoa, Alaska, Kalefonia, Uosigitone, Oregon, Nevada, Hawaii, Guam ma CNMI.

Saunoa le faatonu o le JROTC i Tafuna, Sgt Major Semo Ve’ave’a e fa’apea, “O mea fa’apenei e fa’ato’a tupu lea i Amerika Samoa talu mai ona aumai lenei polokalama i a’oga maualuluga i’inei, fa’afetai i lea fo’i fa’aeaga.”

Mo lea taumafaiga, ua mafai nei ona maua ni latou Fa’ailoga mo le tausaga a’oga fou.

O i latou na aofia i lea taumafaiga e aofia ai ma faia’oga mo le fanau: Cadet Sam Lei Sam, Cadet Tokomaata Vai, Cadet Solaita Elma, Cadet Semo Mikey, Cadet Iosefo John, Cadet Mua’au Will, Cadet Taula Levanimonimo, Cadet Ane, Cadet Siimalevai Denira and Cadet Osa Neon.

SAILI TAMA E LELEI I LE VOLIPOLO

Ua fa’atulagaina nei le sailia oni tama ta’a’alo, i so’o se matua, e tu’ufa’atasia ai se ‘au Volipolo Ali’i a Amerika Samoa (American Samoa National Basketball Team).

“Ona o le manatu ina ia maua lava i latou uma le avanoa e ta’a’alo ai i lea ‘au volipolo a Amerika Samoa i le itupa o ali’i, e ao ai ona saili i le afi le tulaga. O le a faia ta’aloga i le Fale ta’alo o le Kolisi Tu’ufa’atasi i le aso To’ona’i, e va’aia ai i latou e lelei i lea fo’i fa’agatama,” o se saunoaga lea a le ali’i ua fa’atulaga e na te a’oina le ‘au volipolo lea, Ben Sauvao.

Ua fa’ailoa mai, o lo ua mae’a fa’atulaga le ta’amilosaga volipolo a le Pasefika i lenei tausaga ia Iulai 4-18 i Papua Niu Kini, ma e tatau ona o’o atu i ai, ua lava tapena lea fa’amoemoe mo se ‘au volipolo a le tatou atunu’u.

Ona o le filiga o le tama ta’a’alo e faia i le aso To’ona’i, o le a iai fo’i nisi alo o le atunu’u, e le auai, aua o le latou sapati lea. O nisi foi e le o mafai ona auai ona o latou tuatuagia fa’ale-aiga, o le a toe fa’alauiloa se isi aso e mafai ona auai i latou na i se isi sailiga o nisi e fa’aopoopo ane e sailia. O le sui ua filifilia mo le sui fa’atonu o le ‘au volipolo a Amerika Samoa o Peni Tautunuafatasi, o i la’ua ia o le a va’ava’alua i lea fa’amoemoe e fili lelei se tatou ‘au.

O lo ua fili fo’i le sui e avea ma faiaoga o lea ‘au le susuga Tumua Matu’u.