SI’ITIA TULAGA I SU’EGA TAUA - JROTC A TAFUNA HIGH

Ua fa’ailoa mai e le susuga Sgt Ve’ave’a le si’itaga ua i ai nei le fa’atautaiga ae maise o le tomai ua a’otauina ai le fanau o lo’o tau’avea mataupu amata o le soifua tautua i le Militeri [JROTC] i Tafuna High.

“O le su’ega lenei a le Leadership & Academic e tatau ona su’ea e le fanau a’oga maualuluga o lo’o tau’avea le JROTC, e na’o Tafuna High lava ua mae’a su’eina uma e le fanau lea su’ega fa’alua i totonu o le teritori,” o se fa’amatalaga ma’oti mai lea o le fa’auluuluga a le JROTC i Tafuna.

“O se tala fiafia fo’i, ua matua lelei lava togi o le fanau o tau’avea le JROTC. O le mea lelei lea, aua ua va’aia fo’i le agava’a o le fanau ua mae’a su’eina lea su’ega taua. O isi a’oga e aofia ai le Samoana, ua su’ea e i latou le su’ega, ae na’o le tasi le su’ega ua mae’a, ae o lea ua fa’asolo ona taumafai mo le su’ega lona lua lea. Peita’i, e na’o le tasi le vaega ua su’ea ae le’i aotelega ai le fanau atoa o lo’o tau’avea le JROTC,” o se saunoaga lea a Ve’ave’a.

O se fautuaga fo’i lea ua fa’ao’o atu e ala i lenei fo’i tusitusiga, ina ia finafinau faia’oga o le JROTC ia pasia uma e le fanau a’oga JROTC lea fo’i suega aoga tele i lo latou soifua taumafai ai i vaega o le militeri. E amana’ia ai fo’i le taumafaiga a le fanau i le amataga o lo  latou soifua tautua ile militeri, aua o le su’ega lea, ua su’ea uma lava e fanau mai teritori e aofia ai Guam, CNMI, Palau ma Amerika Samoa.

TOMAI I LE SAENISI, TEKONOLOSI, SINISINIA & MATEMATIKA

O se polokalama fou tu’ufa’atasia e le Matagaluega o A’oga i lona Vaega o le Matematika ma le Saeanisi, ua taumafai ai ona fa’auia le fanau i se ala e fiafia ai e tau’ave ma manino ia i latou le aoga tele o tomai fa’amatematika, saeanisi ma le inisinia e feso’ota’i tonu ma suiga o tekonolosi o lenei vaitau.

O se tu’ufa’atasiga ina ia fa’amatala, fa’amalamalama ma tago atu le fanau e fa’atino nei tomai eseese, o le a faia lea i le Malae o Samoana i le aso 17 Ianuari, 2015. Ua vala’auina matua ma fanau, ia o’o ane i lea malae mo le ulua’i tu’ufa’atasiga o tomai ma a’oa’oga e feso’ota’i tonu ma tekonolosi.

O le polokalama fa’amasani ina ia sogasoga ai le talavou mai lona la’ititi e su’esu’e ma iloa atili le so’otaga o tekonolosi, saeanisi, numera ma le inisiniaina o nei masini o tekonolosi o le talutalu fou.

Ua fa’ailoa mai, e le matagaluega o a’oga “E ao ina aumai uma talavou, ia aoga ona fa’amasani i latou e fiafia i nei mataupu e tau’avea i a’oga. O le isi aoga, o le naunau ia tumau i le tamaititi na te fia iloa atili mea uma e tusa o masini eseese, o le afuaga o le ola ma fealua’i, ae maise o le aoga mo ana su’esu’ega.”